Klinton xanim barliq amérika démokratlirini barak obamani qollashqa chaqirdi

 Klinton xanim nutqida, barliq démokratlarni öz partiyisidin prézidéntliq namzatliqigha körsitilish aldida turghan brak obamani qollashqa chaqirdi.

Qurultay wekilliri xilariy klinton xanimining 26 - awghust kechtiki nutqining démokratlar partiyisini birlikke keltürüshte intayin muhim ehmiyetke ikenliki bildürüshken we klinton xanimining shundaq muhim ehmiyetke ige bayanat béridighanliqini kütüshken idi.

Klinton xanimning bügünki nutqining zor ehmiyetke ige ikenlikini bildürgen nyu - york shtatliq démokratlar wekili hemde nyu - york shtatigha jaylashqan skenektedy shehirining sheher bashliqi we klinton xanimni qollap bile tashlighan aliy wekil brayin straton, gerche klinton xanimning namzat bolup saylinalmighanliqidin uning bashqa qollighuchilirigha oxshash köngülsizlik hés qilghan bolsimu, emma öz partiyisini menpe'eti we döletning kelgüsi üchün barak obamani qollaydighanliqini bildürdi we klinton xanimdin bügün kechte qandaq signal kütüdighanliqi heqqide toxtilip mundaq dédi: " men aldi bilen uning özi üchün japaliq ishligenlerge qisqighina rehmet éytishini kütimen hemde men yene uningdin intayin küchlük we keskin halda néme uchun bu döletning özgirishke mohtaj ikenlikini, néme üchün hemmeylenning barak obamani qollishimiz kérekliki heqqide bayat bérishini kütimen."

Yuqiriqisi mishigan shtati yurin oblasti démokratlar partiyisining re'isi kén péshet bolup, u xilariy klinton xanimning démokratlar partiyisini birlikke keltüridighan nutuq élan qilishini, hemde mkéyin ependige nisbeten qattiq tégishini kütidighanliqini éytti.

Derweqe xilariy klinton xanimning bügünki nutqi " birlik"ni bash téma qilghan idi. Xilariy klinton xanimni uning qizi chelsiy klinton tonushturdi, xilariy klinton nutuq sehnisige chiqqanda alqish sadaliri bir nechche minut dawam etti.

Klinton xanim aldi bilen özining bir pexirlik ana, pexirlik démokrat we nyu - yorkning pexirlik palata ezasi ikenlikini hemde öz partiyisidin prézidéntliq namzatliqigha körsitilidighan barak obamaning pexirlik qollighuchisi ikenlikini jakarlidi.

U nutuqni dawamlashturup mundaq dédi: " dostlar, biz söygen ana wetenni qayturuwalidighan peyt keldi. Meyli siler manga bilet tashlighan bolunglar, we meyli barak obamagha bélet tashlighan bolunglar, birlikke kelgen partiye we ortaq meqset üchün birlikke kélidighan peyt keldi."

Klinton xanim yene bu qétimqi prézidéntliq saylimining muhimliq üstide toxtilip: " biz hemmimiz oxshash septe. Héchqaysimiz chette qarap turalmaymiz. Bu kelgüsimiz üchün qiliniwatqan küresh hemde biz utmisaq bolmaydighan küresh."

Klinton xanim bu qurlarni sözlep ötkende pepsiy merkizidiki 20 mingdin artuq ammining hemmisi dégüdek orunliridin turup kétishti. Aliy méhmanlar sehnisidin orun alghan sabiq prézidént bil klinton, barak obamaning xanimi mishél obama, we démokratlar partiyisidin mu'awin prézidéntliq namzatliqigha tallan'ghan palata ezasi jo baydin qatarliqlarmu orunliridin turup uzaqqiche chawak chélishti, qarimaqqa sabiq prézidént we xilariy xanimning yoldishi bil klinton téximu hayajanlan'ghandek qilatti.

Xilariy klinton xanim özining 35 yildin buyan ösmürler üchün, uniwérsal salametlik sughurtisi üchün, dölet ichi we sirtidiki ayallarning hoquqi üchün küresh qilip kelgenlikini bu küreshlirining amérika prézidént sariyida yene bir jumhuriyetchi prézidéntni turghuzush üchün emeslikini tekitlidi we mundaq dédi : " ötken 18 ay jeryanida yaki ötken 8 yil jeryanida silerning qilghan qarashliringlarmu meghlup bolghan yipekchiler üchün bedel tölesh emes idi. Qandaq bolushidin qet'iy nezer mkéyinni prézidént qilishqa bolmaydu. Barak obama méning kandidatim hemde u bizning prézidéntimiz bolushi kérek."

