Barak obama jon kérriyni dölet ishliri ministirliqigha körsetti

Amérika prézidénti barak obama bügün démokrat dölet mejlisi ezasi jon kérriyni amérika dölet ishliri ministirliqigha namzat qilip körsetti. Hazirqi amérika dölet ishliri ministiri hillariy kilinton obama hökümitining ikkinchi qétimliq wezipe ötesh mezgilide özining dölet ishliri ministirliqini dawamlashturmaydighanliqini élan qilghandin kéyin, uning ornigha chiqidighan namzatlar tallinishqa bashlighan idi. Deslepte amérikining b d t diki da'imiy wekili susan raysning ismi tilgha élin'ghan bolsimu, emma jumhuriyetchilerning buninggha qarshi chiqishi bilen susan rays namzatliqtin chékin'gen idi. Bügün amérika prézidénti barak obama jon kérriyning ismini resmiy élan qildi.

Bu yil 69 yashqa kirgen jon kérriy pishqedem wéytnam urushi jengchisi bolup, u hazir amérika dölet mejlisi tashqi ishlar komitétining bashliqi. U 2004 - yili prézidéntliq saylimigha chüshken. Emma saylamda jumhuriyetchi namzat jorj bushqa utturup qoyghan idi.

Jon kérriy uzun yilliq diplomatiye tarixigha ige bir kishi bolup, u dölet mejlisi ezasi mezgilidimu nahayiti aktip bir siyasetchi bolghan. U pakistan, ghaza we süriyilernimu ziyaret qilghan. U tashqi siyasette mötidilliki bilen tonulidighan kishi bolup, herwaqit döletler ara ittipaqliq we kélishish terepdari bolup kelgen. Mesilen, bu heqte metbu'atlarda élan qiliniwatqan mulahizilerde éytilishiche, süriyide krizisining deslepki mezgilliride yeni besher esad puqralarni qirishqa bashlashtin ilgiri, u besher esadning xelqning awazigha qulaq sélip, dölette islahat élip baridighanliqigha ishinidighanliqini qayta - qayta tilgha alghan. Emma besher esed kütken yerdin chiqmighandin kéyin, u pozitsiyisini özgertip, süriyide bixeter rayon berpa qilishni we öktichilerni qorallandurushni teshebbus qilishqa bashlighan. U hem liwiye asminida uchush cheklen'gen rayon berpa qilishqa qarshi chiqquchilarning biri idi.

Prézidént obama jon kérriyning namzatliqini chüshtin kéyin sa'et bér yérim etrapida élan qildi. U sözide aldi bilen ötken 4 yil ichide amérikining ilgiri yillargha qarighanda téximu küchlük, téixmu bixeter we xelq'aradimu hörmitining ashqanliqini bildürdi we buni elwette bu 4 yil japaliq xizmet qilghan hillariy kilinton xanimning töhpisidin ayrip qarashqa bolmaydighanliqini bildürüp, uninggha alahide teshekkür éytti.

Andin obama sözini dawamlashturup, “Men bu nöwetlik hökümet mezgilide dölet ishliri ministirliqi wezipisige özemning jon kérriyni körsitidighanliqimni nahayiti pexirlen'gen halda élan qilimen” dédi. U jon kérriyning uzun yildin béri diplomatiye saheside xizmet qilghan, tejribilik shexs ikenlikini, uning öz xizmiti we körsetken töhpiliri bilen we hem démokratik, hem jumhuriyetchi ezalarning oxshashla hörmitige sazawer bir kishilikini bildürüp, jon kérriyning bundin kéyinki amérika diplomatiyisini élip bérishqa eng muwapiq namzatliqini eskertti.

Obama amérikining aldida nurghun riqabetler bolsimu, amérika her waqit özining qimmet qarishida ching turghan asasta herqandaq riqabetni yéngip, menggü küchlük dölet bolushni dawam qilidighanliqigha ishinidighanliqi, hem özige qoshulghan bu yéngi sepdashlirining sayiside buni ishqa ashurush ishenchisiningmu yuqiriliqini bildürdi.

Xewerlerdin qarighanda, jon kérriy dölet ishliri ministiri bolghan teqdirde, u amérikining süriye krizisini qandaq hel qilidighanliqi, yükséliwatqan xitaygha qandaq pozitsiye tutudighanliqi we iranning yadro mesilisige oxshash bir qatar su'allargha duch kélidighanliqi melum. U xitay bilen bolghan munasiwetlerde amérika - xitayning her jehettin hemkarliqini teshebbus qilip kelgen shexs bolsimu, emma bu yilning béshida u xitayning amérika shérketlirining uchur séstisigha hujum qilip, mexpiyetliklirini oghrilash weqesi ashkarilan'ghanda xitayni qattiq tenqid qilghan. U xitayning intérnét hujumliri, jasusluq we téxnika oghriliqigha oxshash nurghun mesililirini tilgha élip, amérika - xitay arisidiki söhbetlerde bu mesililerning choqum hel qilinishi kéreklikini bildürgen idi.

Hörmetlik radi'o anglighuchilar, jon kérriyning namzatliqi dölet mejliside awazgha qoyulidu. Eger u yéterlik awazgha érishken teqdirde, amérikining dölet ishliri ministiri bolidu. Emma, uning dölet mejliside héchqandaq tosalghugha uchrimaydighanliqi, jumhuriyetchilerningmu uni qollaydighanliqi yüzde - yüz dep qaralmaqta.