Ғайиблар аилә-тавабиатиниң хитайниң 18-қурултийиға йәткүзмәкчи болған сөзлири

Бейҗиңда хитайниң 18-қурултийиға қатнишиватқан уйғур аптоном райони вәкилләр өмики бүгүн чүштин кейин иккинчи қетимлиқ айрим йиғинини ачқан.
Мухбиримиз шөһрәт һошур
2012-11-08
Share
patigul-ghulam-305.jpg Ғайиблардин имаммәмәт елиниң аниси патигүл ғулам.
RFA/Shohret Hoshur

Йиғинда дилнур әзиз исимлик вәкил хитай әмәлдарлиридин җов юңкаңға, уйғур райондики һәр милләт хәлқиниң бәхт-саадәт ичидә яшаватқанлиқини вә мәркизи һөкүмәттин мәмнун икәнликини билдүргән. Биз бүгүн үрүмчидики 5 ‏-июлдин кейин пәрзәнти ғайиб болуп кәткән бир дәрдмән анини зиярәт қилғинимизда, у мәзкур вәкилләрниң райондики хәлққә вәкиллик қилалмайдиғанлиқини ейтти вә өзиниң хитайниң 18-қурултийиға йәткүзмәкчи болған сөзлирини баян қилди.

Мәлум болушичә, аталмиш вәкилләр, бу йилму хитай даирилири тәйярлап бәргән материяллар билән йолға чиққан. Улар сәпәргә чиқишниң алдида җәмийәттә һечқандақ тәкшүрүш елип бармиған. Шуңа улар бүгүн ечилған иккинчи қетимлиқ йиғинида райондики нөвәттики реал вә җиддий мәсилиләр һәққидә қилчә тохталмиған. Әксичә, райондики уйғур хәлқиниң хитай мәркизи һөкүмитигә қарита наразилиқини бурмилап көрситип, хитай рәһбәрлиригә сахта салам йәткүзгән. Игилишимизчә, райондики нөвәттики әң җиддий мәсилиләрдин бири ғайиблар мәсилисидур. Ғайибларниң сани һазирға қәдәр толуқ кимликлири бойичә испатланғини 33 нәпәр; һөкүмәт сақчи башлиқлириниң еғизидин ашкариланғини 300 нәччә нәпәр; җәмийәттә тарқалған сөзләргә вә пәрәзләргә асасланғанда ғайибларниң сани миңдин төвән әмәс. Нөвәттә райондики хәлқ, болупму ғайибларниң аилә-тавабиатлири 18-қурултайда бу мәсилиниң оттуриға қоюлушини вә ғайиблар һәққидә ениқ бир учур берилишини күтмәктә.

Ғайиблардин имаммәмәт елиниң аниси патигүл ғулам, бүгүн бу мунасивәт билән зияритимизни қобул қилип, 18-қурултайға йәткүзмәкчи болған сөзлирини баян қилди. У сөзидә, нөвәттә районда нурғун кишиләрниң, 5-июлдин кейин ғайиб болған пәрзәнтлири вә җөрилириниң из-дерикини алалмай азаб тартиватқанлиқини, өзиниң бу хил кишиләрдин аз дегәндә 30 нәпирини тонуйдиғанлиқини, йәрлик даириләр вә сақчиларниң, бу аилиләргә ғайиблар һәққидә мәлумат бәрмәйла қалмастин; йәнә из-дерикини қилғанлиқи үчүн назарәт қилиниватқанлиқини, тәһдиткә учраватқанлиқини, һәтта җазаға учраватқанлиқини баян қилди. У райондики бәзи ахбарат органлириниң райондики хәлқтин, 18-қурултайға қарита тәклип-пикирлирини сориғанлиқини, зиярәт қилинғучиларниң болса, оқуштики балисиға оқуш пулини йетиштүрәлмәслики, истемал сәвийисигә уйғун мааш алалмаслиқ қатарлиқ районға нисбәтән аддий санилидиған мәсилиләрни оттуриға қойғанлиқи, өзлиригә охшаш зиянкәшликкә вә увалчилиққа учриған кишиләрниң зиярәт қилинмиғанлиқи, райондики асаслиқ вә җиддий мәсилиләрниң тилға елинмиғанлиқи үстидин шикайәт қилди.

Патигүл ғулам, ғайиблар мәсилисиниң райондики әң чоң вә җиддий мәсилә икәнликини баян қилип мундақ деди:
-Мениң әтрапимда баламниң әһвалини билидиған, көңүл бөлидиған йүздин артуқ адәм бар, уларниң мән билән учрашса биринчи болуп сорайдиғини: «балаңниң хәвирини һөкүмәт бәрдиму?» мән билидиған шу 30 нәччә кишиниңму аз дегәндә 100дин тонуши бар. Бу бүгүн шинҗаңниң һәммә йеридә дейилидиған, сорилидиған гәп. Қурултайда дейилишкә тегишлик буниңдинму җиддий, буниңдиму чоң иш бармиду?

Хитай президенти ху җинтав хитай 18-қурултийида ечилиш нутқи сөзлиди. 2012-Йили 8-ноябир, бейҗиң.
Хитай президенти ху җинтав хитай 18-қурултийида ечилиш нутқи сөзлиди. 2012-Йили 8-ноябир, бейҗиң.
AFP

Патигүл ғулам ғайиблар аилә-тавабиатлириниң дәрд-әләмлирини баян қилип мундақ деди:
-Бәк сорулуп кәттуқ, бәк қийнилип кәттуқ; нурғун нарәсидә балилар, дадилиридин айрилип кәткәчкә, ач-ялиңач йүрүп кәтти, оқушсиз қалди. Биз балимизни тепип бәр демидуқ, балимизни җазалима демидуқ, пәқәт өлүк яки тирикликини дәп бәр дедуқ. Мушуму артуқ тәләпму? мушу гепимиз үчүн солап қоюлдуқ, қамап қоюлдуқ. Гоңсәндаңниң адиллиқи қени?

Патигүл ғулам әгәр ғайиблар мәсилиси һәл болмиса, җәмийәттә һөкүмәткә қарита өч-адавәтниң техиму күчийидиғанлиқини, районда муқимлиқниң әмәлгә ешишиниң мумкин болмайдиғанлиқини әскәртип йәнә мундақ деди:
-‏Мән икки баламға «әгәр мән һаят вақтимда акаңларниң из-дерикини алалмай қалсақ, акаңларниң интиқамини елиңлар» дедим, әгәр имам баламниң учурини алалмай өлүп кәтсәм, шу сөзлиримни вәсийәт тәриқисидә қалдуруп кетимән. Бундақ вәсийәт қалдуридиғанлар бир патигүл әмәс, бүгүн қан йиғлаватқанларниң һәммиси шундақ дәйду.

Патигүл ғулам 4 күндин бери бирәр мухбирдин телефон келишини төт көзи билән күткәнликини, шуңа юқириқи сөзлирини ахбарат васитиси арқилиқ қурултайдикиләргә йәткүзүп қоюшимизни тәләп қилди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.