Chapchal kan yézisi déhqanliri erzdar dilmurat muslinni qollaydighanliqini bildürdi

Kan yézisi déhqanlirining yéza kadirlirining parixorluq qilmishi üstidin qilghan erzi yerlikte qobul qilinmighachqa, kündin-kün'ge éghirlishiwatqan parixorluq qilmishidin ghezeplen'gen déhqanlar dilmurat muslinni béyjinggha ewetip, yuqiri orunlargha erz qilish yolini tutqan.

Radi'omiz ötken hepte hem uningdin ilgiriki programmilirimizda chapchal nahiyisi kan yézisigha qarashliq 5000 mo da'irini igileydighan toqayliqning 2011-yilidin bashlap nahiyilik orman idarisi hem yéziliq hökümettiki bir qisim emeldarlar teripidin xitay ölkiliridin kelgen xitay tijaretchiliri hem ghulja shehiridin kelgen sodigerlerge sétip bérilishi weqesi hem yéza kadirlirining parixorluq qilmishi heqqide erzdar dilmurat muslin hem bashqa déhqanlarning naraziliq inkasliri hem béyjingda erzni dawamlashturuwatqan dilmurat muslin hem uning a'ilisidikilerning da'iriler teripidin tehditke uchrighanliqi heqqide xewer bergen iduq.

Bügün kan yézisidin radi'omiz ziyaritini qobul qilghan déhqanlar nöwette yéziliq hökümet da'iriliri déhqanlarning erzi seweblik ulargha wekil bolup béyjinggha ketken dilmurat muslinning a'ilisi hem bir qisim déhqanlargha bésim ishlitiwatqan bolsimu, emma déhqanlarning ular üchün pidakarliq körsitip, erzini dawamlashturuwatqan dilmurat muslinni dawamliq qollaydighanliqini bildürdi.

Déhqanlarning bildürüshiche, dilmurat muslin üch aydin buyan déhqanlargha wakaliten, yézidiki weyran qilin'ghan toqayliq hem yéza kadirlirining parixorluq qilmishi üstidin erz qilip ürümchi, béyjing qatarliq jaylarda yürüp, her xil qiyinchiliqlar ichide erzini dawamlashturuwatqan bolup, dilmurat muslin bu qétimqi erzi üchün özining shexsi traktorini 70 ming yüen xelq puligha sétiwetken.

Öz kimlikini ashkarilashni xalimaydighan bir déhqan yézidiki déhqanlarning yéziliq hökümet da'irilirining bésimi hem tehditlirige qarimay, ular üchün béyjingda erzini dawamlashturuwatqan dilmurat muslin'gha öz chamining yétishiche pul yighish qilip ewetip bergenlikini bildürdi.

Dilmurat muslinning béyjingda erzni dawamlashturuwatqanliqi heqqidiki xewer radi'omizda bérilgendin kéyin, kan yéziliq hökümet da'iriliri ötken hepte, dilmurat muslinning ayali hem uruq-tughqanlirini yézidiki saqchilar arqiliq nahiyidiki saqchi idarisige ekétip soraq qilghan. Shundaqla yézidiki déhqanlarni agahlandurup, yéziliq hökümet üstidin erz qilishning hem yézidiki ehwalni chet'el radi'osigha xewer qilishning jinayet ikenlikini tekitlep, yézidiki herqandaq bir déhqanning béyjingda erz qiliwatqan dilmurat muslin'gha iqtisadiy jehettin yardem qilsa qattiq jazalinidighanliqini uqturghan.

Radi'omiz ziyaritini qobul qilghan déhqanlar yéziliq hökümet da'irilirining déhqanlargha qiliwatqan tehditi emeliyette, özlirining parixorluq qilmishining metbu'at orunliri arqiliq ashkarilinip ketkenliki seweblik boluwatqanliqini bildürüp, yerlik hökümet da'iriliri yézidiki parixor emeldarlargha chare körüp, mesilini adil bir terep qilghan'gha qeder déhqanlarning erzni dawamlashturidighanliqini hem dilmurat muslinni qollap uninggha dawamliq yardem qilidighanliqini bildürdi.

Radi'omiz igiligen bashqa uchurlardin melum bolushiche, kan yézisidiki déhqanlarning erzi netijiside, chapchal nahiyilik hökümet kan yézisigha intizam tekshürüsh ömiki ewetip, déhqanlar erz qilghan yéza kadirliri üstidin tekshürüsh élip barghan. Emma nahiyilik hökümet parixorluq qilmishliri toluq pakitliri bilen éniqlan'ghan wang shilung, déng yichang, polat, eziz exmet, ekrem, jéng xéngying, sadiqjan qatarliq yéza kadirlirigha héchqandaq chare körülmigen. Kan yézisigha qarashliq toqayliqni buzup sétiwétish weqeside déhqanlarning naraziliqi küchlük bolghan orman idarisining xadimi déng yichang, yer tewreshke chidamliq öy qurulushigha ajritilghan pulgha mes'ul yéziliq hökümettiki ekrem qatarliqlarni nahiyidiki bashqa idarilerge yötkiwétish, déhqanlargha toluqlima pul namida kélish menbesi éniq bolmighan pullarni bérish arqiliq mesilini hel qilishqa urun'ghan. Nahiyilik hökümetning mesilini bundaq hel qilishi déhqanlarning naraziliqini téximu qozghap, déhqanlarning yuqiri derijilik hökümet orunlirigha yéza kadirliri üstidin erz qilishigha seweb bolghan.