Iran armiyisi bilen liwandiki hizbullachilarning süriyidiki jinayetliri

Uzundin béri ereb döletlirining teshwiqat wasitiliride süriye xelqining namayishini basturushta iranning qoli bar deydighan xewerler tarqilip yüretti. Emma kishiler ereb-iran munasiwitining yaxshi emeslikini közde tutqanliqtin, bu türdiki xewerlerge anche köp ehmiyet bérip ketmigendek körünetti. Emma iran armiyisi bilen liwandiki hizbullachilarning süriyidiki jinayetliri delil-pakitliri bilen otturigha qoyulghandin kéyin, ereb we islam dunyasida xéli küchlük inkaslar bolmaqta.

Kuweytte chiqidighan “El mujteme” zhurnilining 2012-yili 4-may künidiki sanida, “Iran armiyisi bilen liwandiki hizbullachilarning süriyiliklerni öltürüsh jinayetliri otturigha chiqti” dégen témida uzun bir maqale élan qilin'ghan bolup, maqalide, iran armiyisining süriye re'isi beshshar el esedning telipige asasen süriye térritoriyisige kirip, liwandiki hizbullachilar bilen birlikte süriye xelqini öltürüsh, namayishchilarni basturush, namayishchilargha oq chiqirishni ret qilghan süriye eskerlirini étish qatarliq jinayetlerni ishligenliki resimler, shexslerni isimliri we barliq delil-ispatliri bilen pash qilin'ghan.
Maqalide éytilishiche, süriyige kirgen iran armiyisige süriye dölet mexpiyetlik idarisi teripidin mexsus kinishka béjirip bérilgen. Maqalide kinishkining süriti bérilgen bolup, kinishkida “Mezkur shexs süriye we liwanning her qaysi sheherlirige erkin kireleydu” dep yézilghan we tamghining astigha “Süriye ereb jumhuriyiti dölet mexpiyetlik idarisining mudiri” dep yézilip imza qoyulghan.

Ilgirimu birleshken döletler teshkilati bu ehwalni sezgen

Maqalide yene mundaq dep yézilghan “Birleshken döletler teshkilatining 2011-yili 6-awghust künidiki doklatida, iran armiyisi bilen liwandiki hizbullachilarning namayishchilargha qaritip oq chiqirishni ret qilghan süriye eskerlirini étip tashlighanliqini éytqan idi. Yene 2011-yili 13-awghust küni liwan teshwiqat wasitiliride, süriye dölet mexpiyetliki idarisining mexsus kinishkisini kötürüwalghan qoralliq bir qanche guruppa iranliqning liwan chégrasida tutulghanliqi élan qilin'ghan idi. Mundin bashqa süriyide namayishchilar teripidin qurulghan milliy komitétning öz waqtida élan qilghan xewerliridimu qoralliq iranliqlarning hizbullachilar bilen birlikte namayishchilarni basturushqa qatnashqanliqini éytqan idi.”

Süriyilikler qatillarning kimler ikenlikini obdan bilidu

Maqalide yene mundaq dep yézilghan: “Türkiyining hatay shehiridiki, liwanning chégra rayonidiki we i'ordaniyidiki süriyiliklerning guwahliq bérishiche, iran armiyisi bilen liwandiki hizbullachilarning süriyidiki asasliq wezipisi namayishchilarni basturushni yaki ulargha oq étishni ret qilghan yaki namayishchilargha hésdashliq qilghan süriyilik eskerlerni arqidin étip tashlash bolup, namayishchilarmu ularni éniq bilidiken. Hetta türkiye, liwan we i'ordaniyilerge qéchip chiqip panahliniwatqan süriyilikler iranliqlar bilen hizbullachilarning jinayetlirini öz közliri bilen körgen iken.”