Gérmaniye tashqi ishlar ministirliqi d u q rehberliri bilen söhbet élip bardi

D u q ning 2-öktebir küni bergen melumatigha asaslan'ghanda, 31-öktebir küni gérmaniye tashqi ishlar ministirliqi kishilik hoquq komitétining teklipi bilen d u q wekilliridin mu'awin re'is esqerjan we ijra'iye komitéti re'isi dolqun eysa ependiler gérmaniye paytexti bérlin'gha bérip, gérmaniye hökümet xadimliri bilen söhbet élip barghan.

Gérmaniye tashqi ishlar ministirliqi teripidin uyushturulghan bu qétimqi söhbetning meqsiti, 10-ayning 8-9-künliri gérmaniye bilen xitay wekilliri arisida ötküzülgen kishilik hoquq we démokratiyini ilgiri sürüsh söhbitining asasi mezmunidin d u q, tibet teshkilati, xelq'ara kechürüm teshkilati, kishilik hoquqni közitish teshkilati, xeter astidiki milletlerni qoghdash teshkilati qatarliq teshkilatlarning wekillirige melumat bérishtin ibaret bolghan.

Melumki, gérmaniye tashqi ishlar ministirliqi kishilik hoquq komitéti bilen xitay wekiller ömiki otturisida élip bérilghan 10-qétimliq kishilik hoquq we démokratiye söhbiti bashlinishtin ilgiri, d u q qatarliq xelq'araliq teshkilatlar gérmaniye hökümitige melumat yollap, xitay, Uyghur éli we tibettiki insan heqliri depsendichilikini pash qilghan idi. Bu qétim bérlinda ötküzülgen söhbetke tashqi ishlar ministirliqi kishilik hoquq komitétining mes'uli markus löning qatarliq yuqiri derijilik hökümet rehberliri qatnashqan. Markus löning ependi gérmaniye tashqi ishlar ministirliqi kishilik hoquq komitétining re'isi bolupla qalmay, belki xitay bilen ötküzülgen birqanche qétimliq söhbetning mes'uli idi.

Biz bu heqte tepsiliy melumat élish üchün d u q rehberliridin mu'awin re'is esqerjan we ijra'iye komitéti re'isi dolqun eysa ependiler bilen söhbet élip barduq.