Istanbulda 'sherqiy türksitanda xitay mesilisi' namliq yighin échildi

Süret, 31 - iyul, türkiye hökümet béshidiki adalet we tereqqiyat partiyisining istanbuldiki merkizining yighin zalida échilghan, 'sherqiy türksitanda xitay mesilisi' namdiki yighinning yighin meydanidin bir körünüsh.

Yighin'gha adalet we tereqqiyat partiyisining istanbuldiki yashliri we istanbulda yashawatqan Uyghurlardin bolup 400 din artuq kishi qatnashti. Yighinda 4 ‏- iyul ürümchi weqesige munasiwetlik ishlen'gen höjjetlik resim silayid körsitildi. Yighinda adalet we tereqqiyat partiyisi istanbul yashlar bölümining bashliqi isma'il donuk ependi échilish nutiqi sözlidi.

Yighinda yene sherqiy türkistan wexpining re'is wekili sultan mehmut qeshqerli ependi, gebze uniwéristitining oqutquchisi proféssor doktur salih aynural ependi, sherqiy türkistan wexpining bash katipi hamut köktürk ependi qatarliq shexsler söz qildi.

Biz yighin axirida adalet we tereqqiyat partiyisi istanbul yashlar bölümining bashliqi isma'il donuk ependi we sherqiy türkistan wexpining bash katipi hamit köktürk ependi bilen söhbet élip barduq.

Adalet we tereqqiyat partiyisi istanbul yashlar bölümining bashliqi isma'il donuk ependi bu yighinni uyushturushtiki asasiy meqsiti heqqide toxtilip mundaq dédi: "sherqiy türkistanda yillardin biri zulum bar. Bash ministirimiz rejep tayyip erdughan buni ipadilidi, u yerde bir zulum bar, u yerde bir irqi qirghinchiliq bar dédi, heqiqeten u yerde bir irqi qirghinchiliq boluwatidu, dunyada bir insan azaplansa bizningmu yürikimiz azablinidu, biz adalet we tereqqiyat partiyisi bolush süpitimiz bilen bir insan bolush süpitimiz bilen u yerde boluwatqan zulumdin qayghurimiz, bügün bir yighin achtuq, ete ‏- ögün qolimizdin kélishiche, téximu chong ishlarni qilimiz, ular bizning qérindashlirimiz, ular bilen birge qayghurimiz, xudayim buyrisa sherqiy türkistan bu zulumdin qutulidu we musteqilliqqa érishidu."

Yuqiridiki awaz ulinishidin, bu heqtiki melumatimizning tepsilatini anglaysiler.