Rusiye hamiyliqidiki chéchen parlaménti chéchen partizanlarning hujumigha uchridi

Rusiye fédératsiyisining qaniti astidiki chéchen parlaménti, tünügün etigen bir guruppa chéchen partizanlirining hujumigha uchrighan. Hujumning jeryani we hujumda ölgen we yarilan'ghanlarning sani heqqide oxshimighan melumatlar mewjut.
Muxbirimiz shohret hoshur
2010-10-20
Share
chechen-terror-urush-305 Chéchen urushidin bir körünüsh.
AFP Photo

Emma, hujumning uzundin béri rayonda muqimliqni eslige keltürgenlikini bayan qilip kéliwatqan rusiye we uning himayisidiki chéchen jumhuriyet hökümitige bérilgen éghir bir zerbe bolghanliqi xelq'araliq xewer we analizlarning ortaq nuqtisi.

Tünügün rusiye himayisi astidiki chéchen parlaménti bir guruppa chéchen partizanlarning hujumigha uchrighan. Hujumda aldi bilen bir neper partizan parlaméntqa basturup kirip özini partlatqan, uning arqisidin 3 neper partizan binagha basturup kirip, parlamént ezalirini görüge almaqchi bolghan. Bu chaghda parlamént binasidiki muhapizetchiler 3 neper partizan'gha qarshi hujumgha ötken.

Chéchen prézidénti qadirofning axbaratqa bildürüshiche, hujumda peqet 2 neper saqchi ölgen, 10 nechche kishi yarilan'ghan. 4 Neper hujumchi parlamént muhapizetchiliri teripidin öltürülgen. Ikki terep arisidiki toqunush 15 minut dawam qilghan. Emma, weqening bashqa shahidlirining xelq'ara axbaratlargha ashkarilishiche, weqede rus terepdari küchlerdin az dégende 6 kishi ölgen we 17 kishi yarilan'ghan, toqunush 2 sa'et dawam qilghan.

Weqe seyshenbe küni etigende sa'et 8 bilen 10 arisida yüz bergen. Hazirgha qeder weqening jawabkarliqini üstige alghanlar chiqmighan. Qadirof weqening jawabkari süpitide muhajirettiki chéchen pa'aliyetchiliridin exmet zekayéfni körsetken. Zekayéf bolsa, weqe bilen alaqisi yoqluqini bildürüp jawabkarliqini ret qilghan.

Zekayéf aslan masxadow dewridiki bash ministir bolup, chéchenistan qayta ishghal qilin'ghandin kéyin, chéchenistandin ayrilip, chéchen dawasini muhajirette dawamlashturuwatqan pa'aliyetchilerdin biri. Weziyetni közetküchiler, hujumchilarning nöwettiki chéchen qoralliq guruppiliridin dokku omerofning ademliri yaki omerofdin yéqinda ayrilip chiqqan, yéngi bir guruppa küchler ikenlikini texmin qilmaqta.
 
Fransiye axbarat agéntliqining bu heqtiki xewiride, chéchenistanning muqimliqi rus merkizi hökümitining kontrolluqidin chiqip ketti dep yézilghan. Bu heqtiki yene bir analizda, isyanchilar chéchenistanning igisining kim ikenlikini körsitip qoydi déyilgen. Chéchen partizanlar bir qanche ayning aldida moskwadiki bir poyiz istansini partlitip 40 nechche rusiyilikning ölüshini keltürüp chiqarghan. Partizanlar yene ötken ayda ramizan qadirofning mehelliside hujum élip barghan. Hujumda 19 kishi ölgen.
  
1999 ‏- Yili öktebirde, chéchenistan qayta ishghal qilin'ghandin kéyin, rusiye hökümiti chéchenistan jumhuriyet hökümiti namida hakimiyet orgini tesis qilghan we rusiye armiyisining nazariti we rusiye da'irilirining uyushturushi bilen saylam élip barghan.

Saylamda, nöwettiki chéchen prézidénti ramizon qadirof hakimiyet béshigha chiqqan. Shu kündin béri rusiye we rusiye terepdarliri ramizan qadirofni chéchen xelqining wekili dep tonisa, uzundin béri musteqilliq kürishi élip bériwatqan chéchen partizanlar we ularning terepdarliri, chéchen hökümitini qorchaq hakimiyet, prézidénti qadirofni bolsa qorchaq prézidént dep qarap kelmekte؛ shundaqla yene, milliy xa'in dep eyibleb we eskeriy heriketliride ularni hujum nishani qilip békitmekte.

Yuqiridiki awaz ulinishidin, bu heqtiki melumatimizning tepsilatini anglaysiler.

 
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.