Ilim tehsil qilish menggülük perz

• Muxbirimiz ömerjan toxti
  2008-12-04

Ilim insanni ghapilliq we nadanliqtin qutuldurup alemni, tebi'etni we etrapidiki shey'ilerni chüshiniwélish imkaniyitige ige qilidu.

Se'udi erebistanining mekke mukerreme shehiride turushluq yash alim abduraxman hajim bu heqtiki söhbitimizni qobul qilghan idi.

Abduraxman hajim bilen söhbet

Abduraxman hajim oqush, öginishning zörüriyiti heqqide toxtulup mundaq didi:" tarixtin béri bir milletning tereqqi qilishi shu milletning bilim igileshke ehmiyet bergenlikidin bolup keldi؛ bir milletning pen - medeniyet sewiyisining yuqiri - töwen bolushi, shu milletning ronaq tapqan yaki ajizlashqanliqi, bir döletning rawaj tapqan yaki arqida qalghanliqi, bir döletning küchlük yaki ajizliqi shu milletning bilim igileshke ehmiyet bergen yaki bermigenliki bilen ölchinip keldi. Bir milletning pen - medeniyiti rawaj tapsa, shu dölet bay, qudretlik bolalaydu. Dölet bay, qudretlik bolghandila xelqmu köngüllük yashap tirikchilik qilalaydu. Bir millet bilimsizliktin dawamliq qalaq péti turiwerse bügünki dunyagha maslishalmay, tarix sehnisidin süpürülüp, qumgha singgen sudek tügiship kétidu. Oqup, öginip, bilgenlerni ishlitip mangghandila zaman'gha masliship mangghili bolidu. Dunyada ilim - pen ishliri tereqqi qilmighan, medeniyet sewiyisi töwen, bilim qurulmisi ajiz millet héchqachan bext - sa'adet, parlaq istiqbal tépip turmush kechürelmeydu, medeniyiti téximu rawaj tapmaydu. Insan ilim nuri bilen öz yolini yurutmisa, nadanliq kochisida qéliwéridu. Insan qelbining nuri ilim bilen quwwetlinidu. Insanning qedir - qimmiti ilim bilen bolidu. Her qandaq bir nersining mahiyitini bilish üchün, jahandiki weqe - hadisilerning yaxshi - yaman tereplirini biliwélish üchün, ademlerning qedir - qimmitini toghra chüshinish üchün, qisqisi, mukemmel bir adem bolush üchün ilim öginish tolimu zörürdur."

Dunyaning hazirqi riqabiti ilimde

Abduraxman hajim dunyaning hazirqi riqabiti ilimde ikenliki heqqide toxtulup mundaq didi:" yigirme birinchi esirdiki riqabet ilim saheside bolmaqta. Insanlar hazir yéngi esirning béshida yashawatidu. Ilim - pende tereqqi tapqanlar yene dawamliq algha ilgirilep kétiwatidu. Tereqqi tapmighanlar tereqqi tapqanlarning yéngi xirislirigha duch kéliwatidu. Hemme riqabet tégi - tektidin alghanda bilim riqabiti, ma'arip riqabitidur. Yéngi esir qandaq kishilerning bolidu? elwette u bilim - talant igilirining, riqabet igilirining, tetqiqatchi we keshpiyatchilarning bolidu. Yéngi esir qandaq kishilerge xiris qilidu dégende, yéngi esir aldi bilen nadan bilimsizlerge, horunlargha, israpxorlargha, ishqilip zaman bilen maslishalmaydighanlargha xiris qilidu."

Méningche, hazirqi riqabet dewri riqabetke chüshüshtin qorqidighanlarni, ilim - meripettin nésiwisi bolmighan, qalaqliq ichide ömür sürgüchilerni we zaman'gha maslishalmighanlarni bir - birlep shallap chiqiridu.