Yéngi isra'iliye - pelestin toqunushi ewjige chiqmaqta

Isra'iliyining gaza rayonida hawadin élip bériwatqan bombardimani bügün 4‏ - künige qedem qoydi.
Muxbirimiz shöhret hoshur
2008-12-30
Élxet
Pikir
Share
Print
Süret, gazadiki israiliye armiyisining bombardimanidin kéyinki xarabiliqlardin bir körünüsh.
Süret, gazadiki israiliye armiyisining bombardimanidin kéyinki xarabiliqlardin bir körünüsh.
AFP Photo

Birleshme agéntliqining xewer qilishiche, bombardimanda hazirgha qeder pelestinliklerdin 370 kishi ölgen؛ xamasning rakéta we zembirek hujumida bolsa isra'iliyiliklerdin 4 kishi ölgen. Isra'iliye bügün bombardimanning taki xamas rakéta hujumlirini toxtatqan'gha qeder dawamlishidighanliqini bildürdi.

Isra'iliye: hujum téxi deslepki basquchta؛ xamas: qarshliqimiz dawamlishidu.
Xamas bayanatchisi bolsa isra'iliyige qarshi barliq imkanliri bilen qarshiliq körsitidighanliqini, gézi kelgende özini öltürüwélish xaraktérlik hujumgha ötidighanliqini bildürdi.

Nöwette xelq'ara jama'et isra'iliyining pelestin'ge qarita heddidin artuq küch qollan'ghanliqini, hujumda, qoralsiz puqralarning ölümige yol achqanliqini eyiblimekte. Isra'iliye bolsa, hujumda asasliqi, xamasning eskiriy orunliri we hökümet ishxanilirini hujum nishan qilghanliqini, emma xamas qoral - yaraqlirini ahalilerning öyide saqlawatqanliqi üchün puqralarning ölümige seweb bolushtin xaliy bolalmaywatqanliqini, buningda mes'uliyetning xamas terepte ikenlikini bildürmekte.

Xewerlerdin qarighanda , isra'iliye nöwette hawa bombardimanini dawamlashturush bilen bille, gaza rayoni chégrisigha piyade esker qoshuni we zembirekchi qisimlarni toplighan. Isra'iliye dölet mudapi'e ministirlikining bir xadimi nöwiti kelgende gazagha quruqluqtin hujum qilip kirish mumkinchilikini eskertken. Emma isra'iliye prézidénti shimon peres aldinqi künidiki bayanatida, gazani qayta kontrolluqigha élish pilani yoqluqini, peqet gazada, xamas hökümranliqigha xatime bérish niyiti barliqini bildürgen idi.

Bügün yawropa birlikining tashqi ishlar ministirliri gaza weziyitini muzakire qilmaqchi. Yawropa birliki aldinqi künidiki bayanatida, urushta xeterge yoluquwatqan puqralarning ehwalidin endishe qiliwatqanliqini, nöwettiki eng muhim ishning urush toxtitish we gazagha qutquzush matériyalliri ewetish ikenlikini bildürgen idi.

Pelestindiki islamiy jahat teshkilatining elquddus radi'osining xewer qilishiche, misir hökümiti qutquzush eslihelirining transiporti üchün refax chégrisini achqan. Isra'iliye armiyisimu Kerem Shalom chégra éghizini insaniy yardem üchün échiwetkenlikini bildürdi. Emma iran prézidénti exmedinijad, bügün isra'iliyining pelestin'ge yollinidighan qutquzush eslihelirining toshulushigha tosqunluq qiliwatqanliqini bildürdi we buni gheyriy insaniy qilmish dep eyiblidi.

Birleshken döletler teshkilatining bash katipi Ban Kimoon isra'iliye we xamastin ibaret her ikki terepni eyiblidi. Ban kimun sözide xamasning rakéta hujumlirini toxtatmighanliqini, isra'iliyining bolsa, mesilini ténch yol bilen hel qilishqa yéterlik tirishchanliq körsetmidi dep eyiblidi.

Bügün pelestin weziyitige inkas qayturghan xitay tashqi ishlar bayanatchisi chin gang, her ikki terepni özini tutuwélishqa chaqirghan we xitayning xelq'ara mesililerni ténch yol bilen hel qilish terepdari ikenlikini bildürgen.

Birleshken döletler teshkilatining pelestinde insan heqliri weziyitini közitiwatqan mutexessisi Richard Faulk bügün b b s gha qilghan sözide, isra'iliyining qoralsiz puqralargha zamaniwi qorallar bilen hujum qiliwatqanliqini eyiblidi.

Iran prézidénti exmed'inijad: " pelestinlikler ishxaliyetke qarshi küresh qiliwatidu, shunga ularning herikiti jihattur, shahadettur, netije qandaq bolushidin qet'inezer ular zeper qazan'ghuchilardur," dep medhiyiligen.



Toluq bet