Shwétsiyidiki “Ikki jumhuriyet” ni tebriklesh pa'aliyitide alte türlük muhim mesile tekitlendi

Bu qétimqi xatirilesh pa'aliyiti shwétsiye Uyghur ma'arip uyushmisining teshkillishi bilen stokholmning shista rayonidiki medeniyet merkizide ötküzüldi. Pa'aliyetke stokholmda yashighuchi Uyghur jama'etchiliki hemde shwétsiyining herqaysi jayliridin kelgen Uyghur wekilliri qatnashti.

Xatirilesh pa'aliyitide 1933-yili qeshqerde qurulghan “Sherqiy türkistan islam jumhuriyiti” ning meydan'gha kélishidiki tarixiy shara'it we bu jumhuriyetning yiqilishigha seweb bolghan amillar heqqide léksiye sözlendi. Axirida shwétsiye Uyghur ma'arip uyushmisining re'isi nijat turghun nöwette muhajirettiki Uyghur jama'etchiliki üchün zörür boluwatqan alte türlük muhim mesilini otturigha qoydi.

U sözide muhajirettiki Uyghur jama'etchilikining weten dawasi élip bérishta aldi bilen ortaq idé'ologiye we pikirge kélishining zörürlükini tekitlidi. Shuning bilen birge yene muhajirettiki Uyghur teshkilatlirining öz-ara hemkarliqi hemde ish birliki élip bérishining nöwette sel qarashqa bolmaydighan muhim mesile ikenlikini anglatti. Muhajirette yashawatqan Uyghurlarning özliri turushluq ellerde jama'etlishishi hemde ijtima'iy topluq halitide yashishining chet'ellerdiki milliy mewjutluq we milliy dewa ishlirida muhim ehmiyetke ige ikenlikimu otturigha qoydi. Nijat turghun tötinchi muhim mesile süpitide muhajirette tughulghan we yétilip chong bolghan yéngi ewladlarning kélechekte Uyghur dewasini qoligha élishi hemde dawamlashturushining texirsizlikini körsetti. Undin bashqa, u yene xelq'ara weziyettin paydilinish we uni Uyghur milliy dewa ishliri üchün ünümlük xizmet qildurush nöwettiki Uyghur teshkilatlirining her waqit diqqet neziride bolushi kérek dep tekitlidi. Axirida u muhajirette yashighuchi her bir wijdan igilirining özliri mumkin bolghan imkaniyetlerdin paydilinip weten dewasi üchün teshwiqat jehettin küch qoshushining zörürlükini eskertip ötti.

Tepsilatini yuqiridiki awaz ulinishtin anglighaysiz.