Ara dadamtu kentidiki ayallar yer ‏ - zéminlirini qoghdap qaldi

Hörmetlik oqurmenler, biz ötkenki programmilirimizda, ghulja nahiyisining turpanyüzi yézisi we ghulja shehirining dadamtu yéza bulaq kentidiki déhqanlarning bagh we yer mesilisi heqqide xewerler sun'ghan iduq. Bügün yene mushuninggha oxshighan bir weqe heqqide melumat bérimiz.
Muxbirimiz shöhret hoshur
2009.05.07
Uyghur-ayalliri-305 Sürette, uyghur ayalliri.
RFA Photo

Bügünkisi, dadamtu yézisining ara dadamtu kentide ötken hepte yüz bergen weqe. Perqliq yéri, aradadamtu kentide, mesilini ayallar hel qilghan, yeni 7 neper ayal topa türtüsh mashinisining aldigha özini étip, hökümetning mejburiy tériqchiliq pilani arqiliq yer tartiwélish zorawanliqigha qarshiliq körsetken we ghelibe qazan'ghan.

Ghulja shehirining dadamtu yézisining bulaq dadamtu kentidiki déhqanlar, hökümetning mejburiy tériqchiliq pilani seweblik yiridin ayrilip qalghan idi. Bu yézining ara dadamtu kentining déhqanliri bu tejribige asasen, mezkur pilan'gha qarita perqliq tedbir qollandi. Yeni mejburiy tériqchiliq pilanigha qarita shiddetlik qarshiliq körsitip, oxshash aqiwetning aldini aldi.

Bu programmimizda, bulaq dadamtu kentidiki déhqanlarning yirini tartquzup qoyush weqesi heqqide, shundaqla aradadamtu kent ahalilirining mesilige qandaq tedbir qollan'ghanliqigha  a'it weqelerning tepsilatidin silerni xewerdar qilimiz.

Yuqirida tilgha élin'ghan weqening rastliqini aradadamtu kentining bashliqi adilmu étirap qildu؛ uning qarishiche, nöwette köktat sodisi yaxshi boliwatidu. Dadamtu yézisi bu soda üstide chet'el bilen köp miqdarda toxtammu tüzgen؛ bir qisim déhqanlar paydimu alghan. Emma Uyghur déhqanlirining inkas qilishiche, payda éliwatqanlar, yerlik déhqanlar yeni Uyghurlar emes, yenila xitay köchmenliri.

Dadamtu yézisining bashliqi jür'et, yerning menggülük emes, 5 yilliq ijarige élinmaqchi ikenlikini, buninggha déhqanlarni ishendürüsh üchün aptonom rayondin mexsus adwokat teklip qilghan؛ emma, bu adwokatlarning guwahliqigha aradadamtuluqlar ishenmigen. Aradadmtuluqlar peqet qoshnisi bulaq dadamtuluqlarning béshidin ötkenlergila ishen'gen we buni hökümetning yerni Uyghur déhqanliridin xitay déhqanlirigha tartip élip bérish herikiti dep chüshen'gen.

Aradadamtu ayalliri arqa - arqidin topa ittirish mashinisining aldigha özini atqandin kéyin, weqege étiz meydanidiki erkeklermu arilashqan. Shu künki neq meydanda, yéza we sheherning emeldarliri we saqchilirimu mewjut bolup, shiddetlik qarshiliq aldida charisiz qalghan. Birqisim kadirlar özlirining hökümet tereptiki meydanidin waz kechken.

Axirida kadir we saqchilar shu künlük pilanidin waz kechken. Yenila xatirjem bolalmighan yéza déhqanliri ghulja sheher we ili oblastliq hökümetke erz qilish üchün aptobus ijarige élip yolgha chiqqan. Emma erzdarlar, yérim yolda tosup qélin'ghan. Emma, aradadmtuluqlarning hem qattiq hem yumshaq shekildiki qarshiliqi axirqi hésabta waqitliq bolsimu netije bergen. Bu ishning netijisi heqqide yéza bashliqi ézizi bizge bu heqte uchur berdi.

Uyghur tarixida, heqiszliqqe qarshi heriketler héchqachan toxtap qalghan emes؛ bu qétim aradadamtuda yüz bergen weqe bir özgilichikke ige؛ u bolsimu, mesilide hel qilghuch rol oynighan ayallardur.

Hörmetlik oqurmenler, yuqirida biz silerge, aradadamtu ayallirining, öz kentide yüz bergen yer majirasini qandaq hel qilghanliqi heqqide melumat anglattuq.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.