Söhbetke dunya Uyghur qurultiyining yawropadiki alaqichisi memet toxti ependi we gollandiye sherqiy türkistan Uyghur birliki teshkilatining rehberliridiki munasiwetlik xadimlar qatnashti.
Pétir langghé ependining telipige bina'en, gollandiye tashqi ishlar ministirliqigha xitayda Uyghurlargha yürgüzülüwatqan naheq siyasetler, Uyghur qizlirining ichkiri ölkilerge mejburi yötkilishi, Uyghur ziyalirining ishsiz qilishi, naheq türmilerde yétishi we ölümge höküm qilinishliridin tartip, Uyghur torbet qurghuchilirining échinishliq qismetlirigiche türlük melumatlargha qoshup, chet'ellerde, jümlidin gollandiyide turuwatqan panahliq tiligüchi Uyghurlarning xeterlik teqdiri we iqtisadi tölem jazasigha buyrulghan Uyghurlarning emeliy qiyinchiliqliri qatarliq köp sahelerde teyyarlan'ghan kishilik hoquq we kishilik erkinlikke alaqidar doklatlar sunuldi.
Tashqi ishlar ministirliqidiki pétir ependi: "bügünki söhbitimiz nahayiti yaxshi boldi. Yéterlik matériyallargha érishtuq. Menche meyli gollandiye hökümiti bolsun, yaki yawropa parlaménti bolsun, hemmimiz mana mushundaq delillik matériyallar we yüz turane söhbetler arqiliq, Uyghurlar mesilini téximu yaxshi bileleymiz hem junggo bilen söhbetleshken chaghlirimizda ünümlük paydilinalaymiz." Dédi.
Memet toxti ependi söhbettin kütken ümidlirini xulasilep: "gollandiye hökümitining xitaydiki kishilik hoquq mesilisi heqqide teyyarliniwatqan doklatida Uyghurlar xili salmaqni igileydu." Dédi.
