Уйғурлар берлиндики қазақистан вә хитай әлчиханилири алдида намайиш өткүзди

Әршидин исраилниң хитайға қайтуруп берилгәнликигә наразилиқ билдүрүш үчүн, 7-июн германийидики уйғурлар берлиндики қазақистан вә хитай әлчиханилири алдида намайиши өткүзди.
Ихтиярий мухбиримиз әкрәм
2011.06.07
ershidin-israil-305.jpg Қазақистандин хитайға қайтуруп берилгән әршидин исраил. Бу рәсимни әршидинниң достлири тәминлигән.
RFA

Мәлум болушичә, әршидин исраил 2009-йили 9-айда қазақистанға қечип чиқип, б д т ниң қазақистандики иш беҗириш орнидин сиясий панаһлиқ тилигән болуп, 5-айниң 31-күни қазақистан һөкүмити тәрипидин хитайға қайтуруп берилгән. Бу мунасивәт билән д у қ җиддий йиғин чақирип, чәтәлләрдики уйғурларниң наразилиқ паалийәтлири уюштурушини тәшәббус қилған.

Берлинға топланған уйғурлар “ қазақ-уйғур қериндаш! уйғурларни сатмаңлар! уйғурларни хитайларға қайтуруп бәрмәңлар! ” дегәндәк шоарларни товлиған.

Берлиндики қазақистан әлчиханиси алдида елип бериливатқан намайишниң йетәкчилиридин д у қ ниң муавин рәиси әсқәрҗан вә баш катипи долқун әйса әпәндиләр телефон зияритимизни қобул қилип, бу қетимқи намайиш тоғрисида нәқ мәйдандин мәлуматлар бәрди. Долқун әйса әпәнди бу намайишниң мәқсити тоғрилиқ тохтилип өтти. Долқун әйса әпәндиниң билдүрүшичә, 1999-йили қазақистан һөкүмити үч нәпәр уйғурни хитайға қайтуруп бәргәнлики үчүн қазақистан әлчиханиси алдида бир қетим намайиш өткүзгән болуп, бу қетимқи намайиш қазақистан әлчиханиси алдида өткүзүлгән иккинчи қетимлиқ намайиш болуп һесаблинидикән.

Қазақистан әлчиханиси хадимлири намайишчилар вәкиллирини қобул қилған болуп, д у қ муавин рәиси әсқәрҗан әпәнди бу хусуста мәлумат бәрди. Әсқәрҗан әпәнди қазақистан әлчилиригә уйғур-қазақ мунасивәтлирини яманлаштуридиған бундақ вәқәләрдин қазақистан һөкүмитиниң еһтият қилиши керәкликини, кәлгүсидә қазақистанниң қошниси хитай әмәс, бәлки уйғурлар болидиғанлиқини, қазақистан һөкүмитиниң һазирға қәдәр 50 нәпәр уйғурни хитайға қайтуруп берип, уйғурларниң көңлини қаттиқ зедә қилғанлиқини тәкитлигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.