Istanbulning taksim meydanida namayish

Sürette istanbuldiki namayishtin bir körünüsh

2010 - Yili 7 - ayning 4 - küni türkiyide pa'aliyet qiliwatqan ammiwiy teshkilatlar sherqiy türkistan munbiri nam astida birlikte uyushturushi bilen, ötken yili yüz bergen ürümchi weqesining bir yilliqi munasiwiti bilen xitaygha qarshi istanbulning taksim meydanida namayish ötküzüldi.

Namayishqa sherqiy türksitan wexpi, sherqiy türkistan ma'arip we hemkarliq jem'iyiti, sherqiy türkistan yashlar teshkilati, sherqiy türkistan hemkarliq jem'iyiti, sherqiy türkistan köchmenler jem'iyiti qatarliq ammiwiy teshkilatlar istanbulda yashawatqan Uyghurlarni namayishqa seperwer qilish netijiside Uyghurlardin er - ayal we kichik balilar bolup 1000 din artuq kishi qatnashti.

Namayishqa türkiyining sa'adet partiyisi, büyük birlik partiyisi, milletchi heriket partiyisi qatarliq siyasiy partiyilerning istanbulda turushluq mes'ulliri we ezaliri, ammiwiy teshkilatlardin insaniy yardem wexpi, mezlumlar jem'iyiti, alperen ujaqliri, ölkichiler teshkilati qatarliq ammiwiy teshkilatlar Uyghurlarni qollaydighanliqini ipadilep namayishqa qatnashti.

Namayishchilar qollirida ay yultuzluq kök bayraq we türk bayraqliri kötürüwalghan bolup, bezi namayishchilar, sherqiy türkistan'gha erkinlik, xitay sherqiy türkistanda qirghinchiliq qiliwatidu, zulumgha süküt qilma dégen'ge oxshash xitaygha qarshi her xil sho'arlar yézilghan wiwiska taxtilarni kötürgen halda galatasaray toluq'ottura mektepning aldidin taksim meydanigha qarap mangdi.

Namayishchilar birdek, yashisun musteqil sherqiy türkistan, heq - hoquq, adalet türkistan'gha höriyet dégen'ge oxshash sho'arlar towlidi. Namayish jeryanida 5 - iyul ürümchi weqesige alaqidar bayanat élan qilindi, bayanatini sherqiy türkistan munbirige wakaliten sherqiy türkistan wexpining bashliqi hamut köktürk oqup ötti.

Hamut köktürk sözide, ötken yili Uyghur qizlirigha exlaqsizliq qilghan xitaylargha qarshi tinchliq bilen namayish qilghan Uyghurlargha qarshi xitaylar quralliq qarshiliq körsetti we weqe qirghinchiliqqa aylandi. Xitaylar mejburi ishghal qiliwalghan sherqiy türkistanda bésim, zulum we yoq qilish siyasetler ijra qiliwatidu. Sherqiy türkistan mesilisini birleshken döletler teshkilati, islam qurultiyi teshkilati, yawrupa ittipaqi qatarliq xelq'araliq sehnilerde otturigha qoyulishi kérek, dédi.

Biz namayish axirida namayishqa qatnashqan büyük birlik partiyisining istanbul shöbe bashliqi güwen ependi qatarliq bir qisim shexsler bilen söhbet élip barduq.

Yuqiridiki awaz ulinishidin, bu heqtiki melumatimizning tepsilatini anglaysiler.