Җумһурийәтчиләрниң муавин президент намзати сара пейлин қурултайда сөз қилди

Сара пейлин америка тарихида муавин президент намзатлиқиға көрситилгән 2 - айал намзат болуп һесаблиниду. Сүрәттә, муавин президент намзати сара пейлин сәһнидә.

 Шу күни қурултайда сөзгә чиққан җумһурийәтчи сәрхилләр болса демократлар намзати барак обамани шиддәтлик тәнқид қилип, вашингтонни консирватиплаштурудиғанлиқини билдүрүшти. Төвәндә мухбиримиз әркин мәлумат бериду.

Миннесота штатиниң сант паул шәһиридә ечиливатқан җумһурийәтчиләр қурултийиниң чаршәнбә күнки йиғининиң программисидики әң муһим вәқә җумһурийәтчи муавин президент намзати, аляска валиси сара пейлинниң қурултайда сөз қилип, җумһурийәтчиләрниң муавин президент намзатлиқини қобул қилғанлиқини җакарлиши иди. У, қурултай вәкиллиригә тәнтәнә билән " мән дөлитимиз һәл қилғуч минутларда туруватқан бир мәзгилдә.....Бу сайламдики кәскин риқабәткә чүшүшни.... Риқабәтчимизгә көкрәк керишни қобул қилдим" дәп җакарлиди. У йәнә мундақ дәйду": мән вашингтонға башқиларниң шерин хиялини көрүшкә бармақчи әмәс. Мән вашингтонға бу дөләт хәлқиғә хизмәт қилиш үчүн баримән. Америка биздин вашингтонға яхши адәмләрни қаймуқтуруш үчүн әмәс, бәлки тоғра сәвәбләр билән беришимизни күтмәктә". У нутуқида өзиниң аилә әһвали, аляскиға вали болуш җәрянида қилған хизмити вә пәрзәнтлирини тонуштурди.

Җумһурийәтчиләр президент намзати җон микейнниң сара пейлинни муавин президент намзатлиқиға таллиғанлиқи америкида пейлинниң бу вәзипиниң һөддисидин чиқалайдиған тәҗрибигә игә яки әмәслики тоғрисида талаш тартиш яратқан иди. Пейлин сант паулдики җумһурийәтчиләр қурултийида сөзлигән нутуқида демократларниң бу һәқтики тәнқидлирини рәт қилип, қурултай вәкиллиригә бу вәзипиниң һөддисидин чиқалайдиған йетәрлик тәҗрибигә игә икәнлики тоғрисида вәдә бәрди. У мундақ дәйду": мән бүйүк штат аляскиға вали болуштин бурун өз юртумниң шәһәр башлиқи идим.... Бу сайламда бизниң риқабәтчилиримиз бу тәҗрибилиримгә сәл қариғандәк қилиду. Мән уларға немә хизмәтләрни қилғанлиқимни чүшәндүрүп қояй. Мениңчә кичик бир юртниң башлиқи болуш бир аз җамаәт хизмити қилғанлиққа охшайду. Лекин буниңда сиз йәнила конкрет бир мәсулийәтни үстиңизгә алған болисиз". У өзиниң америкиға муавин президент болушни атқуралайдиғанлиқини әскәртти. Пейлин " мән пүтүн америкилиқларға шуни вәдә қилалаймәнки, мән өзәмдә америка қошма штатлириниң муавин президентиға тегишлик мәнивий роһни елип йүримән. Бу роһ мени валилиққа қәдәр йүксәлтти...." Дәп көрсәтти.

Сара пейлин америка тарихида муавин президент намзатлиқиға көрситилгән 2 ‏ - аял намзат болуп һесаблиниду. У бир тәврәнмәс консерватип шундақла һамилдар аялларниң бала чүшүрүшигә қәтий қарши яш җумһурийәтчидур. У қурултайдики нутуқида йәнә хәлқара мәсилиләр үстидә тохталди вә америкиниң оттура шәрқ нефитигә тайинишини азайтидиғанлиқи, америкиниң өзидики нефит записини ечишни, әгәр бу әмәлгә ашса америкиниң енергийидә башқиларға тайинишини, америкиға келидиған хәвпни азайтидиғанлиқини билдүрди. У мундақ дәйду": русийә кавказийә районидики муһим нефит турубилирини өзиниң контроллуқиға алмақчи болуватқан шундақла нефит вә тәбий газни козур қилип, явропадики иттипақдашлирини парчилаватқан вә уларға тәһдит селиватқан әһвалда биз өзимизни башқиларниң мәрһәмитигә атиялмаймиз. Иранниң дуня ениргийә тәминатиниң аз кәм йеримини игиләйдиған нефит тәминатини үзүветиш хәвпигә қарши туруш.... яки террорчиларниң сәуди әрәбистанниң Abqaiq нефит әслиһәсигә һуҗум қилиш еһтимали... Вә яки венизуелланиң нефит йәткүзүшни тохтитиш еһтималиға қарши... Биз америкилиқлар өзимизниң нефит вә тәбий газ записини ишләпчиқиришқа еһтияҗмиз".
 
