Xitayning kanadadiki bash elchisi jang junsey muxbirning ziyaritini qobul qilghanda diplomatik bolmighan qopal ibarilerni ishletti

So'al: xitay shimaliy amérika we awstraliye qatarliq döletlerge meblegh salghan shirketler heqqide sorulup, xu'awéy shirkitining amérika bixeterlikige tehdit dep qaralghanliqi üchün, bu shirketning amérikida tijaret qilishi cheklen'genliki shundaqla, awstraliyiningmu xu'awéy shirkitining meblegh sélishini ret qilghanliqi heqqide soralghanda,xitay bash elchisi jang junsey qaynap ketti we diplomatik bolmighan intayin qopal kocha tili bilen: “Ularning bu heqte pakiti bolsa bizge körsetsun, eger undaq bolmaydiken éghzini yumsun” dédi.

So'al: xitayning kanadadiki nékson néfit shirkitini sétiwalmaqchi bolghanliqi, emma harpér konsérwatip partiyisining bu heqte qayta bir qarap chiqiwatqanliqi, kanada xelqining bundaq bir chong sodida, kanadaning dölet bixeterlikidin endishe qiliwatqanliqi heqqide toxtalghanda,jang junsey yene qopalliq bilen: “Biz kanadaning yer asti bayliqini buliwalmiduq, peqet hemkarlishiwatimiz. Xitay tereqqiy qiliwatqan chong dölet, xitay peqet kanada bilenla emes, belki dunyadiki 100 din artuq döletke meblegh séliwatidu we shu döletlerning yerlik qanunlirigha ri'aye qiliwatidu. Bayliq téxi kanadada turuptu, xitaygha toshulup ketkini yoq” dédi.

Bash elchi jang junsey yene, xitay xelqining aldinqi 30 yilda siyasiy we iqtisadi jehetlerde intayin bay, bayashat yashawatqanliqi, ma'arip we ishqa orunlishish shundaqla parawanliq jehetlerde héchqandaq endishisi yoqluqi, xitay xelqining hazirqi hayattin intayin memnun ikenliki heqqide toxtalghanda, muxbir ewan salmon, bu bayashatchiliq xitay xelqining erkinliki, démokratiye we kishilik hoquqlirinimu öz ichige alamdu dep soridi. Bu so'algha jang junsey mundaq jawab bérip: “Gherb dégen gherb, sherq dégen sherq, bizning özimizge xas démokratiyimiz bar. Biz gherbning démokratiyisini eynen köchürüp kelmeymiz. Eger xitayda démokratiye bolmighan bolsa, xitay xelqi bundaq memnuniyet ichide yashimighan bolatti” dédi.

Bash elchi jang junsey yene, xitayning kanadagha köplep meblegh sélishi ikki dölet xelqlirige paydiliq dep qaraydighanliqini bildürdi. Emma, kanada nékson shirkitini xitayning 15 milyard amérika dollirigha sétiwélishigha, kanada xelqi we öktichi partiyiler izchil qarshi turup kelmekte.

Kanadada élip bérilghan, xitayning kanadagha téximu ilgiriligen halda meblegh sélishi heqqidiki ray sinashlardin melum bolushiche, köpligen kanadaliq xitayning kanadagha chongqurlap kirishidin endishe qilidiken. Buning asasliq sewebliri, xitayning kishilik hoquqni depsende qilidighan diktator bir dölet bolghanliqi, xitayning uchur oghriliqi we intérnét jasusluqi shundaqla xitayning afriqidiki döletlerge meblegh sélish bahaniside kiriwalghandin kéyin, u jaylargha qoral yötkigenliki hemde térrorchilarni yeng ichide qollighanliqi qatarliqlar iken.

Kanada bixeterlik idarisimu köp qétim bayanat élan qilip, kanada dölet tarmaqliri we soda sahesini xitayning uchur jasusluqidin hezer eyleshke chaqirghan idi. Shundaqla yéqinda kanada bixeterlik idarisining sabiq mu'awin bashliqi ray boysiwirt k b k téléwiziye qanilining ziyaritini qobul qilghanda: “Kanadaliqlar xitaydin kélidighan uchur jasusluqi xewpining qanchilik derijide ikenlikini toluq tonup yétishi kérek. Xitaydin kélidighan uchur jasusluqi xewpi xuddi soghuq munasiwetler urushi dewridikidek jiddiy halette” dégen.

Jang junsey ziyaret axirida, “Amérika we kanadadiki xitay shirketlirini jasusluq qilmishi bilen eyiblesh, soghuq urush sepsetisi” déyish arqiliq kanada bixeterlik idarisi chiqarghan qararlarni yoqqa chiqarmaqchi bolghan.
Yuqiridiki ulinishtin bu programmimizning tepsilatini anglighaysiler.