Клинтон ханим барлиқ америка демократлирини барак обамани қоллашқа чақирди

Америка демократлири дөләтлик чоң қурултийи, 26 - авғуст, йәни қурултайниң иккинчи күни, демократлар партийиси әзаси, мәзкур партийидин президент намзатлиқи риқабитигә чүшкән хиларий клинтонниң сәһнигә чиқиши вә униң " бирлик" баш тема қилинған нутқи билән алаһидә түскә кирди.
Мухбиримиз җүмә хәвири
2008.08.27

 Клинтон ханим нутқида, барлиқ демократларни өз партийисидин президентлиқ намзатлиқиға көрситилиш алдида турған брак обамани қоллашқа чақирди.

Қурултай вәкиллири хиларий клинтон ханиминиң 26 - авғуст кәчтики нутқиниң демократлар партийисини бирликкә кәлтүрүштә интайин муһим әһмийәткә икәнлики билдүрүшкән вә клинтон ханиминиң шундақ муһим әһмийәткә игә баянат беридиғанлиқини күтүшкән иди.

Клинтон ханимниң бүгүнки нутқиниң зор әһмийәткә игә икәнликини билдүргән ню - йорк штатлиқ демократлар вәкили һәмдә ню - йорк штатиға җайлашқан скәнәктәдй шәһириниң шәһәр башлиқи вә клинтон ханимни қоллап билә ташлиған алий вәкил брайин стратон, гәрчә клинтон ханимниң намзат болуп сайлиналмиғанлиқидин униң башқа қоллиғучилириға охшаш көңүлсизлик һес қилған болсиму, әмма өз партийисини мәнпәәти вә дөләтниң кәлгүси үчүн барак обамани қоллайдиғанлиқини билдүрди вә клинтон ханимдин бүгүн кәчтә қандақ сигнал күтүдиғанлиқи һәққидә тохтилип мундақ деди: " мән алди билән униң өзи үчүн җапалиқ ишлигәнләргә қисқиғина рәһмәт ейтишини күтимән һәмдә мән йәнә униңдин интайин күчлүк вә кәскин һалда немә учун бу дөләтниң өзгиришкә моһтаҗ икәнликини, немә үчүн һәммәйләнниң барак обамани қоллишимиз керәклики һәққидә баят беришини күтимән."

Юқириқиси мишиган штати юрин области демократлар партийисиниң рәиси кен пешәт болуп, у хиларий клинтон ханимниң демократлар партийисини бирликкә кәлтүридиған нутуқ елан қилишини, һәмдә мкейин әпәндигә нисбәтән қаттиқ тегишини күтидиғанлиқини ейтти.

Дәрвәқә хиларий клинтон ханимниң бүгүнки нутқи " бирлик"ни баш тема қилған иди. Хиларий клинтон ханимни униң қизи чәлсий клинтон тонуштурди, хиларий клинтон нутуқ сәһнисигә чиққанда алқиш садалири бир нәччә минут давам әтти.

Клинтон ханим алди билән өзиниң бир пәхирлик ана, пәхирлик демократ вә ню - йоркниң пәхирлик палата әзаси икәнликини һәмдә өз партийисидин президентлиқ намзатлиқиға көрситилидиған барак обаманиң пәхирлик қоллиғучиси икәнликини җакарлиди.

У нутуқни давамлаштуруп мундақ деди: " достлар, биз сөйгән ана вәтәнни қайтурувалидиған пәйт кәлди. Мәйли силәр маңа биләт ташлиған болуңлар, вә мәйли барак обамаға беләт ташлиған болуңлар, бирликкә кәлгән партийә вә ортақ мәқсәт үчүн бирликкә келидиған пәйт кәлди."

Клинтон ханим йәнә бу қетимқи президентлиқ сайлиминиң муһимлиқ үстидә тохтилип: " биз һәммимиз охшаш сәптә. Һечқайсимиз чәттә қарап туралмаймиз. Бу кәлгүсимиз үчүн қилиниватқан күрәш һәмдә биз утмисақ болмайдиған күрәш."

Клинтон ханим бу қурларни сөзләп өткәндә пәпсий мәркизидики 20 миңдин артуқ амминиң һәммиси дегүдәк орунлиридин туруп кетишти. Алий меһманлар сәһнисидин орун алған сабиқ президент бил клинтон, барак обаманиң ханими мишел обама, вә демократлар партийисидин муавин президентлиқ намзатлиқиға талланған палата әзаси җо байдин қатарлиқларму орунлиридин туруп узаққичә чавак челишти, қаримаққа сабиқ президент вә хиларий ханимниң йолдиши бил клинтон техиму һаяҗанланғандәк қилатти.

