Nur bekrining “Béyighan, medeniyleshken” déhqanliri kimler?

Uyghur aptonom rayonluq 11-nöwetlik xelq qurultiyining 5-omumiy yighini seyshenbe küni ürümchide bashlan'ghan.
Muxbirimiz irade
2012.01.10
nur-bekri-wang-lechwan-pichillashmaqta.jpg Nur bekri bilen wang lechwan pichirlashmaqta. 2009-Yili 6-mart, béyjing.
EyePress

Yighinda söz qilghan rehberler Uyghur élining 2011-yilliq xizmetlirini xulasilep, “Halqima tereqqiyat pilani” yolgha qoyulghandin buyan zor özgirishlerning barliqqa kelgenlikini, bolupmu 2011-yilida xelq turmushining yaxshilinip, déhqanlarning yilliq kirimining ilgirikidin nechche hesse örligenlikini doklat qilghan. Emma Uyghur déhqanlirining inkasi we közetküchilerning inkasi perqliq bolup, ular halqima tereqqiyatning Uyghur élining yerlik xelqlirini béyitishning ornigha, ichkiridin kelgen shirketlerni we xitay köchmenlirini béyitqanliqini bildürdi.

Uyghur aptonom rayonluq 11-nöwetlik xelq qurultiyining 5-omumiy yighini 1-ayning 10-küni ürümchidiki xelq sariyida resmiy bashlan'ghan. Yighinda Uyghur rayon re'isi nur bekri Uyghur élining iqtisadiy we siyasiy xizmetliridin doklat bérip, 2011-yilining iqtisadiy tereqqiyat we muqimliqini ishqa ashurushta zor qedemlerning tashlan'ghanliqini, merkezning siyasiy we iqtisadiy pilanliri Uyghur élide keng omumliship,, yaxshi netijilerning qolgha kelgenlikini, netijide, Uyghur élining ishlepchiqirish omumiy qimmitining ilgirikidin 12 pirsent ösüp, déhqanlarning otturiche kirimining 5400 yüendin ashqanliqini ilgiri sürgen.

Nur bekri doklatida, “Halqima tereqqiyat” yolgha qoyulghandin buyan, Uyghur élide alahide tereqqiyatlarning meydan'gha kelgenlikini tilgha alghan bolup, u 19 ölkining “Ghemxorluqi” netijiside Uyghur élidiki xelq turmushining körünerlik yaxshilinip, iqtisadning 2005-yiligha qarighanda bir qatlan'ghanliqini éghzi-éghzigha tegmey medhiyiligen. U sözide, 19 ölke-sheher, merkez dölet organliri we karxaniliridin shinjanggha yardem bergili kelgen 5600 din köp kadir tengritaghning jenub-shimalida kéche-kündüz küresh qilip, qan-teri we eqil-parasitini tökkenlikini, halqima tereqqiyat yolgha qoyulghandin buyan, bolupmu 2011-yilida xelq turmushida körünerlik özgirishlerning barliqqa kelgenlikini, déhqanlarning esirlerdin buyanqi “Soqma tam”, “Kések öyler” din bina öylerge köchüp, zamaniwi, medeniy turmushqa érishkenlikini ilgiri sürgen.

2011-Yilliq xizmetlerge a'it ilgiri élan qilin'ghan xulasilerde bolsun, yaki Uyghur rayon da'irilirining élan qilghan yilliq doklatlirida bolsun, 2011-yilining xelq turmushida bolupmu déhqanlarning turmushida ghayet zor özgirishler barliqqa kelgen bir yil bolghanliqi qayta-qayta tilgha élindi. Biz bügün yuqirida éytilghanlarning qanchilik toghriliqini bilip béqish üchün qeshqer wilayitige qarashliq melum bir déhqanning öyige téléfon qilduq.
Emma, téléfonimizgha chiqqan bu déhqanning bizge nahayiti éhtiyatchanliq bilen jawab bérip, emeliyetni sözleshtin özini qachurushi diqqitimizdin qachmidi elwette.

Chet'ellerdiki kishilik hoquq organliri “Shinjang xizmiti” yighinidin kéyin Uyghur élining 19 ölkige bölüp bérilishini qattiq tenqid qilghan idi. Ular doklatlirida buning Uyghur éli tebi'iy bayliqlirini yötkesh, Uyghur élige köchmen yötkesh we Uyghur kimlikini suslashturush qedimini tézlitishning yene bir xil usuli dep baha bérip, buning yerlik xelqtin bek ichkiridin chiqqan karxanilarni menpe'etke érishtürüwatqanliqini bildürgen. Bu heqte radi'omizgha ehwal inkas qilghan bir déhqan bizge halqima tereqqiyatning Uyghurlargha héchqandaq bir nep ekelmigenlikini, eksiche xitay köchmenlerni köpeytip, déhqanlarni yéridin ayrighanliqini, Uyghur déhqanlarning turmushining yenila oxshash qéyinliqini inkas qilghan idi.

Chet'ellerdiki Uyghur teshkilatliri bolsa, xitay hökümitining Uyghur élini 19 ölkige parchilap bérish arqiliq, Uyghur élini talan-taraj qilish qedimini tézletkenliki, halqima tereqqiyat siyasitining köchmen xitaylarni menpe'etlendüridighan we köchmen yötkesh qedimini tézlitidighan siyaset ikenlikini ilgiri sürüp kelmekte. Chet'ellerdiki Uyghur pa'aliyetchiliridin shwétsiye Uyghur ma'arip jem'iyitining meslihetchisi abdulla exet ependi nur bekrining sözi heqqide toxtaldi. U, eger xitay rehberliri ilgiri sürgendek Uyghur déhqanlirining turmushi yaxshilinip, halqima tereqqiyattin nepke érishiwatqan bolsa, buni ispatlash üchün xelq'ara organlarning, chet'el muxbirlirining kirip ehwal igilishige ruxset qilishi kéreklikini éytti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.