Béyjingdiki siyasy qanun komitéti aldida erzini dawamlashturuwatqan Uyghur erzdarlar saqchilarning tehditige uchridi

Béyjingdiki siyasiy qanun komitéti aldida naraziliq bildürüwatqanliqigha üch kéche - kündüz bolghanliqini bildürgen Uyghur erzdarlar, 20 - iyun da'irilerning puqrache kiyin'gen saqchilar, qoralliq saqchilar hem Uyghur erzdarlarni élip kétish üchün yerliktin ewetilgen saqchi - kadirlar bolup 100 ge yéqin ademni ewetip, Uyghur erzdarlarni siyasiy qanun komitéti aldidin élip kétishke urun'ghanliqini bildürdi.

Xitaylar teripidin urup öltürülgen oghlining xun dawasini qilip béyjinggha kelgen erzdar ghazi akining bildürüshiche, 20 - iyun küni etigen béyjing waqti sa'et onlarda da'iriler puqrache kiyin'gen saqchilar hem qoralliq saqchilarni ewetip, Uyghur erzdarlarni siyasiy qanun komitéti aldidin kétishke zorlighan. Puqrache kiyin'gen xitay saqchiliri hetta naraziliq bildürgen Uyghur erzdarlirini urup ularni saqchi aptomobillirigha qachilap élip kétishke urun'ghan.

Xitay shirkitige mejburiy sétip bérilgen öyi hem térilghu yérining dawasini qilip, qeshqerdin kelgen amine xanimning bildürüshiche, uni qeshqerge élip kétish üchün siyasiy qanun komitéti aldigha yétip kelgen Uyghur kadirlar hem saqchilar amine xanimgha aldash, popoza qilish, tehdit sélish hetta béyjingdiki xitay saqchilirigha urghuzush qatarliq wasitilerning hemmisini qollan'ghan.

Erzdarlarning bildürüshiche, siyasiy qanun komitéti aldidiki Uyghur erzdarlar téléfon ziyaritimizni qobul qiliwatqan chéghida, ularni tarqitiwétish üchün ewetilgen qoralliq saqchilar meydandin ketken. Emma puqrache kiyin'gen saqchilar hem yerliktin ewetilgen saqchi - kadirlar bolup yene 30 din artuq kishi neq meydanda bar bolup, Uyghur erzdarliri sépige béyjingdiki bir qisim xitay erzdarlirimu qoshulghan. Etrapta yighilghan 100din artuq béyjing puqraliri Uyghur erzdarlirigha medet bergini üchün, siyasiy qanun komitéti aldida Uyghurlarni élip kétish üchün kelgen kadir saqchilar erzdarlardin 10 métir ariliq tashlap ularni közitip turghan halet shekillen'gen.

Etigendin buyan siyasiy qanun komitéti aldida, Uyghur erzdarlarni élip kétish üchün kelgen xitay saqchiliri otturisida yüz bergen talash tartishni körgen li famililik erzdar ayal ziyaritimizni qobul qildi.

Li xanim mundaq dédi: men qizimning xun dawasi üchün jéjiyangdin kelgen bir méyip erzdar. Téxi ikki sa'et ilgiri bu yerde qoralliq saqchi, puqrache kiyin'gen saqchilar bolup 100 din artuq adem hem nechche onlighan saqchi aptomobilliri bar idi. Meydan'gha ewetilgen puqrache saqchilarning küp - kündüzde yashan'ghan boway, we ayallargha zorluq wasitilirini qollinishi etraptiki ammining ghezipini qozghidi. Hazir Uyghur erzdarlirini tarqitiwétish üchün kelgen qoralliq saqchilar meydandin ketti. Men öz közüm bilen puqrache kiyin'gen ayal saqchining amine isimlik shinjangliq ayalni urghanliqini kördüm. Saqchilarning bu qilmishigha hemmimiz narazi bolduq, hetta menmu chaqliq orunduqum bilen bu jédelge arilishishqa mejbur boldum.

Béyjingda erzini dawamlashturuwatqan anargül we amine xanim qatarliq Uyghur erzdarlar bundin ikki hepte ilgirimu, radi'omiz ziyaritini qobul qilip, özlirining siyasiy qanun komitétigha erz üchün kelginide béyjingdiki saqchilar teripidin tayaq yégenlikini bildürgen idi.

Ziyaritimizni qobul qilghan Uyghur erzdarlar bu ehwallarni muxbirlargha ashkarilashtiki seweb heqqide toxtilip, özlirining béyjingda uchrawatqan naheqchilikliri hem erzini ularning etrapigha yighilghan puqralar hem muxbirlargha anglitish yoli arqiliqla melum netijige érishishke ümidi barliqini bildürdi.

Hörmetlik radi'o anglighuchi dostlar, béyjingdiki Uyghur erzdarliri türlük qiyinchiliq we tehditler ichide erzini dawamlashturmaqta. Ularning bundin kéyinki ehwali qandaq bolidu? ularni élip kétish üchün yerliktin ewetilgen kadir saqchilar qandaq inkaslarda? programmimiz dawamida erzdarlar bilen yerliktin ewetilgen kadirlar otturisidiki shert - kélishimler hem yerliktin ewetilgen kadir saqchilar bilen radi'omiz élip barghan söhbet xatirisini anglaysiler.