Әрәб қолтуқи дөләтлири һәмкарлиқ кеңишиниң 32-нөвәтлик чоң йиғини вә әрәбләрниң күткәнлири

Әрәб қолтуқи дөләтлири һәмкарлиқ кеңиши 1971-йили 25-май күни әрәб бирләшмә хәлипиликиниң пайтәхти әбудаби шәһиридә тәсис қилинған район характерлик тәшкилат болуп, қараргаһи сәуди әрәбистаниниң пайтәхти рияд шәһиридә болуп кәлмәктә.

Әрәб қолтуқи дөләтлири һәмкарлиқ кеңиши сәуди әрәбистани, әрәб бирләшмә хәлипилики, қатар, кувәйт, бәһрәйн, уман қатарлиқ алтә дөләттин тәркиб тапқан.

Сәуди әрәбистанида чиқидиған “әлвәтән” гезитиниң 2011-йили 20-декабир санида, әрәб қолтуқи дөләтлири һәмкарлиқ кеңишиниң 32-нөвәтлик чоң йиғини һәққидә тохталған болуп, муһәммәд қәшири дегән кишиниң қәлими билән “әрәбләрниң чоң йиғиндин күткәнлири” дегән темида мундақ бир мақалә йезилған: “әрәб қолтуқи дөләтлири һәмкарлиқ кеңишиниң 32-нөвәтлик чоң йиғини 19-декабир дүшәнбә күни сәуди әрәбистаниниң пайтәхти рияд шәһиридә чақирилди. Ечилиш нутқини сәуди әрәбистани падишаһи абдулла сөзлиди. Бу йиғин алдинқи йиллардикидин алаһидә пәрқлиқ болуп, 30 дин көпрәк министир иштирак қилди. Йиғинниң асаслиқ мәқсити әрәб қолтуқи дөләтлири һәмкарлиқ кеңишигә әза дөләтләр оттурисида иқтисадни җанландуруш, бу дөләтләр арисида қатнаш ишлирини вә чегра рәсмийәтлирини оңайлаштуруш, әза дөләтләр оттурисида пул бирликини әмәлгә ашуруш вә сүрийә кризисини артуқ қан төкүлмәстин һәл қилиш үчүн бир сәптә туруш, иранниң тәһдитлири алдида бирлишиш қатарлиқ мавзуларда сөзлишиштин ибарәт икән.”

Әрәбләрниң күткәнлири аз әмәс

Мақалидә йәнә мундақ дәп йезилған: “әрәб қолтуқи дөләтлири һәмкарлиқ кеңиши 6 дөләттин қурулған бир тәшкилат болсиму, йәмән, иорданийә, маракәш, ирақ вә мисир қатарлиқ дөләтләрму әзалиқ тәләплирини аллибурун сунған болуп, улар әза болуш йолида тиришип келиватиду. Буниңдин мәлумки, бу тәшкилатниң әһмийити зор вә шөһрити чоң болмақта. Шу сәвәбтин әрәбләр униңға үмид бағлайду вә қарарлириниң әрәб дөләтлиридики кризисларни һәл қилалиғудәк мәһкәм болушини күтиду. Сүрийидә қан төкүлүватқан, йәмәндә қалаймиқанчилиқ бесилмиған, иранниң тәһдитлири күндин‏- күнгә ешиватқан бу күнләрдә, бу тәшкилатниң роли чоң болиду. Сүрийә һакимийитини әйибләш вә сүрийигә җаза қоллиниш ишлирида бу тәшкилатқа әза дөләтләрниң бир сәптә турғанлиқи махташқа тегишлик иштур. Бу йиғинниң хәлқниң тәлипини қандуралайдиған қарарларни чиқирип иҗра қилишиға һәммә үмидвар болмақта.”