Norwégiyide olimpikqa qarshi namayish ötküzüldi

 Bu qétimqi namayishning meqsiti xitayning 2008 ‏- yilliq olimpik yighinini bayqut qilish bolup, er-ayal ,balilar we qoshna dölet shiwitisiyidin kelgen méhmanlardin teshkil tapqan namayishchilar qoshuni ay-yultuzluq kök bayraq we Uyghurlargha hörlük, musteqilliq, sherqiy türkistan'gha démokratiye bolmisa olimpik bolmaydu qatarliq shu'arlar yézilghan lozunka ,pilakatlarni kötiriship shu'ar towlap, osloning qaynaq kochiliridin biri bolghan karl johan kochisidin ötti.

Bashlirigha chirayliq Uyghur doppilirini kiygen kichik dostlar we bashqa namayish ishtirakchiliri norwégiye Uyghur komitéti teripidin Uyghur , ularning wetini we ularning hazirqi ehwali shundaqla bu qétimqi namayishning meqsiti chüshendürüp teyyarlan'ghan 500 parchidin artuq teshwiqat wereqisini etraptiki namayishni qiziqip körüwatqan köpligen norwég we bu yerge sayahetke kelgen chet'ellik sayahetchilerge tarqitip ularning zor derijide diqqet-étibarini qozghidi.

Namayishchilar paytext osloning sayahet rayonining biri bolghan déngiz boyigha jaylashqan nobél erkinlik sariyining aldigha kélip toxtap , u yerdimu oxshashla teshwiq wereqisi tarqatti we etraptiki namayishni qiziqip körüwatqan her qaysi döletlerdin kelgen chet'ellikler we norwéglarning sorighan so'allirigha jawab berdi.

Norwégiye Uyghur komitétining rehberliri bu yerde nutuq sözlep Uyghur ili, Uyghurlar we xitayning olimpikni bahane qilip biguna Uyghurlarni qattiq basturuwatqanliqini etraptikilerge yene bir qétim chüshendürüp ötti.

Namayishqa qatnashqan ömer haji, kichik dost tumaris, we yene bir Uyghur yigiti namayish heqqide öz tesiratlirini bayan qildi.

Uch sa'etke yéqin dawamlashqan olimpikqa qarshi naraziliq namayishi nobél erkinlik sariyining aldida netijilik axirlashti.