Türkiyidiki 'istiqlal géziti' gérmaniyide sherqiy türkistan körgezmisi achti

Sürette, 5 - ayning 30 - küni gérmaniyide " sherqiy türkistan " namida körgezme achqan, 40 yildin béri gérmaniyining wangen dégen yéride yashawatqan kemalidin batur ependi we bu körgezmini, shundaqla uyghur dawasini qollawatqan gérmaniye türk jemiyetliri birliki qurultiyigha qatnishiwatqan qollighuchilar bilen birge.

Uyghurlar dunyaning qaysi yéride yashisa yashisun, qolidin kélishiche her xil yollar bilen öz millitini tonutushqa tirishidu. Bu kishilerdin biri 40 yildin béri gérmaniyining wan'gen dégen yéride yashawatqan kemalidin batur ependidur. U 5 - ayning 30 - küni gérmaniyide " sherqiy türkistan " namida körgezme achqan bolup, bu körgezmini gérmaniye türk jemiyetliri birliki qurultiyigha qatnishiwatqan minglarche kishi körgen.

Bu körgezmini yene bu qurultaygha qatnishish üchün türkiyidin kelgen sabiq bash ministir yardemchisi milletchi heriket partiyisi bashliqi dewlet baghchilimu körgen. Körgezmige uzun yillardin béri türkiyide neshir qilin'ghan sherqiy türkistan heqqidiki kitab - jurnallar, xitaylarning Uyghurlargha élip bériwatqan bésim siyasiti eks ettürülgen foto süretler, Uyghurlarning örp - adetlirige a'it buyumlar qoyulghan.

Bu körgezmini achqan istiqlal gézitining gérmaniyide turushluq tarqatquchisi kamalidin batur ependi, 30 - mayda gérmaniyining essen shehride échilghan bu qurultaygha 25 ming etrapida kishining qatnashqanliqini, bularning köpining sherqiy türkistan körgezmisini aylan'ghanliqini éytti. U bizge bergen melumatta özining 40 yildin béri gérmaniyide yashawatqanliqini, bu 40 yil jeryanida 429 qétim sherqiy türkistan heqqide léksiye bergenlikini, köp qétim körgezme achqanliqini axirette wetining üchün néme qilding dése köngli rahet bir nersilerni déyeleydighanliqini éytip berdi.

Bu körgezmini köpligen ademler körgen bolup, mezkur körgezme heqqide istiqlal gézitining gérmaniyide turushluq tarqatquchisi kamalidin batur ependi bilen söhbet élip barduq.

Yuqiridiki awaz ulinishidin, bu heqtiki melumatimizning tepsilatini anglaysiler.