Gollandiyide yashawatqan Uyghurlar qurban héytta héyt petisi pa'aliyitini qanat yaydurdi

Héyt petisi islam dinining rohigha uyghun asasta özleshtürülüp milletning örp-adetlirige singip ketken ésil en'ene bolup, uningda bir toplum we jama'etning barliq yuqiri-töwen ezaliri bir-biri bilen öz ‏- ara hemdastixan bolidu. Uyghurlar özleshtürüp dawam qilip kéliwatqan héyt petisi baylar, ottura we töwen tebiqidiki barliq jama'et ezalirining hemmisining a'ilisini héytliq petichilerning berikitidin behrimen qilidighan we du'aliridin nesiwidar qilidighan ibadet pezilitige xas emellerge tolghan pa'aliyettur. Shuning üchün u héyt künliridiki eng menilik pa'aliyetler qataridin hésablinip kelmekte.Muhajérette yashawatqan Uyghurlarmu mezkur pa'aliyetning qimmiti we ehmiyitini tonup yétip, özliri yashawatqan dölet, sheher we rayonlardiki wetendashlirining a'ililirige petilep bérip dostluq, qérindashliq we wetendashliq méhrilirini chungqurlashturmaqta.

Gollandiyide yashawatqan Uyghurlar bu yilqi roza héyt bayrimi pa'aliyitige héyt petisi qilishni özleshtürüp köp xushallinarliq netéjilerge érishkendin kéyin, qurban héytliq bayram pa'aliyetliridimu héyt petisi pa'aliyiti qanat yaydurdi.Gollandiyining Uyghurlar köprek olturaqlashqan  améstirdam, kastirkom, xowda, ötréxt, rottérdam qatarliq rayonliridiki Uyghurlar öz-ara héytliq petilesh pa'aliyitini emeliyleshtürüshte aktipliq bilen rol oynap kelmekte.

Ziyaritimizni qobul qilghan ötrixt tewelikidiki petichilerning wekili abdurahman qarim pa'aliyettiki tesiratlirini bayan qilip, héyt petisining ehmiyiti we ikki dunyaliq qimmiti heqqide toxtaldi.