Ghuljidiki yéza toluq ottura mektep sinipliri buyruq bilen taqalmaqchi (1)

Uyghur élining xoten wilayitidiki melum bir qosh - til mektipining oqughuchiliri.

Ghulja shehiridiki Uyghurlar zich olturaqlashqan yézilardin penjim yéziliq toluq ottura mektep, bayanday yéziliq toluq ottura mektep, dadamtu toluq ottura mektep, yéngiyer yéziliq toluq ottura mektep, toghraq yéziliq toluq ottura mektep, képekyüzi yéziliq toluq ottura mektep qatarliq 6 ottura mektep 2007 - yili 9 - ayda buyruq chüshürülüp toluq ottura siniplirini taqash qarar qilin'ghan.

Emma Uyghurlar nisbeten zich olturaqlashqan yézilardiki oqughuchilar we ata - anilarning shundaqla oqutquchilarning bu qarargha nisbeten naraziliqi nisbeten küchlük bolup, radi'omiz Uyghur bölümining ziyaritini qobul qilghan penjim yézisidiki ata - anilar pénsiyige chiqqan oqutquchilar we yéziliq ottura mektepning bir qisim oqutquchiliri we mektep mudiri qatarliqlar bu heqte öz qarashlirini bayan qildi.

Penjim yézisidiki péshqedem ma'aripchi, pénsiyige chiqqan oqutquchi mexpiret xanim az kem yüz yilliq tarixqa ige bu ottura mektepning toluq ottura sinipining taqilishi eslidinla iqtisadi kirimi töwen bolghan déhqanlarning balilirini oqutush pursitidin mehrum qilghanliqini bayan qildi.

Penjim ottura mektipining hazirqi mektep mudiri dilmurat ezim ghulja sheherlik hökümetning, Uyghur aptonom rayoni ma'arip nazaritining mekteplerni merkezlik bashqurush siyasitini emeliyleshtürüsh üchün penjim ottura mektepning toluq ottura siniplirining emeldin qaldurulghanliqini bayan qildi.

Penjim ottura mektipining oqutquchiliridin qurban'ay we exmetjanlar, mektepning toluq ottura siniplirining taqilishining bu yéza balilirini bilim élish pursitidin mehrum qilghanliqini bayan qilip ötti.

Penjim yézisidiki ata - anilardin yaqupjan ependi özining 2 oghlining oqush pursitidin mehrum qalghanliqini, balilirining kelgüsi istiqbalidin ensirewatqanliqini bayan qildi.

Oqush pursitidin mehrum qalghan perhat özige oxshash nurghunlighan oqughuchilarning küchlük oqush arzusi bolsimu, emma iqtisadi shara'it yar bermigenliki üchün yiraqtiki sheher mekteplirige baralmighanliqi bayan qilip ötti.

Sheherlik hökümetning déhqanlarning küchlük telipige qulaq salmighanliqini bayan qilghan yaqupjan ependi ata - anilar we balilarning yürek sadalirini radi'o dolqunliri arqiliq munasiwetlik orunlargha yetküzüp qoyushimizni telep qildi.

Yuqiridiki awaz ulinishidin, xitay hökümitining ghuljidiki yéza mekteplirining toluq ottura siniplirini taqash qararigha nispeten xelqning naraziliq inkaslirining tepsilatini anglaysiler.