Klinton xanim nutqi dawamida barak obamaning amérika xelqning ortaq menpe'eti we arzu - ümidi uchun küresh qilidighan prézidént bolup qalidighanliqini uning yénida mishél obamadek yardemchisi we jo baydindek berdem, aqil hemde tejribilik mu'awin prézidént barliqini körsetti.

Klinton xanim nutqi axirida nyu - yorkluq ézilgen qullarni tomur yol tonilliridin ötküzüp ularning yoruqluqqa chishigha yol izdigen xeriyet tubmen xanimning qullargha erkinlik izdesh hékayisini bayan qilip, erkinlikke peqet dawam küresh qilghandila érishkili bolidighanliqini buning démokratlarning bu nöwetlik prézidéntliq saylimida ghelibe qilishida intayin muhim ikenlikini ilgiri sürdi we tubmen xanimning munu sözlirini neqil keltürdi: " eger itlarning arqingizdin qawighan awazni anglisingizmu, quldarlarning arqingizdin warqirighan awazini anglisingizmu, qarangghu ormanlarda ularning mesh'elliri körünüp tursimu algha qarap méngiwéring, hergiz toxtimang. Eger siz erkinlikning temini azraq bolsimu tétiymen désingiz dawamliq algha qarap ménging."

Xeriyet tubmen xanim afriqa qan tipidin bolup, u 1820 yili nyu - yorkta tughulghan. U eyni zamanda qullarni qutquzush yer'asti herikitini qozghighan we ichki urush dawamida hökümetke xizmet qilghan jesur ayal. Xeriyet tubmen xanim 1913 - yili wapat bolghan bolup, u hazir amérikining erkinlik küreshliri we jasaritining simwoli süpitide eslenmekte.

 Klinton xanim axirida amérikiliqlarning parlaq kelgüsige qarap yol élishtin ilgiri barak obamani prézidént qilip saylashqa tirishchanliq körsitishining bekmu muhim ikenlikini qayta tekitlidi.

Xilariy klinton xanim axirda mundaq muraji'et qildi": balilirimizgha parlaq kelgüsi yaritish, we ulargha iradilik ademler üchün tégige yetkili bolmaydighan chongqurluq, yenggili bolmaydighan qiyinchiliq, boysundurghili bolmaydighan égizlik yoq ikenlikini, xudagha we bir - birimizge ishinishni ögitish bizning muqeddes burchimiz."

Bügünki qurultiyigha qatnashqanlarning hemmisi dégüdek klinton xanimning nutqidin razi bolghandek hemde u yetküzmekchi bolghan " birlik" signalini qobul qilghandek qilatti.

 Klinton xanimning nutqidin intayin hayajanlan'ghan we u yetküzgen signalning özi kütkendinmu küchlük bolghanliqini bildürgen alyaska shtati akuta nahiyilik démokratlar partisi wekili paméla marsh xanim klinton xanimining bir salapetlik hemde démokratlar partiyisige nisbeten hörmitining chongqurluqini, özining uni qollap bilen tashlighanliqini, gerche xilariy xanim namzat bolup tallinalmighan bolsimu, uni qollighuchi barliq ayallarning démokratlar partiyisining ghelibisi üchün brak obamani qollishi lazimliqini bildürdi.

Xilariy klinton xanimning nutqi üstide toxtalghan jorjiye shitatidin kelgen démokratlar wekili dawid jerri ependi mundaq dédi: " döletning yene töt yil oxshash xeterge tewekkül qilishqa bolmaydighanliqi, hemmeylenning brak obamaning qollishimiz kérekliki hemde amérika chüshining bu dölettiki hemmeylen'ge ortaq ikenlikige purset yaritishtin ibaret uchurni hés qildim."

Amérika démokratlar partiyisi döletlik wekiller chong qurultiyi dawam qilmaqta. Bügün bu qurultay 3 - künige qedem qoydi. Bügün yene 27 - awghust kechte jo baydinning mu'awin prézidént namzatliqini élan qilish murasimi ötküzülidu. Bügün kechqurun yene bil klinton nutuq sözleydu.