Myunxéndiki Uyghurlar arisigha sélin'ghan jasus sotlandi

Gérmaniye axbarat agéntliqining 12-séntebirdiki xewirige asaslan'ghanda, xitay teripidin gérmaniyining myunxén shehiridiki Uyghurlar arisigha sélin'ghan xitay jasusi 11-séntebir küni sotqa tartilghan.
Ixtiyariy muxbirimiz ekrem
2011.09.15
myunxen-sot-mehkimisi-305.jpg Myunxén sot mehkimisi. 2006-Yili aprél.
en.wikipedia.org

Mezkur sotning xewiri 12-séntebir küni gérmaniyidiki “Dunya waqit géziti” qatarliq birqisim dangliq gézitlerde we köpligen intérnét tor betliride élan qilin'ghan. Ilgiri myunxéndiki töt neper Uyghurning xitaygha jasusluq qilghanliq gumani bilen öylirining axturulghanliq xewiri metbu'atlarda yer alghan we Uyghurlar arisida küchlük ghulghula qozghighan idi. Bu qétim sotqa tartilghan xitay jasusi shularning biri bolup, u gérmaniye bixeterlik da'iriliri teripidin sekkiz kün tutup turulup soraq qilin'ghan.

Xewerde 2005-yilidin 2009-yilighiche xitayning myunxéndiki konsulining qomandanliqi bilen Uyghurlar arisigha sélin'ghan 63 yashliq bu jasusning asasi wezipisining d u q ni mexpiy nazaret qilish, axbarat toplash bolghanliqi bayan qilin'ghan. Xewerde körsitilishiche, Uyghurlar arisigha sélin'ghan bu jasus béyjing bixeterlik da'irilirige sétilghan bolup, xitay hökümiti teripidin chet'eldiki “Besh zeherlik organ” ning biri we eng chongi bolghan d u q ni teqib qilish wezipisige teyinlen'gen. U gérmaniye bixeterlik da'irilirige özining qilmishliri toghrisida iqrar qilghan.

Xewerde bu jasusning isim, familisi tilgha élinmighan. Uning 63 yashliq bir kishi bolghanliqi, ilgiri Uyghur wetinide oqutquchiliq bilen shughullan'ghanliqi, xitaygha sétilghandin kéyin, xitayning myunxéndiki konsuli bilen mexpiy alaqiliship, ularni Uyghurlargha we Uyghur teshkilatlirigha a'it axbaratlar bilen teminligenliki sözlen'gen. 13-Séntebir küni yene myunxénda chaqirilghan sotqa bir qisim Uyghur siyasiy pa'aliyetchilirimu guwahchi süpitide qatnashqan bolup, ularning ichide d u q ning sabiq re'isi erkin aliptékin ependi, d u q ning bash katipi dolqun eysa ependilermu bariken.

Bu qétimqi sotning metbu'atlardiki xewiridin waqip bolghan myunxéndiki Uyghurlardin tursun ependi sotqa tartilghan bu kishining esli ismining lensang bolghanliqini, gérmaniyige kelgendin kéyin özini shöhret dégen Uyghurche isim bilen atap yürgenlikini, millitining shéwe ikenlikini, ilgiri ghuljida oqutquchiliq bilen shughullan'ghanliqini we Uyghurchini rawan sözleydighanliqini éytti.

13-Séntebir küni sotqa qatnashqan d u q bash katipi dolqun eysa ependi bu toghrida etrapliq melumat bérip ötti. Diqqitinglar bu söhbet xatiriside bolghay.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.