Yaponiyidiki xitay konsulxanisigha bomba tashlandi

9-Ayning 17-küni kech sa'et altide fuku'oka shehiridiki xitay konsulxanisi bomba hujumigha uchrighan yeni namelum bir er kishi isliq bombidin birni konsulxana ichige tashlighan we bir'azdin kéyin özini saqchigha kirip melum qilghan.
Ixtiyariy muxbirimiz haji qutluq qadiri
2012.09.19
xitayda-namayish-yapongha-qarshi-senkaku-305.jpg Xitayda ötküzülgen sénkaku majirasi toghrisida ötküzülgen namayish. 2012-Yili 18 séntebir, kunming.
AFP

Yaponiye bilen xitay otturisidiki aral majirasi tüpeylidin xitayning 125 shehiride élip bériwatqan yapon'gha qarshiliq bildürüsh namayishliri, yapon mallirini bayqut qilish heriketliri we shundaqla yaponiye shirketlirige, soda-saraylirigha, xitaydiki yaponiye elchixana, konsulxanilirigha xitay puqralirining tash étip, urup-chiqish heriketliri barghanséri küchiyiwatqan mushundaq bir peytte, yaponiye metbu'atlirining xewirige qarighanda, 9-ayning 17-küni kech sa'et altide fuku'oka shehiridiki xitay konsulxanisi bomba hujumigha uchrighan yeni namelum bir er kishi isliq bombidin birni konsulxana ichige tashlighan we bir'azdin kéyin özini saqchigha kirip melum qilghan. Bomba tashlighuchining salahiyiti téxiche éniq ashkarilanmighan. Bu qétimqi weqede héchqandaq yarilinish we bashqa hadisiler körülmigen. Undin bashqa, kobé shehiridiki xitay tili mektipining derwazighimu ot qoyulghan.

Xitay konsulxanisigha isliq bomba tashlash weqesidin kéyin,xitayning yaponiyide turushluq elchixanisi derhal uqturush élan qilip, yaponiyide turushluq xitay puqralirining bixeterlikige kapaletlik qilish üchün, yaponiyide waqitliq turuwatqan yaki yaponiyide turushluq xitay puqralirini jismaniy bixeterlikke diqqet qilishqa agahlandurghan we munularni bildürgen:
Xitay puqralirining jismaniy bixeterliki yaki mal-mülki ziyan'gha uchrisa, yaponiye saqchilirigha melum qilishi, shuning bilen bir waqitta, yéqin etraptiki xitayning yaponiyide turushluq konsulxanisi we elchixanisigha ziyan uchrash ehwalini waqtida melum qilip, yardem sorishi kérek.

Yaponiyidiki xitay konsulxanisining isliq bomba zerbisige uchrishi bir tasadipiy hadise bolup, yaponiyide yaponlardin héchkim xitaygha qarshi namayish we yaki xitay shirketlirige, xitay puqralirigha ziyankeshlik qilish hadisisi téxiche körülgini yoq. Emma xitaydiki yaponiyilik oqughuchilar we shu yerde xizmette turuwatqan yaponiyilikler qorqunch ichide öyliridin sirtqa chiqalmay endishe ichide yashimaqta.

Biz bu munasiwet bilen, hazir yaponiyide melum bir uniwérsitétta oquwatqan xitay oqughuchi bilen téléfon ziyariti élip barduq. Xitay oqughuchi özining hazirqi ehwalini bayan qilip, bu yerde héchqandaq undaq ishlarning tesirining yoqluqini we xatirjem turuwatqanliqini bildürdi.

Yaponiyide yüz bergen, xitay konsulxanisining bomba hujumigha uchrishi we xitay tili mektipige ot qoyush weqelirige nisbeten, dunya Uyghur qurultiyi tetqiqat merkizining mu'awin re'isi, asiya tetqiqat ornining mudiri doktor turmuhemmet hashim öz köz qarashlirini bayan qildi.

Yuqiridiki awaz ulinishidin tepsilatini anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.