Rabiye qadir xanim amérika dölet mejliside ispatliq bérip, amérikini xitaygha qarita qattiq siyaset qollinishqa chaqirdi

Ispat bérish yighinigha Uyghur milliy herikiti rehbiri rabiye qadir xanim we Uyghur amérika birleshmisi re'isi alim séyitof ependiler qatnashti. Rabiye qadir xanim, Uyghurlar duch kéliwatqan kishilik hoquq, diniy erkinlik, Uyghurlarning qalaymiqan tutqun we basturushqa uchrash qatarliq jiddiy mesililer heqqide guwahliq bérish bilen teng, amérika hökümitini kishilik hoquq söhbitide hemde tashqi siyasitide xitaygha qarita qattiq pozitsiye tutushqa chaqirdi. Yighin'gha qatnashqan dölet mejlis ezaliri, amérikining xitaygha qarita 12 yildin buyan kishilik hoquqni ilgiri sürüsh meqsitide qollinip kelgen erkin soda siyasitining héchqandaq ünüm bermigenliki heqqide ortaq qarashqa kelgen.

Amérika dölet mejliside échilghan guwahliq bérish yighini ayaghlashqandin kéyin, yighinda Uyghurlar uchrawatqan kishilik hoquq depsendichilikliri, ten jazasi we qanunsiz tutqun qilinish hemde iz-déreksiz yoqap kétish mesililiri heqqide guwahliq bergen dunya Uyghur qurultiyi re'isi rabiye qadir xanimni ziyaret qilduq, rabiye qadir xanim, özining nuqtiliq qandaq mesililerni otturigha qoyghanliqi we némilerdin guwahliq bergenliki shundaqla amérika dölet mejlisi tashqi ishlar komitétigha qoyghan telepliri heqqide tepsiliy toxtaldi.

Biz yene, yighin'gha qatnashqan Uyghur wekillerdin rabiye qadir xanimning guwahliq nutqigha terjimanliq qilghan, Uyghur amérika birleshmisining re'isi alim séyit ependini ziyaret qilip, yighindiki muhim nuqtilar hemde mezkur guwahliq bérish yighinining ehmiyiti heqqidiki köz qarashlirini soriduq. Alim séyitof ependi bu qétimqi guwahliq bérish yighinining ilgiriki qétimqilirigha oxshimaydighan bir muhim teripining, yighin'gha qatnashqan amérika dölet mejlisi ezalirining “Amérikining 12 yildin buyan, xitayda démokratiyini hemde kishilik hoquqni ilgiri sürüsh meqsitide qollan'ghan erkin soda siyasiti yaxshi netije bermidi” dégen qarashqa kelgenlikini alahide tekitlep ötti.

Yuqiridiki awaz ulinishidin, mezkur guwahliq bérish yighinidiki muhim nuqtilar heqqide muxbirimizning rabiye qadir xanim we alim séyitof ependiler bilen élip barghan söhbitini anglighaysiler.