Sabiq xitay kompartiyisining rehbiri xu'a goféng öldi

Maw zédong ölgendin kéyin, bir mezgil uning izbasari süpitide xitayni idare qilghan xu'a goféng 8 - ayning 20 - küni béyjingda 87 yéshida nepisidin toxtidi. Xitay kompartiyisining yéqinqi 40 yilliq tarixidiki sirliq shexs hésablan'ghan xu'a goféngning ölümi tézdin dunya metbu'atlirining muhim xewirige aylandi.
Muxbirimiz ümidwar xewiri
2008-08-20
Share

 Xitayning hökümitining metbu'ati hésablinidighan shinxu'a agéntliqi xu'a goféngning ölümi heqqide nahayiti qisqa bir xewer élan qilghan bolup, xewerde uninggha " junggo kompartiyisining ilghar ezasi, uzun mezgil sinaqtin ötken sadiq kommunizm jengchisi, prolétariyat inqilabchisi, partiye we döletning muhim rehbiri wezipisini aqturghan" dégen bahalar bérilgen. Biraq, xewerde uning hayat pa'aliyiti we uninggha qandaq derijide mu'amile qilinidighanliqi hem bashqilar körsitilmigen. Shinxu'aning bu xewiride xu'a gofénggha bérilgen baha ilgiri ölgen xitay kompartiyisining yuqiri derijilik rehbiri kadirlirining köpinchisige bérilgen " ulugh kommunizm jengchisi "dégen bahalardin roshen perqliqqe ige.

Déng shawping hakimiyetke chiqqandin tartip taki hazirghiche ismi metbu'atlardin ghayip bolghan we yaki kemdin - kem tilgha élin'ghan xu'a goféngning teqdiri we kéyinki hayat musapiliri kishiler üchün sirliq hem qiziqarliq témigha aylan'ghan idi.

Xu'a goféng kim?

Xu'a goféngning esli ismi suju bolup, 1921 - yili tughulghan. U 1938 - yili yapon'gha qarshi pa'aliyetlerge qatnashqandin kéyin, yapon'gha qarshi bir teshkilatning ismini özige isim qilip qollinip, özini xu'a goféng dep atighan. Xu'a goféng 1949 - yilidin kéyin mawzédungning yurti xunen ölkisining xi'angti'en nahiyilik partiye komitétining sékritarliqigha teyinlen'gen. Uzun ötmey uning derijisi peydin - pey ösüp, xunen ölkilik partkomning birinchi sékritari, jama'et xewpsizlik ministirlikining ministiri, mu'awin bash ministir hemde 1976 - yili jow énley ölgendin kéyin, bash ministiriliq wezipilirini aqturghan.

Xu'a goféng qandaq izbasarliqqa teyinlendi ?

Xu'a goféngning béyjinggha yötkep kélinip, döletning yuqiri derijilik rehberler qatlimigha kirgüzülüshi hetta uning izbasarliqqa teyinlinishide biwasite mawzédungning roli barliqi éytilidu. 1976 - Yili maw ölüshtin ilgiri uni özining izbasarliqigha qoyghan bolup, eyni waqittiki xitay kompartiyisining yuqiri qatlimidiki hoquq kürishini nezerge alghan maw zédong xu'a gofénggha " siz ish bashqursingiz, men xatirjem bolimen" dégen iken. Kéyin, bu söz mawning axirqi wesiyiti süpitide metbu'atlarda keng teshwiq qilinip, xu'a goféngning qanuniy ornigha kapaletlik qilin'ghan idi. Xu'a goféng 1976 - yili maw zédong ölgendin kéyin yé jenying, li shennen qatarliqlarning yardimi bilen maw zédongning ayali jyangching qatarliqlarning bashchiliqidiki töt kishilik guruh dep atalghan, mawning ölümidin kéyin pütün xitayni idare qilish hoquqini qolgha almaqchi bolghan guruppini yoqatti hemde uning xitayning mawdin kéyinki eng aliy rehbirilik orni tiklendi we qoghdaldi.

Xu'a goféng heqqidiki uchur we melumatlargha asaslan'ghanda, u 1981 - yili déng shawping bashliq islahatchilar guruppisi teripidin hakimiyettin qaldurulghan bolup, döletning rehberlik hoquqi déng shawping teripidin igilendi. Xu'a goféngning mawzédungning idiyisi, siyasiy yönilishliri we körsetmiliridin yanmasliq siyasiti islahatchilar teripidin tenqid qilin'ghan bolup, eyni waqitta uninggha " chektin ashqan solchilliq xataliqi" artilghan idi.

Xu'a goféng mawning balisimu?

Xu'a goféngning kélip chiqishi hem uning addiy bir yash kadirdin shunche téz ösüp, maw zédong bilen birge küresh qilghan xitay kompartiyisining bashqa rehberliridin yuqiri orun'gha chiqishi we axirida döletning aliy rehbirige aylinishi heqqide xitay kompartiyisining tarixini tetqiq qilghuchilar arisida türlük gumaniy köz qarashlar, qiyaslar hem uchurlar mewjut. Bundaq uchurlarning biri xu goféngni maw zédongning toy qilmighan ayalidin tapqan balisi dep qarashtur. Bundaq uchurlar yéqinqi bir qanche yil ichide köpiyip qalghan. Chet'ellerde tarqitilidighan xitay tilidiki eng chong tor betlerning biri "Boxun.com" Tor bétide élan qilin'ghan " xu'a goféng maw zédongning chong oghlimu? " mawzuluq maqale tipiklikke ige. Ismi namelum aptor teripidin yézilghan bu maqalide xu'a goféngning eslide maw zédongning 1920 - 1921 - yili xunenning changsha shehiridiki kommunizmchilar guruppisini qurghan waqitlirida yaw famililik bir qiz bilen tonushup, uningdin tapqan balisi ikenliki, yaw famililik bu qizning ikki yildin kéyin ölüp ketkenliki, mawning izchil türde uni öz yéqinlirigha hawale qilip béqish we halidin xewer élishqa buyrughanliqi yézilghan.

Mezkur maqalide xu'a goféngning maw zédongning balisi ikenlikini ispatlaydighan bir qatar deliller körsitilgen bolup, maqalide éytilishiche, hetta xu'a goféng 1980 - yili merkiziy komitéttin özining mawning balisi ikenlikini mu'eyyenleshtürüp, maw familisini qollinishni telep qilghan bolsimu, biraq merkiziy komitét teripidin ret qilin'ghan. U yéqinqi yillardimu shundaq telepni otturigha qoyghanda, oxshashla ret qilinishqa duch kelgen bolup, peqet uning xunen shangtyen'ge bérip yashishi testiqlan'ghan iken. Lékin, xu'a goféng heqqidiki bu uchurlarning emeliyetke uyghun yaki uyghun emesliki heqqide ispat téxi élan qilin'ghini yoq.

Xu'a goféngning merkiziy komitétning ezaliq salahiyiti saqlinip qalghan bolup, uning bu salahiyiti 2002 - yili emeldin qaldurulghan bolsimu, biraq u 2007 - yilidiki 17 - qurultaygha wekili süpitide qatnashqan. Bu, xu'a goféngning axirqi qétim resmiy sorunda körünishi bolup qalghan idi. Shundaq qilip, xitay kompartiyisining dahiysi maw zédongning biwasite terbiyiligen hem békitken shagirti we iz basari, " dana dahiy" dep teriplen'gen sabiq xitay aliy rehbiri xu'a goféng xitayning murekkep sulaliler tarix betlirige kirip ketti.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet