Kazafiyning muhapizetchilirini ayal saqchilardin tallishining siri

Kazafiyning muhapizetchilirining peqet ayal saqchilardin tallinidighanliqi we uning er saqchilardinmu ayal saqchilargha bekrek ishench qilidighanliqi teshwiqat wasitiliride pat-pat sözlinip turatti. Téléwiziye xewerliridimu kazafiy hemishe ayal saqchilarning otturisida körünetti. Bu kazafiyning bashqa dölet bashliqlirigha birdinbir oxshimaydighan teripi idi.

Liwiye dölet armiyisi terkibidiki ayallar qoshunining qomandani we kazafiyni qoghdaydighan mexsus saqchilarning mes'uli a'ishe abdusalam yéqinda liwiyidiki inqilabchilarning qoligha chüshkendin kéyin, kazafiyning bezi sirlirini teshwiqat wasitilirige anglitishqa bashlighan. U 2011-yili 5-séntebir küni hindistanning “Dina” gézitige bergen bayanatida, kazafiyning muhapizetchilirini ayal saqchilardin tallishidiki seweb we ayal saqchilarni tallash prinsipi heqqide toxtilip mundaq dégen: “Men liwiyining jenubi rayonidin bolup, 1984-yilidin biri liwiye armiyiside ishlep kéliwatqan bir ayal qomandanmen. Men hazirghiche öylen'ginim yoq. Liwiye armiyisi sépidiki we kazafiyning muhapizetchiliri qataridiki ayallar erge tégelmeydu. Kazafiyning muhapizetchilirini ayallardin tallishidiki asasliq seweb dunyagha liwiye ayallirini erler bilen oxshash heq-hoquqqa ige we erler ishligen wezipilerning hemmisini ishliyeleydu dep körsitish üchün idi. Shunga u teshwiqat wasitilirige hemishe ayallar bilen körünüshni yaqturatti.”

Kazafiyning yénida hemishe 3 ayal saqchi bolatti

A'ishe abdusalam mezkur gézitke yene mundaq dep bayanat bergen: “Kazafiy 3 neper ayal saqchining hemishe yénida bolushini xalaytti. U liwiye térritoriyisi ichide qandaqla jaygha barsa 3 neper ayal saqchini élip mangatti. Emma, chet'ellerge chiqqinida 4 ayal saqchining hemishe uning yénida bolushi shert idi. Kazafiygha hemrah bolidighan ayal saqchilarni tallash hoquqi manga bérilgen idi. Kazafiyning seperliride uninggha hemrah bolushqa tallan'ghan ayal saqchilar özlirini tolimu bextlik hés qilishatti.”

Kazafiyning ayal saqchilarni tallash ölchimi

A'ishe abdusalam kazafiyning ayal saqchilarni tallash ölchimi heqqide mundaq dédi: “Kazafiy ayal saqchilarni tallashta ularning chirayini asas qilmaytti. Peqet ularning boyini ölchem qilatti. Muhim bolghini kazafiygha muhapizetchi bolup tallan'ghan ayal saqchining kazafiyning arqa teripide kazafiyning boyidin égiz bolup körünüshi idi. Shunga u boyi pakar ayallarni muhapizetchilikke tallimaytti. Kazafiyni qoghdaydighan ayal saqchilarning azraq girim qilishighila yol qoyulatti. Emma bashqa ayallargha oxshash yasinishigha yol qoyulmaytti.”