Ürümchidiki bir taksi shopuri: “Inimizni yoqutup qoyduq, hésabini allahgha tapshurduq”

5 - Iyldin kéyin iz - déreksiz ghayip bolghanlarning éniq sani Uyghur weziyitini közetküchilirining muhim diqqet nuqtiliridin biri؛ emma aridin 3 yérim yilgha yéqin waqit ütken bolsimu, bu san yenila éniqsizliqini dawamlashturmaqta.
Bu san bir xitay saqchi bashliqining éghizidin ashkarilan'ghini boyiche hésablan'ghanda 300 neperdin artuq؛ jem'iyette tarqilip yürgen toluqsiz uchur we perezlerdin qarighanda, bu san az dégende mingdin artuq.Radi'omizning hazirgha qeder toluq kimlik melumatliri bilen éniqlap chiqqini bolsa peqet 36 neper. Ürümchidiki bir taksi shopurining éghizidin chiqqan töwendiki sözler, ghayiplarning omumi sani heqqide jem'iyette tarqalghan perezlerning asassiz emeslikidin bisharet bermekte.

Ghayip imammemet elining anisi patigül ghulam, oghlining iz - dérikini sorash üchün ötken hepte saqchi organlirigha kétip bérip, özige qismetdash yene bir kishini uchratqan. Uchrighuchi bir taksi shopuri bolup, u patigul bilen söhbetlishish dawamida özining bir inisiningmu 5 - iyuldin kéyin ghayip bolup ketkenlikini, emma inisini izdimeywatqanliqini éytqan. Buninggha heyran bolghan patigul ehwalni inchikilep sorighanda, özining atush shoruqtin ikenlikini bildürgen shopur, inisi we özining ismini dep bérishni ret qilghan we “Biz bu ishni sürüshte qilishni allahgha tapshurduq” dégen. Ikkisi arisidiki söhbetning tepsilatini programimizning töwendiki ulinishtiki awaz xatiridin anglighayisiler.

Hörmetlik radi'o anglighuchilar, ghayiplardin eysajan emetning anisi tursun'gül xanimmu, qeshqerde nurghun kishilerning charisizliqtin ghayip balilirining teqdirini allahgha tapshurüp, weqege süküt qiliwatqanliqini éytqan. Ghayip nebijan elining dadisimu, xoten qariqashning özidila, ghayiplar sanining 200din ashidighanliqini bayan qilghan. Xitay hökümiti mezkur sanni néme üchün ta hazirghiche yoshuridu? néme üchün ghayiplar a'ilisige ularning hayat - mamatliqi heqqide melumat bermeydu? mana mushu so'algha jawab tépish üchün, dunya Uyghur qurultiyi ikki ayning aldida doklat hazirlap, 100din artuq dölet we teshkilatqa yollighan we ularni mesilini sürüshte qilishqa chaqirip yardem sorighan. Nöwette dunya Uyghur qurultiyi ene shu dölet we teshkilatlardin mesilige jawab kütmekte.