Islam dunyasi ammiwi teshkilatlar birlikining yighinida Uyghurlar mesilisi otturigha qoyuldi

Her ikki yighinda, Uyghur mesilisi, islam dunyasidiki muhim mesililerning biri süpitide otturigha qoyuldi. Yighin'gha pakistanda pa'aliyet élip bériwatqan ömer Uyghur wexpimu teklip bilen qatnashti.

Islam dunyasi ammiwi teshkilatlar birlikining 11-qétimliq kéngesh yighini mushu ayning 19‏-küni pakistan paytexti islam'abadta échildi. Mezkur teshkilat yene 20-féwral küni keshmirde, xelq'araliq keshmir muhakime yighini ötküzdi. Yighin'gha islam dunyasidiki 15tin artuq dölettin kelgen 40tin artuq teshkilatning wekilliri qatnashti. Yighinda islam dunyasidiki muhim mesililer muzakire qilindi. Yighin'gha pakistanning bir qisim hökümet we parlamént ezalirimu qatnashti. Ömer Uyghur wexpining hey'etliridin abduqéyim ependi yighinning alaqidar jeryani we ehmiyiti heqqide melumat berdi.

RFA/Shohret Hoshur

Islam dunyasi ammiwi teshkilatlar birlikining keshmirdiki yighindin qaytqan mes'ulliri, etilikke, islam'abadta, ömer Uyghur wexpining hey'etliri bilen söhbet élip barmaqchi.

Islam dunyasi ammiwi teshkilatlar birliki, 2005-yili istanbulda qurulghan. Teshkilatning asasliq ghayisi, islam dunyasidiki kishiler we xelqlerning heq we erkinlikliri üchün küresh qilishtur. Teshkilatning qurghuchi ezaliridin biri bolghan xelq'araliq insan heqliri yardemleshme wexpi, 90-yillarning béshida bosiniyiliklerge we 1990‏-yillarning ottura we axirlirida chéchenlerge muhim yardemlerde bolghan. Bu yardemler, bosniye we chéchenlerning urush zeperliride muhim rol oynighan.