Erkin abdulla béyjingda chong hejimlik balilar naxsha ‏ - usul kéchiliki ötküzdi

Uyghur usuli.

 Bügün béyjing bawli sariyida bu yash set'etkarning orunlashturushi bilen chong hejimlik balilar naxsha ‏ - usul kéchiliki ötküzülgen bolup, mezkür kéchilikning barliq kirimi Uyghur élining jenubidiki apet rayonlirigha i'ane qilinidiken.

18 - Séntebir peyshenbe küni béyjing bawli sariyida, Uyghur géttar shahzadisi erkin abdulla bilen teng qeshqer balilirining sehne igilishidiki " rengdar qeshqer - pamir igizliki balilar riwayiti " namliq chong hejimlik balilar naxsha ‏ - usul kéchilikining birinchi qétimliq oyuni tamashibinlar bilen yüz körüshti. Bu kéchilik 21 - séntebirgiche töt kün dawamlishidighan bolup,yash naxshichi erkin abdulla bashchiliqidiki, nurghun dangliq muzikantlar hemde qeshqerdin kelgen 41 neper ösmür balilarning qatnashchiliqidiki alahide ehmiyetlik bir sen'et kéchilik hésablinidu. Chünki mezkür kéchilikning barliq kirimi pütünley jenubiy Uyghur élidiki apet rayonlirigha i'ane qilinidiken.

Erkin abdullaning qeshqer baliliri bilen birge oyushturghan bu sen'et kéchilikige qeshqer diyari pamir igizlikidiki 12 nahiyidin Uyghur, tajik, qirghiz we özbek milletliridin bolghan balilardin teshkillen'gen ösmürler ömikide, 5 yashtin 14 yashqiche bolghan bir - biridin chirayliq hem zérek kichik artistlarning, chüchük tili, mungluq awazi bilen bir qanche xil tillarda éytqan naxshiliri, rengdar, omaq, tebi'iy usulliri tamashibinlarni heyran qaldurghan hem tesirlendürgen.

Mezkür kéchiliktiki sen'et nomurliri asasen balilar naxshilirini, erkinning qedimqi balilar chöchekliri asasida ishligen ijadiy naxshiliri, elneghmiler, yéngi muzikigha sélin'ghan xelq naxshilirini asas qilghan bolup, erkin abdulla neq meydanda naxsha hem muzika orunlighandin bashqa, balilar bilen birlikte xor, naxsha ‏ - usul nomurlirinimu körsetken. Gherbiy diyarning bu rengdar yultuzliri nöwette xitayning muhim téléwiziye qanallirida, xongkong sumrugh qanallirida körsitilmekte.

Xongkong sumrugh téléwiziyisining dangliq obzorchisi yu'en sishen ependi mezkür kéchilik neq meydanida turup sumrugh téléwiziye muxbirigha, özining bu güzel hem sebiy balilardin intayin tesirlen'genlikini bildürüp, bu kéchiliktin bir millet balilirigha bolghan medeniyet ‏ - sen'et terbiyisining qanchilik muhimliqini heqiqiy chüshendim" dégen.

Mezkür kéchilikning uyushturghuchi rézhisorliridin bolghan shyaw shi " bizning bu bala artistlarni tépip bir yerge yighmighimiz intayin tes boldi, xuddi bu milletning sen'itining tamchimu ‏ - tamche yighilip bir medeniyetni hasil qilghinigha oxshashla, biz bu medeniyet uchqunlirini öchürüp qoymasliqimiz kérek uni dawamlashturush üchün béshidin yeni balilardin bashlishimiz kérek " dep bildürgen.

"Rengdar qeshqer - pamir igizlikidiki balilar riwayiti "sen'et kéchilikining axbarat élan qilish yighinida, mezkür kéchilikke nazaret qilghuchi Uyghur aptonom rayonluq partkom teshwiqat bölümi bashliqi shi shingtyen mezkür kéchiliktimu, xitay da'irilirining siyasiy teshwiqat üchün paydilinish meqsitini ashkarilighan bolup u " islahat échiwétilgen 30 yildin buyan shinjang yenimu rawajlandi, janlandi, qeshqer balilirining bu oyuni shinjanggha intilidighan yenimu köpligen dostlarni jelp qilishini ümid qilimiz " dégen.

Mezkür kéchilikning bash pilanlighuchisi shundaqla qeshqer we pamir baliliridin teshkillen'gen bu balilar sen'et ömikining qurghuchisi bolghan erkin abdulla muxbirlargha, bu shakichik cholpanlarning bir nechche ayliq jiddiy meshiq jeryanida körsetken tirishchanliqi hem sewirchanliqigha heyran qalghanliqi, ulardin tolimu söyün'genliki, bügünki oyunning muweppeqiyetlik chiqishida bularning töhpisining hemmidin zorluqini bildürüp, özining bu balilardin, öz milliy medeniyiti, naxsha ‏ - muzikisidin intayin pexirlinidighanliqini ipadiligen.

Erkin abdullaning bildürüshiche, mezkür balilar naxsha ‏ - usul ömiki xalis balilar medeniyet guruppisi bolup, ularning oyushturghan kéchilikining kirimi pütünley jenubiy Uyghur élidiki namrat hem apet rayonlarning balilar ma'arip we medeniyet ishlirigha teqdim qilinidiken.