Erzdar ghazi hamut, 6yildin béri élip bériwatqan xun heqqi dawasida axiri netijige érishti

Shixenzide yashawatqan ahalilerdin ghazi hamut, ötken yili 11 ‏-ayda béyjinggha kélip, 17 yashliq oghlining xitaylar teripidin öltürülgenlik weqesi we sot hökümide buyrulghan xun heqqining bérilmigenlik ehwalini béyjingdiki alaqidar organ we chet'el axbarat wasitilirige melum qilghan idi.  U bügün radi'oyimizning ziyaritini qobul qilip, özining dawada netije qazinishining sewebliri heqqidiki tesiratlirini bayan qildi.

Shixenze sot mehkimisi eslide, ghazi hamutning oghlining xun heqqi üchün 159 ming yüen bérilishni buyrughan. Emma jawabkar terepler bu pulning peqet 72 ming yüenini bérip, qalghan qismini bérishni türlük bahaniler bilen ret qilghan. Ghazi hamut 6 yildin béri toxtimay erz qilish arqiliq, axirqi hésabta qépqalghan 87 ming yüen xun heqqinimu tölitiwalghan.

Melum bolushiche, yéqinqi yillardin béri shixenzide Uyghurlarning xitaylar teripidin urup öltürülüsh weqesi arqa-arqidin 11 qétim yüz bergen. Ölgüchi a'ile-tawabatining shixenzide bolmasliqi we yaki dawada ching turalmasliqi qatarliq sewebler tüpeyli, bu weqelerning köpinchisi soraqsiz qalghan.

Hörmetlik radi'o anglighuchilar, ghazi hamut özining dawadiki netije qazinishini asasliqi weqeni xelq'ara axbaratqa ashkarilighanliqidin körmekte. Emma ré'alliq shuki, mesile axbaratqa ashkarilan'ghandin kéyinmu hel bolmighan misallar az emes. Wetendin kelgen bezi inkaslar, xitay hökümitining, 5‏-iyul weqesidin kéyin, chong ammiwi weqelerning tekrar yüz bérip qélishining aldini élish üchün, xitaylar bilen Uyghurlar arisidiki majiralarni bir terep qilishta, nisbeten éhtiyatchan mu'amile qiliwatqanliqini, yeni burunqidek ashkara heqsizliq qilishtin saqlinishqa tirishiwatqanliqini bildürmekte. Oxshash inkaschining bildürüshiche, bu türdiki ijabiy ehwallar Uyghur élidiki omumyüzlük bir yüzlinish emes, peqet ayrim jaylarda, bezi chaghlarda yüz bériwatqan qismen ehwallardur.