Liwiye weziyiti heqqidiki yéngi uchurlar

Fransiye agéntliqining bayan qilishiche, liwiyide mu'amer kazafiy hakimiyitige qarshi qozghilang 3‏-heptige qedem qoydi. Kazafiy qisimliri bügün raslanuf shehiride qozghilangchilarning kontrolluqida turuwatqan néfit bazilirigha yene hawadin hujum qozghidi. Qozghilangchilar emdi kazafiyning hawa hujumidin saqlinish üchün b d t din, uchushqa bolmaydighan rayon belgileshni telep qildi.

B b s ning bayan qilishiche, bügün kazafiy qisimliri raslanuf shehirige hujum qozghighanda, chet'ellik zhurnalistlarmu, kazafiyning bombardimanchi ayropilanliri bu sheherdiki ikki qewetlik bir binani bombilap, uning bir qewitini qattiq zeximlendürgenlikini éniq körgen. Emma, bu hujumda chiqim bolghan adem we mülük ehwali téxi namelum.

B b s ning tripolidiki muxbiri dawisning éytishiche, kazafiy hazir özini herbiy jehette zor ghelibe qilghan dep jakarlawatidu. Bundaq ehwalda, xelq'ara teshkilat hazir kazafiyning xelqqe hujum qilishini derhal cheklesh üchün, liwiyide uchushqa bolmaydighan rayon belgilesh lazimliqini hés qildi. Aldi bilen en'gliye bilen fransiye bu ishqa kiriship, liwiyide uchushqa bolmaydighan rayon layihileshke bashlidi.

Fransiye agéntliqining bayan qilishiche, bash orgini se'udi erebistanidiki dunya islam teshkilatining bash katipi ekmeliddin ihsan'oghlu bügün b d t ge, liwiyide uchushqa bolmaydighan rayon belgilesh heqqide teklip sundi. Bash orgini qahirediki ereb birlikining bash katipi hisam yusufning bügünki bayanatidin melum bolushichimu, ereb birlikidiki döletlerning tashqi ishlar ministirliri bügün yighin ötküzüp, liwiye weziyitini muzakire qilishqa bashlidi.

Amérika awazining bayan qilishiche, qozghilangchilarning ben'ghazidiki bash shtabining uchur-alaqe xadimi mustafa gheriyani, liwiyining paytexti tiripolidiki ayrodromlar özining hazirqi birdinbir muhim ishi, kazafiyning hawadin hujum qozghap xelqqe qirghinchiliq qilish jinayitige xatime bérishtin ibaret ikenlikini bilishi kérek dégen. Shundaqla u, kazafiy qisimlirining bir tereptin hujum qozghap, yene bir tereptin qozghilangchilarni söhbetke chaqirghanliqigha inkas qayturghan. Uning éytishiche, kazafiychilar hetta, kazafiy emdi özining we uruq-tughqanlirining jéni we mülkining bixeterlikige kapaletlik qilinsila, wezipisidin istépa bérishke teyyar dégen geplernimu kötürüp kelgen, emma u, kazafiyning texttin chüshüshi kéreklikidin özge hazir sözlishidighan bashqa téma yoq. Hazir biz kazafiyning hawadin hujum qozghighan insaniyetke qarshi jinayitidinmu qoshup hésab alimiz dégen.

Roytrs agéntliqining béyjingdin bayan qilishiche, xitay hazir xelq'ara teshkilatning, liwiyide kazafiyning xelqqe hujum qilishini cheklesh üchün uchushqa bolmaydighan rayon belgilesh dégen teshebbusigha soghuq mu'amile qiliwatidu. Xitay tashqi ishlar ministirliqining bügünki bayanatida, b d t liwiyige qarita qollinishqa ruxset qilghan her qandaq heriket, liwiyining muqimliqini eslige keltürüshke kapaletlik qilidighan, liwiyining térritoriye pütünlüki we musteqilliqigha hörmet qilidighan heriket bolushi, hemme mesile söhbet arqiliq tinch hel qilinishi kérek, dep jakarlidi. Bu, xitayning hazir, dunyada muzakire qiliniwatqan, liwiyide uchushqa bolmaydighan rayon belgilesh teshebbusigha qayturghan inkasi bolup hésablinidu.

Amérika da'irilirining qarishiche, liwiyide uchushqa bolmaydighan rayon belgilesh dégen teshebbusning b d t da maqulluqtin ötüsh yaki ötelmesliki, xitay bilen rusiyining yene ret qilish hoquqini qollinish yaki qollanmasliqigha baghliq.