Хиларий клинтон ханим өзиниң 35 йилдин буян өсмүрләр үчүн, универсал саламәтлик суғуртиси үчүн, дөләт ичи вә сиртидики аялларниң һоқуқи үчүн күрәш қилип кәлгәнликини бу күрәшлириниң америка президент сарийида йәнә бир җумһурийәтчи президентни турғузуш үчүн әмәсликини тәкитлиди вә мундақ деди : " өткән 18 ай җәрянида яки өткән 8 йил җәрянида силәрниң қилған қарашлириңларму мәғлуп болған йипәкчиләр үчүн бәдәл төләш әмәс иди. Қандақ болушидин қәтий нәзәр мкейинни президент қилишқа болмайду. Барак обама мениң кандидатим һәмдә у бизниң президентимиз болуши керәк."

Клинтон ханим нутқи давамида барак обаманиң америка хәлқниң ортақ мәнпәәти вә арзу - үмиди учун күрәш қилидиған президент болуп қалидиғанлиқини униң йенида мишел обамадәк ярдәмчиси вә җо байдиндәк бәрдәм, ақил һәмдә тәҗрибилик муавин президент барлиқини көрсәтти.

Клинтон ханим нутқи ахирида ню - йорклуқ езилгән қулларни томур йол тониллиридин өткүзүп уларниң йоруқлуққа чишиға йол издигән хәрийәт тубмән ханимниң қулларға әркинлик издәш һекайисини баян қилип, әркинликкә пәқәт давам күрәш қилғандила еришкили болидиғанлиқини буниң демократларниң бу нөвәтлик президентлиқ сайлимида ғәлибә қилишида интайин муһим икәнликини илгири сүрди вә тубмән ханимниң муну сөзлирини нәқил кәлтүрди: " әгәр итларниң арқиңиздин қавиған авазни аңлисиңизму, қулдарларниң арқиңиздин варқириған авазини аңлисиңизму, қараңғу орманларда уларниң мәшәллири көрүнүп турсиму алға қарап меңивериң, һәргиз тохтимаң. Әгәр сиз әркинликниң тәмини азрақ болсиму тетиймән десиңиз давамлиқ алға қарап меңиң."

Хәрийәт тубмән ханим африқа қан типидин болуп, у 1820 йили ню - йоркта туғулған. У әйни заманда қулларни қутқузуш йәрасти һәрикитини қозғиған вә ички уруш давамида һөкүмәткә хизмәт қилған җәсур аял. Хәрийәт тубмән ханим 1913 - йили вапат болған болуп, у һазир америкиниң әркинлик күрәшлири вә җасаритиниң символи сүпитидә әсләнмәктә.

 Клинтон ханим ахирида америкилиқларниң парлақ кәлгүсигә қарап йол елиштин илгири барак обамани президент қилип сайлашқа тиришчанлиқ көрситишиниң бәкму муһим икәнликини қайта тәкитлиди.

Хиларий клинтон ханим ахирда мундақ мураҗиәт қилди": балилиримизға парлақ кәлгүси яритиш, вә уларға ирадилик адәмләр үчүн тегигә йәткили болмайдиған чоңқурлуқ, йәңгили болмайдиған қийинчилиқ, бойсундурғили болмайдиған егизлик йоқ икәнликини, худаға вә бир - биримизгә ишинишни өгитиш бизниң муқәддәс бурчимиз."

Бүгүнки қурултийиға қатнашқанларниң һәммиси дегүдәк клинтон ханимниң нутқидин рази болғандәк һәмдә у йәткүзмәкчи болған " бирлик" сигналини қобул қилғандәк қилатти.

 Клинтон ханимниң нутқидин интайин һаяҗанланған вә у йәткүзгән сигналниң өзи күткәндинму күчлүк болғанлиқини билдүргән аляска штати акута наһийилик демократлар партиси вәкили памела марш ханим клинтон ханиминиң бир салапәтлик һәмдә демократлар партийисигә нисбәтән һөрмитиниң чоңқурлуқини, өзиниң уни қоллап билән ташлиғанлиқини, гәрчә хиларий ханим намзат болуп таллиналмиған болсиму, уни қоллиғучи барлиқ аялларниң демократлар партийисиниң ғәлибиси үчүн брак обамани қоллиши лазимлиқини билдүрди.

Хиларий клинтон ханимниң нутқи үстидә тохталған җорҗийә шитатидин кәлгән демократлар вәкили давид җәрри әпәнди мундақ деди: " дөләтниң йәнә төт йил охшаш хәтәргә тәвәккүл қилишқа болмайдиғанлиқи, һәммәйләнниң брак обаманиң қоллишимиз керәклики һәмдә америка чүшиниң бу дөләттики һәммәйләнгә ортақ икәнликигә пурсәт яритиштин ибарәт учурни һес қилдим."

Америка демократлар партийиси дөләтлик вәкилләр чоң қурултийи давам қилмақта. Бүгүн бу қурултай 3 - күнигә қәдәм қойди. Бүгүн йәнә 27 - авғуст кәчтә җо байдинниң муавин президент намзатлиқини елан қилиш мурасими өткүзүлиду. Бүгүн кәчқурун йәнә бил клинтон нутуқ сөзләйду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.