Obama hindistanning bash kötürüp chiqqanliqini dunyagha jakarlidi

Süret, amérika prézidénti barak obama hindistan ziyaritida hindistan bash ministiri monmoxan sing bilen körüshkendiki körünüsh.

Obama bu qétim özining ösmürlük dewrini ötküzgen hindonéziyide köprek ziyarette bolalamdu? bu, hindonéziyide yanar tagh partlap peyda bolghan xeterlik weziyette qandaq özgirish peyda bolidighanliqigha baghliq.

Birleshme agéntliqining yéngi déhlidin bayan qilishiche, amérika prézidénti barak obama hindistanni ziyaret qilghanda, hindistan alliqachan bir qudretlik dölet bolup bash kötürgenlikini we dunyada yéngiche rol oynashqa bashlighanliqini namayen qildi. Hindistan on nechche yildin buyan, mushundaq bir nishan'gha yétish üchün teyyarliq körüshke bashlighan idi. Obama bügün hindistan ziyaritini ayaqlashturghanda 'hindistan alliqachan bash kötürüp chiqti, amérika hazir hindistanning birleshken döletler teshkilati bixeterlik kéngishining da'imiy ezasi bolushini kütmekte' dep dunyagha jakarlidi.

Obama hindistan'gha qaritilghan yuqiri téxnika cheklimisini bikar qilmaqchi

Xewerde éytilishiche, obama bu qétimqi hindistan ziyaritide, hindistanning afghanistan urushida oynighan roligha yaxshi baha berdi. Pakistanning hindistan'gha qarshi qoralliq guruppilargha qarita yéterlik tedbir qollanmighanliqigha xapa bolghanliqini ipadilidi. Shundaqla amérikining hindistan'gha qaratqan yuqiri téxnika cheklimisini bikar qilidighanliqini jakarlidi.

Obama hindistanda qilghan sözide xitay heqqidimu toxtaldi

Amérika awazining bayan qilishiche, amérika prézidénti obama hindistan ziyaritide, xitay heqqide söz qilghanda, pulning miqdarini köpeytip tarqitish mesilisi üstide toxtalghandin bashqa yene, xitayning iqtisadiy jehette güllinishini we xelq'arada mes'uliyetchan dölet bolushini ümid qilidighanliqini ipadilidi.

Xitay, hindistanning b d t bixeterlik kéngishining da'imiy ezasi bolushini prinsip jehettin qollaydighanliqini ipadilesh üchün...

Los anjilis taymis gézitining bayan qilishiche, izchil halda hindistanning b d t bixeterlik kéngishige da'imiy eza bolushigha qarshi turup kéliwatqan xitay tünügün, tashqi ishlar minsitirliqining bayanatchisi shi léy arqiliq, hindistanning b d t bixeterlik kéngishining da'imiy ezasi bolushini prinsip jehettin qollaydighanliqini ipadilesh üchün ' biz hindistanning bixeterlik kéngishige da'imiy eza bolup kérish arzuyini toghra chüshinimiz, hindistan buningdin kéyin tereqqi qiliwatqan döletler bilen zich munasiwette bolushi kérek' dep jakarlidi.

Ijazxanning qarishiche, obamaning hindistanda qilghan sözlirining héchqandaq emeliy roli yoq

Amérika awazining bayan qilishiche, pakistanning pishawur uniwérsitéti xelq'ara siyaset pakoltétining bashliqi ijazxan ' gepning rastini qilghanda, obamaning hindistanda qilghan sözlirining héchqandaq emeliy roli yoq, u hindistan weziyitini özgertelmeydu' dep tehlil qildi.

Sinxaning qarishiche, amérika xitayni tosalaydighandek emes

Yéngi déhli néhru uniwérsitétining xelq'ara siyaset mutexessisi sinxaning qarishiche, pakistanning weziyiti hazir muqim emes, tebi'iy apet bu döletning iqtisadini qattiq zexmilendürdi. Uningdin bashqa, pakistan yillardin buyan térrorchilargha panah bolup kéliwatqanliqi we yadro qorallirining tarqilishini keltürüp chiqarghanliqi üchün, xelq'araning neziridin chüshüp qaldi. Emma, xitay hazir yene pakistanning qobul qilish iqtidari bar - yoqluqigha qarimayla, pakistanning beshinchi chong yadro éléktir ré'aktori qurushigha yardem bérimiz, dewatidu. Bundaq ishlarda hazir, amérika xitayni tosalaydighandek emes.

Xitayning mu'awin bash minsitiri hazir köp miqdarda kiriwatqan pul - mebleghning pul paxalliqini peyda qilishidin ensireydiken

Xitayning 'yer shari waqit géziti'ning bayan qilishiche, obamaning asiya ziyariti xitayning etrapidila dawamlishiwatidu. U hindistan, hindonéziye ziyaritidin kéyin yene yaponiye, jenubiy koriyilerni ziyaret qilidu, eng axirida yaponiyide ötküzilidighan 20 chong sana'et aliy derijilik uchrishishigha qatnishidiken, xewerde éytilishiche, bügün xitayning mu'awin bash ministiri wang chisen 'tereqqi qiliwatqan döletler hazir, köp miqdarda kiriwatqan pul - meblegh bilen pul paxalliqi peyda bolush xewpige yüzliniwatqanliqi'din endishe qiliwatqanliqini ipadiligen.

Obama yanar taghlarning qoyuq is - tütekliri yamrawatqan hindonéziyide ziyaritini qisqartishqa mejbur boldi

Washin'gton pochtisi gézitining bayan qilishiche, obama bügün yéngi déhlidin jakartigha kélip, hindonéziyini ziyaret qilishqa bashlidi. Obama hindonéziye prézidénti sushilo bilen körüshti, bu ikki prézidént soda, ma'arip, pakiz énérgiye qatarliq sahelerdiki hemkarliqini kücheytidighanliqini jakarlidi.

Amérika awazining bayan qilishiche, obama ösmürlük dewridiki töt yilini 1960‏ - yillirida mushu bu dölette ötküzgen idi. U ösmürlük dewridiki sawaqdashliri bilen körüshishni arzu qilatti, bu dölettiki musulmanlarmu uning meschitlerge kélishini kütetti. Emma, amérika prézidénti obama, 4‏ - noyabirdin bashlap yanar taghlarning qoyuq is - tütekliri yamrawatqan bu elde élip baridighan ziyaritini qisqartishqa mejbur bolmaqta.

Yuqiridiki awaz ulinishidin, bu heqtiki melumatimizning tepsilatini anglaysiler.