Нурсултан назарбайев өмүрлүк президент болуши мумкин

Қазақистанда нурсултан назарбайевниң өмүрлүк президент болуш мәсилиси һәққидә пикир - тәклипләр мәйданға чиқмақта. Бу назарбайевниң бу дөләтниң тәрәққиятиға қошқан төһписиниң зорлуқи билән мунасивәтлик икән.
Мухбиримиз үмидвар
2009.09.16
Nazarbay-305.jpg Сүрәт, қазақистан президенти нурсултан назарбайевниң алдинқи қетимлиқ сайламда қайта президент болуп сайланғандин кейинки мәлум паалийәттики көрүнүши.
AFP Photo

Қазақистан мәркизий асиядики йәр мәйдани әң чоң, иқтисадий тәрәққияти тез өсүватқан дөләт. Буниңға әгишип мәзкур дөләтниң президенти нурсултан назарбайевниң абройиниңму өсүватқанлиқи вә қазақистан пуқралири арисида ишәнч һәм һөрмәт қозғаватқанлиқи билдүрүлмәктә.

Бу арида қазақистандики һакимийәт бешидики җүмлидин қазақистан парламентида әң көп орунни игилигән "нур вәтән" партийиси бирдинла "дөләт рәһбири" қануни лайиһисини оттуриға қоюп, уни тәстиқтин өткүзүш арқилиқ нурсултан назарбайевни мәңгүлүк президент қилип бекитиш идийисини оттуриға чиқарди.
 
Фәрғанә агентлиқиниң қазақистан мәнбәлиридин нәқил кәлтүрүшичә, 14 - сентәбир күни "нур вәтән" партийисиниң муавин рәиси дархан калетайев баянат елан қилип, назарбайевниң қазақистанға қошқан хусусий төһписи үчүн уни бу дөләтниң мәңгүлүк президенти қилип бекитишни илгири сүргән. У, назарбайевни "пәқәтла президенти болуп қалмастин бәлки, мәмликәтниң етирап қилған даһийси" дәп көрситиш билән "дөлитимизниң һазирқи қанунларға өзгәртилиши киргүзүп, рәһбиримизниң өз орнида давамлиқ қелишини тәмин етиш керәк," дегән.
 
Мәркизий асия дөләтлири ичидә қазақистан өзиниң мол енергийә записи вә иқтисадий җәһәттики нисбәтән тез тәрәққияти билән йеқинқи йиллардин буян хәлқара җәмийәтниң диққитини җәлп қилмақта. явро - асиядики йәр мәйдани чоң дөләтләрниң бири һесабланған қазақистанниң йеқинқи йиллардин буян қолға кәлтүргән нәтиҗилири вә ғәрб дөләтлири билән болған көп тәрәплимилик һәмкарлиқлириға әгишип бу дөләтниң ечиветилгән бир җәмийәткә айлиниватқанлиқи муәййәнләштүрүлмәктә.

2000 - Йили қазақистан парлиамент "дөләтниң биринчи президенти" дәп аталған бир қанун чиқирип, нурсултан назарбайевниң мустәқил қазақистан дөлитини қурған төһписигә юқири баһа бәргән һәмдә униңға шу намда орден тәқдим қилған иди.

Қазақистан анализчилириниң йезишичә, назарбайев "нур вәтән партийиси" ниң әзаси болуп, адәттә мәзкур партийә президент партийиси дәпму атилип кәлмәктә. Униңға президентниң җәмәти вә йеқинлириниң рәһбәрлик қиливатқанлиқи қазақистан тәнқидчилири тәрипидин даим тилға елиниду. Мәзкур партийә назарбайевниң қазақ дөләтчиликигә қошқан төһписини юқири баһалайду.

Қазақистан асасий қануни бойичә нурсултан назарбайевниң президентлик мөһлити 2012 - йили тошиду. Бирақ, 2007 - йилидики йеңи қанун бойичә президент йәнә икки нөвәт вәзипә өтәш мүмкинкинчиликигә игә болуп, шундақ болғанда, назарбайевниң 2012 - йили йәнә қайта сайлинип вәзипә өтүшиниң еһтималлиқиму мәвҗут икән.

Мәркизий асия җумһурийәтлириниң президентлириниң мөһлити мәсилиси қизиқарлиқ темиларниң биридур. Сабиқ совет иттипақи дәвридә вәзипә өтүгән мәзкур сабиқ компартийә секритарлири өз хәлқлири мустәқил болғандин буян давамлиқ президентлиқ вәзипилирини атқуруп кәлмәктә. Буларниң ичидә ислам кәримов, нурсултан назарбайев изчил вәзипә өтәватқан шәхсләрдур. Қирғизистан президенти қурманбек бақийев вә таҗикистан президенти әмам әли рахманму иккинчи қетимлиқ президентлиқ вәзипилиригә олтурған иди. Түркмәнистанда болса, мәңгүлүк президентлиқ салаһийитигә еришкән сәпәр мурат ниязоф пәқәт вапат болғандин кейинла, вәзиписидин айрилип, йеңи президент қурбангүл бәрди муһәммәдов тәхткә чиққан иди.

Нурсултан назарбайевни өмүрлүк президент қилип бекитиш тәшәббуслири буниңдин игилириму мәйданға чиққан болуп, пәрғанә агентлиқиниң йезишичә, 10 - сентәбир күни назарбайеф өзи қатнашқан ақтүбә областидики бир аммиви мурасимда сөзгә чиққан хәлқ вәкили пүтүн област хәлқи намидин кәлгүсидики президент сайлимини әмәлдин қалдуруп, нурсултан назарбайевни қазақистанниң өмүрлүк президенти қилишни тәләп қилған иди.

Қазақистан 2010 - йили явропа бихәтәрлики вә һәмкарлиқи тәшкилатиниң рәисилик вәзиписини тапшурувелиш алдида туриду. Бу қазақистанниң хәлқаралиқ абройиниң өскәнликидин дерәк бәргәнлики үчүн президент нурсултан назарбайев қазақистан вә мәркизий асияниң демократик тәрәққиятни иглири сүрүш вә күчәйтишкә һәссә қошуш һәққидә вәдиләр бәрди.
 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.