D u q qurultay wekillirining washin'gitondiki tesiratliri (2)

D u q ning 3 - nöwetlik wekiller qurultiyidin bir körünüsh.

Ötkenki qétimliq anglitishimizda dunya Uyghur qurultiyining bu nöwet washin'gitonda chaqirilghan 3 -  nöwetlik wekiller qurultiyigha qatnashqan bir qisim wekillerning bir heptilik pa'aliyetlerdin alghan tesiratliri heqqide programma anglatqan iduq, töwende mezkur programmining dawamigha diqqet bergeysiler.

Dunya Uyghur qurultéyining washin'gitonda dawam etken bir heptilik pa'aliyetlirige teklip bilen qatnashqan qurultay pexri re'isi, qazaqistan Uyghur wekilliridin riza semidi ependi, qazaqistan'gha qaytish sepiri aldida ziyaritimizni qobul qilip, özining washin'gitonda bu qétim Uyghurlargha nisbeten tarixiy ehmiyetke ige yighilish hem weqelerge shahid bolghanliqidin bekmu memnun bolghanliqini bildürdi hemde barliq Uyghurlarning Uyghur milliy herikiti rehbiri rabiye qadirni himaye qilishni milliy burch dep tonushini tewsiye qildi.

Kanadadin kelgen Uyghur pa'aliyetchiliri wekilliridin yazghuchi tuyghun abduweli ependi bu qétim dunya Uyghur qurultiyining saylimida, wekillerning ortaq qollishi bilen dunya Uyghur qurultiyining bash katibatida wezipige qoyulghan idi, saylamdin kéyin ziyaritimizni qobul qilghan tuyghun ependi, dunya Uyghur qurultiyining saylimidin Uyghur pa'aliyetchilirining démokratiye éngidiki yüksilishni körgenlikini, bu özide chongqur tesir peyda qilghanliqini ipadilidi :

Bu qétim dunya Uyghur qurultiyi rehberlik orginida melum nisbette yashlishish hem yéngilinish körüldi, bu qétim qurultay terkibidiki bir qisim komititlarda chet'elge chiqqinigha uzun bolmighan bolsimu, Uyghur siyasiy pa'aliyetlirige izchil qatniship kéliwatqan aktip yashlarningmu Uyghur milliy herikiti sépige resmiy qétilip iqtidarini teshkillik pa'aliyetlerde yenimu jari qildurushigha pursetler yaritip bérildi, amérikida yashawatqinigha üch yil bolghan ziyaliy élshat ependi dunya Uyghur qurultiyida resmiy wezipe tapshuruwalghan shundaq yéngi ezalarning biridur.

Dunya Uyghur qurultiyining bu yighinigha qatnashqan wekiller arisida hijrettiki Uyghurlar arisida hörmetke sazawer erbablar, mutexessis, sha'irlarmu bar, qazaqistandin kelgen wekiller ichidiki malik sadirof ependi ataqliq Uyghur sha'irlirining biri, ziyaritimiz dawamida bu sha'ir özining mezkur qurultaygha shundaqla rabiye qadir xanimgha atap yazghan shiérini oqup berdi.

Hijrettiki Uyghur pa'aliyetchilirining merkizi orgini shundaqla teshkili apparati bolghan dunya Uyghur qurultiyining 18 ‏ - maydin 26 - mayghiche dawam qilghan pa'aliyetliri netijilik ayaghlashti. 21 Dölettin kelgen 100 din artuq Uyghur birlikte paytext washin'gitonda dunyagha Uyghurlarning öz teqdirini özi belgilesh, insaniy heq hoquqlirini qoghdash üchün, xitayning siyasiy hem medeniy, érqiy jehette wetini hem xelqige salghan zulumlargha qarshi élip bériwatqan pa'aliyitini rehbiri rabiye qadir xanim etrapigha uyushup, démokratik usulda tinchliq yolida dawamlashturidighanliqini jakarlidi.

Her qaysi döletlerdiki Uyghurlargha wekil bolup kelgen barliq Uyghur pa'aliyetchiliri, her sahe erbabliri, ziyaliyliri, Uyghurlarning bu büyük yighilishidin alghan tesiratlirini, dunya Uyghur qurultiyi rehberlikining tapshurghan wezipiliri, körsetmilirini élip hayajan hem ümidler bilen qaytti.