Obama prézidéntliqidiki bir yil we Uyghurlarning kishilik hoquq mesilisi heqqide mulahize

Amérika qoshma shitatlirining 44 - prézidénti barak obama prézidéntliq wezipisige olturghili bir yil boldi. U, özining amérika tarixidiki tunji qara tenlik prézidént bolushi we amérika siyasitide élip barmaqchi bolghan islahatliri heqqide bergen wediliri tüpeyli amérika we shundaqla dunya xelqining diqqitini qattiq jelp qilghan idi.
Muxbirimiz irade
2010.01.29
Obama-tunji-yilliq-doklatta-305.jpg Süret, prézidént obama charshenbe küni, 27 - yanwar axsham özining prézidént bolghanliqigha bir yil tolghanliq munasiwiti bilen parlaméntta amérika xelqige yilliq doklat bériwatqan körünüshlerdin biri.
AFP Photo

Prézidént obama charshenbe küni axsham özining prézidént bolghanliqigha bir yil tolghanliq munasiwiti bilen parlaméntta amérika xelqige yilliq doklat bérip, amérikining özining prédéntliqidiki bu bir yilini xulasilidi we bundin kéyinki pilanlirini bayan qildi.

Amérika prézidénti barak obama bu bir yil jeryanida xelqning özidin kütken ümidige layiq ish qilalidimu, uning sözige qandaq bahalar bérildi?

Amérika prézidénti barak obama prézidéntliqining birinchi yil xatire künide amérika xelqige xitaben söz qilip, özining bir yilliq xizmiti we bundin kéyinki pilanlirini xulasilep chiqti. U charshenbe küni qilghan sözide, asasliqi amérika iqtisadini yükseltish we amérikida nöwette 10 pérsent bolghan ishsizliq nisbitini chüshürüsh üchün téximu köp ish imkani yaritidighanliqini alahide tekitlep ötti. U sözide yene, özining saylamda bergen eng chong wediliridin biri bolghan salametlik sughurta islahati élip bérishni qet'iy dawam qilidighanliqini bildürdi.

Emma obama afghanistan, iraq we iranning yadro mesililiri heqqide nahayiti qisqila toxtilip ötti. Nyuyork waqti géziti qatarliq bir qisim gézitler amérika prézidénti barak obamaning yilliq xulasisigha bergen bahasida uning bir yildin buyan yekünligen tejribilirini nahayiti semimiylik bilen otturigha qoyghanliqini we özining nutuqi bilen xelqning könglini utqanliqini yazdi.

Ular yene obamaning amérika iqtisadini yaxshilash mesilisini birinchi orun'gha qoyushini toghra bir tallash dep baha berdi.

Emma buninggha oxshimaydighan köz qarashtikiler bolsa, obamaning dölet mudapi'e mesilisi üchün sözide yéterlik orun bermigenlikini, obamaning tashqi siyasette héchqandaq netije qazinalmighanliqini ilgiri sürdi.

Biz obamaning bir yilliq xizmetliri, bundin kéyinki pilanliri we uning Uyghur mesilisige bolghan tesirliri heqqidiki köz qarishini élish üchün amérika Uyghur jem'iyitining mu'awin re'isi, adwokat alim séyitof ependi bilen söhbet élip barduq.

Yuqiridiki awaz ulinishidin, bu heqtiki söhbitimizning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.