Ereb bahari tügep qaldimu?

Ereb dunyasida chiqqan namayishlargha bir yildin köprek waqit ötken bolsimu, bu namayishlar dawam qilmaqta we netijisi her xil bolmaqta.
Ixtiyariy muxbirimiz ömerjan
2012-05-01
Share
misr-suriye-namayish-305.png Sürette qahirediki süriye hökümitige qarshi namayishtin bir körünüsh
Photo: RFA

Tehlilchilerge köre, ereb baharining birinchi adrési bolghan tunis bilen misirda namayish toluq ghelibe qilip, hakimiyet xelqning qoligha ötüsh aldida jiddiy heriketler boluwatqan bu peytte, liwiyide parchilinish xewpi, süriyide namayishlarning netijisiz qélish xewpi körülmekte iken.

Londonda chiqidighan"Ottura sherq" gézitining 2012-yili 1-may künidiki sanida, ereb yazghuchisi xalid el qishtini teripidin "Ereb bahari tügidimu?" dégen témida bir maqale élan qilin'ghan bolup, maqalide mundaq dep yézilghan:
"Ereb baharigha 15 ay boldi. Bu arida köp ishlar özgerdi, muhim dölet erbabliri adettiki ademlerge özgirip qaldi, hetta menggü texttin chüshmeymiz, dep oylap xatirjem olturghan we text warisliqini öz perzentlirige yötkeshning xiyalida bolghan hökümdarlarmu birdin texttin chüshüp ketkenlikini tuymay qaldi. Chünki, qur'an kerimide 'künlerni insanlarning otturisida almashturup turimiz' dégen ayetning teqezzasi boyiche, hakimiyetmu almiship turidu. Xelqning arzusi emelge éship namayish esnasida tökülgen qanlarning bedilige teqdirleshke tégishlik ishlarmu boldi. Emma échinishqa tégishlik weqelermu boldi. Mesilen: süriye weziyiti heqiqeten échinishliq bolmaqta. Süriyidiki öktichiler emdi yolning otturigha kélip qalghanda, arqigha qaytalmaydu. Ularning inqilabi choqum ghelibe qilishi kérek. Nawada ularning inqilabi yérim yolda qalsa, süriyining hemme yéri qebrilerge aylinip qalidu. Hazir dunya xelqining közi süriyide bolmaqta. Süriyidiki öktichilerning ghelibiliri ashqanséri, esed hakimiyitining wehshiyliki ashmaqta."

Ereb bahari ölmidi

Maqalide yene mundaq dep yézilghan:
"Ereb dunyasidiki démokratiye telep qilish heriketliri oxshash bolmighan shekillerde we oxshash bolmighan hejimde bolup ötti we boluwatidu. Bu heriketler sayiside her xil xaraktérge ige jama'etler we teshkilatlar otturigha chiqqan boldi. Ularning chiqqanliqinimu démokratiyining awwalqi méwiliridin biri déyishke bolidu. Chünki, diktatoriliq zamanida ereblerning bunchilik awazi chiqmighan idi. Ereb dunyasidiki özgirishler kündin-kün'ge tereqqiy qilip barmaqta. Süriyide diktatoriliq tüzümige qarshi heriket dawam qilmaqta. Bu ehwalda, héchkim ereb baharini tügidi déyelmeydu. Chünki, emeliyettimu ereb bahari tügigini yoq. Belki u dawam qiliwatidu. Shuni keskin éytalaymizki, ereb bahari dawam qilidu. U hazirqi sheklide dawam qilmisimu sheklini we usulini özgertip dawam qilidu."

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet