Mehmut qeshqiri zéhin sinash musabiqisi ötküzüldi

 Jümlidin 6 - ayning 15 - küni, d u q bash shitabi we yawrupa sherqiy türkistan birliki teshkilatining orunlashturushi bilen, gérmaniyining myunxén shehride "mehmut qeshqiri zéhin sinash musabiqisi" ötküzüldi. Bu musabiqige 7 yashtin 14 yashqiche bolghan köp sandiki Uyghur ösmürliri we ata - anilar ishtirak qildi.

Musabiqe bashlinishtin burun, büyük alim mehmud qeshqirining hayati, ijadiy pa'aliyetliri shundaqla uning alemshumul esiri "türkiy tillar diwani" tonushturulup ötüldi. Bu pa'aliyetke yétekchilik qilghan d u q bash katipi, yawrupa sherqiy türkistan birliki teshkilatining re'isi dolqun eysa ependi, bu pa'aliyetning Uyghur ösmürliri qelbide zor hayajan qozghighanliqini tilgha aldi.

Xitay hökümiti Uyghurlar üstidin medeniyet qirghinchiliqini üzlüksiz dawam qiliwatidu dep qariliwatqan bu künlerde, chet'ellerdiki Uyghur ösmürlirige qarita küchlük milliy terbiye élip bérishning zörürlikini tekitligen yawrupa sherqiy türkistan birliki teshkilatining mu'awin re'isi tursun ependi, bu xildiki pa'aliyetlerning ehmiyiti heqqide öz qarashlirini otturigha qoyup ötti.

D u q ning melumatlirigha asaslan'ghanda, gérmaniye Uyghurliri 2005 - yili qurulghan "aliptékin telim - terbiye merkizi"ni yadro qilghan halda, gérmaniyidiki Uyghur yash - ösmürlirige qarita milliy terbiyini qanat yaydurghan bolup, Uyghur tili, medeniyiti, tarixi, jughrapiyisi we islam dini bilimliri bilen kéyinki ewladlarni terbiyileshke köngül bölüp kelgen. Ewladlarni milliy roh, milliy irade we milliy örp - adet bilen yétildürüshni muhim mejburiyetliri qatarigha qoyghan hem buning belgilik netijilirini körgen.