Қурултайниң чаршәнбә күнки программисида сөз қилған җумһурийәтчиләрниң көп қисими мәзкур партийидики мәшһур шәхсләр иди. Уларниң ичидики мит ромней, майк хакубе вә руди гулиянилар җон микейн билән җумһурийәтчиләрниң президент намзатлиқини талашқан шәхсләр болуп, лекин партийиниң намзатлар сайлимида микейнгә уттуруп қойған иди. Мит румней қурултайдики нутуқида демократларни тәнқид қилди вә америкиға һәқиқий өзгиришни җон микейн билән сара пейлинниң елип келәләйдиғанлиқини билдүрди. У, " әгәр америка һәқиқәтән өзгиришни халиса қуяшниң ғәрбтин көтүрүлүватқанлиқиға тикилиш вақти кәлди. Чүнки бу қуяш аризона вә аляскидин көтүрүлмәктә вә чақнимақта", дәп көрсәтти.

Нутқиниң давамида "һазирқи вақит дост тартидиған вақит әмәс, бүйүк идийиләрни оттуриға қойидиған вақит, " дәп тәкитлигән мит румней, америка иқтисади хитайниң тәһдитигә дуч келиватқанлиқини билдүрди. У мундақ дәйду": бизниң иқтисадимиз һуҗумға дуч кәлмәктә. Хитайниң һәрикити өзигә һормон урувалған адәмгә охшап қеливатиду. Улар дунядин ачкөзлүк билән нефит сетивелип, ядро техникиси сатмақта. Русийә вә нефит сатқучи дөләтләр һәр йили биздин 500 милярд доллардин сүмүрүп кетиватиду. Бу дуня тарихидики әң зор иқтисади байлиқни йөткәш болуп һесаблиниду."

Руди җулияни җон микейн билән җумһурийәтчиләр партийисиниң президент намзатлиқини талашқан, лекин сайламда җон микейнгә уттурувәткән ню йорк шәһириниң сабиқ башлиқи. У, қурултайдики нутуқида җон микейн билән билән сара пейлинни махтиди. Җулияни " уларниң һәр иккилиси охшимиған турмуш тәҗрибилиригә игә дурус вә вәтәнпәрвәр адәмләр болуп, бу уларниң һазирқи тарихий минутларда өз ‏ - ара ортақлишишини алға сүрмәктә....." Дәп көрсәтти. У демократлар намзати барак обамаға һуҗум қилип, уни америкиниң кейинки бир әсирлик тарихида чиққан әң тәҗрибисиз президент намзати, дәп әйиблиди.

Җулияни мундақ дәйду": у өзиниң көп қисим вақтини мурасимларниң кеңәш палата әзаси болуп өткүзди. У рәһбәрлик қилип бақмиди, қанун чиқирип бақмиди..... У бирәр шәһәр, бирәр штат яки бирәр карханини башқуруп бақмиди. У хәлқ дуч кәлгән бирәр кризисини һәл қилип баққан әмәс. У америка тарихида кейинки 100 йилда чиққан әң тәҗрибисиз президент намзатидур".

Америка җумһурийәтчиләр партийисиниң президент намзати җон микейин пәйшәнбә күни қурултай нутуқи сөзләп, җумһурийәтчиләр партийисиниң намзатлиқини қобул қилғанлиқини елан қилиду. У чаршәнбә күни сант паул шәһиригә йетип кәлгән. Муавин президент намзати сара пейлинниң нутуқи қурултай вәкиллириниң узунға давамлашқан алқишиға сазавәр болди.