Йәмәнләр һакимийәтни тинчлиқ билән йөткәш үчүн тиришмақта

Йәмәндә рәис абдулла салиһ һакимийитигә қарши намайиш башланғанға бир қанчә ай болуп қалған болсиму, йәмәндики намайишчиларниң тәлипи әмәлгә ешип болалмиған.
Ихтиярий мухбиримиз өмәрҗан
2011.06.23
yemen-namayish-salih-305.jpg Йәмән намайишчилири рәиси ели абдулла салиһниң сәудидин қайтип келишигә қаршилиқ билдүрүп намайиш қилмақта. 2011-Йили 6-июн.
AFP

Бүгүнки күнләрдә йәмәнликләр һакимийәтни тинчлиқ билән ели абдулла салиһниң қолидин елиш ишини музакирә қилмақта икән.

Тәһлилчиләргә көрә, йәмән хәлқиниң көп санлиқи пеқирлиқ ичидә һаят кәчүридикән, йәмәнниң тәбиий байлиқи вә аз тола пән-техникиси бар туруп хәлқниң турмушиниң һазирғичә яхшилинип кетәлмигәнлики пәқәт 34 йилдин бири һакимийәт үстидә болуп кәлгән ели абдулла салиһниң нәтиҗә қазиналмиғанлиқи сәвәбидин икән.

Тунис билән мисирда намайиш партлиши билән тәңла йәмәндә омумйүзлүк хәлқ намайиши көтүрүлгән болсиму, йәмәндики асаслиқ күчләр йәмән рәиси ели абдулла салиһниң туғқанлириниң қол астида болғанлиқидин, иш бунчилик узунға созулуп кәткән икән. Чүнки йәмәнниң сақчи оргини, дөләт мәхпийәтлик идариси вә армийә қоманданлиқиниң һәммиси йәмән рәисниң әң йеқин туғқанлириниң қолида икән.

Сәуди әрәбистанида чиқидиған “әл билад” гезитиниң 2011-йили 23-июн күнидики хәвиригә асасланғанда, йәмән рәиси һазир сәуди әрәбистаниниң пайтәхти рияд шәһиридики мәхсус дохтурханида давалинишини давам қилдуруватқан болуп, у пат арида йәмәнгә қайтмайдикән.

Йәнә башқа хәвәрләргә көрә, һазир ели абдулла салиһниң йәмәндики ишлар билән алақиси үзүлгән, һәтта йәмәнниң ишлири пүтүнләй униң қолидин чиқип кәткән, пәқәт ониң яндашлирила һакимийәтни сақлап турмақта икән.

Йәмәнләр һакимийәтни тинчлиқ йоли билән йөткәш йолида

Мисирниң “әл еһрам” гезитиниң 2011-йили 23-июн күнидики хәвиригә көрә, һазир йәмәндики барлиқ сиясий күчләр бир ариға келип, йәмән һакимийитини хәлқниң қолиға тинчлиқ йоли билән өткүзүшниң музакирисини қилмақта икән.

Йәмән сиясий күчлири һазирқи һакимийәтниң адәмлириниму қатнаштурған һалда чоң йиғин чақирған. Йиғинда улар ели абдулла салиһниң мундин кейин, һакимийәт тутушиниң мумкин әмәсликини, шуңа һазирдин башлап униң орниға олтуридиған шәхсни тәйинләш керәкликини оттуриға қойған.

Йәмән рәиси қайтип кәлмәйду

Йәмән сиясийлардин абдурәқиб мәнсур мисирниң қаһирә шәһиридин мисир телевизийисигә бәргән баянатида мундақ деди: йәмәндики асаслиқ күч йәмән армийиси болуп, армийә 1962-йилидин бери йәмәнгә һөкүмранлиқ қилип кәлмәктә.

2011-Йили 11-феврал күни йәмәндә яшларниң тинчлиқ намайиши башланғандин бири армийә сепидин намайишчиларға қошулуп келиватқанларниң сани аз әмәс. Болупму 21-феврал күни намайишчилар тәрипигә өткән һәрбий қоманданлар көп.

Һазирғичә бу қошулуш давам қилмақта. Демәк, армийә намайишчиларни чоқум қоллайду, улар илгири я кейин болуп чоқум намайишчиларға қошулиду. Һазир ели абдулла салиһниң туғқанлири билән яндашлиридин башқа һәммиси хәлқ тәрәпкә өтүп болған. Әмди ели абдулла салиһниң әһвалиға кәлсәк, әпсуски, 3-июн күни ели абдулла салиһ һуҗумға учраш сәвәблик ярилинип, йәмәндин чиқип кәткинидин бери униң әһвалини 25 милйон йәмән хәлқиниң һечқайсиси билмәйду. Уни яшаватиду, йеқинда қайтип келиду, дегән хәвәрләрнила аңлаватиду.

Һазирғичә йәмән рәисиниң сақлиқ әһвали тоғрисида бирәр баянат елан қилинмиған. Һәтта рәисниң сақлиқини испатлап униң авазиму аңлитилмиған. Буниңдин мәлумки, йәмән рәиси мундин кейин йәмәнгә кәлгән тәқдирдиму, униң һакимийәт тутқудәк маҗали йоқ. Шуңа йәмәнләр һакимийәтни тинчлиқ йоли билән тапшуруп елиш үчүн йәмәндә музакирисини давам қилдурмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.