Йеңи исраилийә - пәләстин тоқунуши әвҗигә чиқмақта

Исраилийиниң газа районида һавадин елип бериватқан бомбардимани бүгүн 4‏ - күнигә қәдәм қойди.
Мухбиримиз шөһрәт һошур
2008-12-30
Share
Pelestin-Israil-305 Сүрәт, газадики исраилийә армийисиниң бомбардиманидин кейинки харабилиқлардин бир көрүнүш.
AFP Photo

Бирләшмә агентлиқиниң хәвәр қилишичә, бомбардиманда һазирға қәдәр пәләстинликләрдин 370 киши өлгән; хамасниң ракета вә зәмбирәк һуҗумида болса исраилийиликләрдин 4 киши өлгән. Исраилийә бүгүн бомбардиманниң таки хамас ракета һуҗумлирини тохтатқанға қәдәр давамлишидиғанлиқини билдүрди.

Исраилийә: һуҗум техи дәсләпки басқучта; хамас: қаршлиқимиз давамлишиду.
Хамас баянатчиси болса исраилийигә қарши барлиқ имканлири билән қаршилиқ көрситидиғанлиқини, гези кәлгәндә өзини өлтүрүвелиш характерлик һуҗумға өтидиғанлиқини билдүрди.

Нөвәттә хәлқара җамаәт исраилийиниң пәләстингә қарита һәддидин артуқ күч қолланғанлиқини, һуҗумда, қоралсиз пуқраларниң өлүмигә йол ачқанлиқини әйиблимәктә. Исраилийә болса, һуҗумда асаслиқи, хамасниң әскирий орунлири вә һөкүмәт ишханилирини һуҗум нишан қилғанлиқини, әмма хамас қорал - ярақлирини аһалиләрниң өйидә сақлаватқанлиқи үчүн пуқраларниң өлүмигә сәвәб болуштин халий болалмайватқанлиқини, буниңда мәсулийәтниң хамас тәрәптә икәнликини билдүрмәктә.

Хәвәрләрдин қариғанда , исраилийә нөвәттә һава бомбардиманини давамлаштуруш билән биллә, газа райони чегрисиға пиядә әскәр қошуни вә зәмбирәкчи қисимларни топлиған. Исраилийә дөләт мудапиә министирликиниң бир хадими нөвити кәлгәндә газаға қуруқлуқтин һуҗум қилип кириш мумкинчиликини әскәрткән. Әмма исраилийә президенти шимон пәрәс алдинқи күнидики баянатида, газани қайта контроллуқиға елиш пилани йоқлуқини, пәқәт газада, хамас һөкүмранлиқиға хатимә бериш нийити барлиқини билдүргән иди.

Бүгүн явропа бирликиниң ташқи ишлар министирлири газа вәзийитини музакирә қилмақчи. явропа бирлики алдинқи күнидики баянатида, урушта хәтәргә йолуқуватқан пуқраларниң әһвалидин әндишә қиливатқанлиқини, нөвәттики әң муһим ишниң уруш тохтитиш вә газаға қутқузуш материяллири әвәтиш икәнликини билдүргән иди.

Пәләстиндики исламий җаһат тәшкилатиниң әлқуддус радиосиниң хәвәр қилишичә, мисир һөкүмити қутқузуш әслиһәлириниң трансипорти үчүн рәфах чегрисини ачқан. Исраилийә армийисиму Kerem Shalom чегра еғизини инсаний ярдәм үчүн ечивәткәнликини билдүрди. Әмма иран президенти әхмәдиниҗад, бүгүн исраилийиниң пәләстингә йоллинидиған қутқузуш әслиһәлириниң тошулушиға тосқунлуқ қиливатқанлиқини билдүрди вә буни ғәйрий инсаний қилмиш дәп әйиблиди.

Бирләшкән дөләтләр тәшкилатиниң баш катипи Ban Kimoon исраилийә вә хамастин ибарәт һәр икки тәрәпни әйиблиди. Бан кимун сөзидә хамасниң ракета һуҗумлирини тохтатмиғанлиқини, исраилийиниң болса, мәсилини тенч йол билән һәл қилишқа йетәрлик тиришчанлиқ көрсәтмиди дәп әйиблиди.

Бүгүн пәләстин вәзийитигә инкас қайтурған хитай ташқи ишлар баянатчиси чин гаң, һәр икки тәрәпни өзини тутувелишқа чақирған вә хитайниң хәлқара мәсилиләрни тенч йол билән һәл қилиш тәрәпдари икәнликини билдүргән.

Бирләшкән дөләтләр тәшкилатиниң пәләстиндә инсан һәқлири вәзийитини көзитиватқан мутәхәссиси Richard Faulk бүгүн б б с ға қилған сөзидә, исраилийиниң қоралсиз пуқраларға заманиви қораллар билән һуҗум қиливатқанлиқини әйиблиди.

Иран президенти әхмәдиниҗад: " пәләстинликләр ишхалийәткә қарши күрәш қиливатиду, шуңа уларниң һәрикити җиһаттур, шаһадәттур, нәтиҗә қандақ болушидин қәтинәзәр улар зәпәр қазанғучилардур," дәп мәдһийилигән.



Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт