1986-Yilqi chérnobil paji'esining zerdabini Uyghurlarmu tartmaqta
2011.04.18
Almata shehirining turghuni tashpolat pexirdinof ene shularning biri bolup, u radi'omiz ziyaritini qobul qilip öz kechürmishlirini otturigha qoydi.
Buningdin 25 yil muqeddem, yeni 1986-yilning 26-aprél küni okra'inaning chérnobil atom éléktr istansisining 4-bölümide yérilish hadisisi yüz bérip, uningdin bölünüp chiqqan radi'o'aktip maddilar sabiq sowét élining, shundaqla yawropaning hawa boshluqini bulghighan idi. Chérnobil atom istansisi sowét dölitidiki eng quwwetlik atom éléktr istansisi bolup, apet yüz bergendin kéyin uning adem we iqtisad jehettin yetküzgen chiqimi intayin keng kölemde bolghanliqi éniqlan'ghan.
Melumatlargha qarighanda, deslepki üch ayning ichide 31 adem halak bolghan. Zeherlik maddilar 15 yil ichide yene 60–80 ademning wapat bolushigha élip kelgen. Ular shundaqla adem organizmida türlük késellerning peyda bolushigha we ularning küchiyishige, yene minglighan ademning ölümige he, menggüge naka bolup qélishigha seweb bolghan. Chérnobil apitini yoqitish heriketlirige pütkül sowét jumhuriyetliridin 600 mingdin oshuq adem seperwer qilin'ghan idi.