Shinjang uniwérsitétida 92 neper yéngi oqughuchi mejburi oqushtin qalduruldi


2005-11-28
Share

11 – Noyabir küni shinjang uniwérsitétining bu yil qobul qilin'ghan 92 neper yéngi oqughuchisi b tipliq jiger késilige giriptar bolghanliqtin mektep teripidin mejburi bir yil oqushtin qaldurulghan hemde "oqushqa kirish salahiti bir yil saqlinidighan bolup, eger bu bir yil ichide ularning késili tel töküs saqiyip qayta tekshürüshtin ötse qaytilap oqushqa kirse bolidu" dep békitilgen.

Metbu'atlardiki inkaslar

Shinjang uniwérsitétida yüz bergen bu weqe jem'iyette qattiq ghulghula bolup, mezkur mektep rehberliri oqutquchi, oqughuchi we ata - anilarning qattiq naraziliqigha duch kelgen. Mesilen: mezkur weqe heqqide "ürümchi sehiri kechlik géziti" de mexsus maqale élan qilinip, shinjang uniwérsitéti qattiq tenqitligen. Hetta béyjingda neshir qilinidighan qanun gézitidimu bu heqte mexsus melumat bérilgen bolup, shinjang uniwérsitétini eyibligen.

Munasiwetlik melumatlargha qarighanda, shinjang uniwérsitéti gerche terep - tereptin tenqidiy pikirlerge uchrighan bolsimu, mektep rehberliri yenila "bizning bundaq qarar chiqirishimiz oqughuchilarning salametligini oylap, ammiwi sorunning bixeterlik bolushini közde tutqanliqimizni körsitip béridu" dep özlirini aqlighan. Lékin köpligen oqughuchilar "mektepning bundaq qilishi aliy mektepke oqughuchi qobul qilishtiki salametlik tekshürüsh heqqide békitilgen nizam namigha xilapliq qilghanliq dep qarimaqta. Ata -anilarmu " shinjang uniwérsitétining bundaq qarar chiqirishi mesilini bekmu addiy qarap, bekmu addiy bir terep qilghanliq hemde oqughuchilarni terbiye élish hoquqidin men'i qilghanliq" dep qarimaqta.

Shinjang uniwérsitétining oqughuchi qobul qilish ishxanisidiki ismini melum qilishni xalimighan bir xizmetchi "bu qétim mektep 92 neper oqughuchini oqushtin toxtutishta, rehberlikler aldi bilen mektep doxturxanisining tekshürüsh netijisi we doxturxana rehberlirining pikirini asas qilghan. Shundaqla mezkur mektepning " 2005 - yilliq oqughuchi bashqurush nizamnamisi" boyiche muzakire élip bérish arqiliq qarar qilghan" dep bildürgen.

Naraziliqlar

Ziyaritimizni qobul qilghan mezkur mekteptiki ismini melum qilishni xalimighan bir xizmetchi özining bir tughqinining mushu qétimqi 92 neper késel dep öz yurtlirigha qayturiwétilgen balilar ichide ikenligini anglap mektep doxturxanisigha bérip ehwal sürüshtürgenlikinni hemde doxturxana rexberlirining bu ishta soghaq mu'amilide bolghanliqini melum qildi:

Ismini melum qilishni xalimighan bu xizmetchi bu qétimqi weqening peqet mektep ichidiki oqutquchi we xizmetchiler arisidila emes, belki jem'iyettimu qattiq tesir körsitip, ghulghula qozghighanliqini bildürdi :

Késelning tehditi qanchilik?

Ziyaritimizni qobul qilghan ismini melum qilishni xalimighan bu xizmetchi özi ishleydighan ishxanida b tipliq jiger késilige giriptar bolghan bir xitayning yillardin buyan héchqandaq xetersiz ishlewatqanliqini sözlep kélip, mektepning bu qétim mingbir teslikte ali mektep bossughisigha kérgen oqughuchilarni b tipliq késel wirusi bilen yuqumlan'ghan dégen bahane bilen öz yurtlirigha qayturiwetkenlikidin qattiq ejeplinidighanliqini bildürdi.

Aptonom rayonluq xelq doxturxanisining yuqumluq késellikler bölümining bölüm bashliqi zaw süyü'enning bildürüshiche, b tipliq jiger késili wirusi peqet qan we qan meqsulati hemde nesli arqiliq yuqidiken. Buningdin bashqa yene zeximlen'gen tére we jinsiy munasiwet arqiliq yuqidiken. Adettiki kündilik turmushta kishilerning öz ara qol élishish yaki quchaghlishish qatarliq heriketliri arqiliq yuqishi mumkin emes iken.

Mektep doxturxanisining jawabi

Biz bu heqte shinjang uniwérsitétining doxturxanisigha téléfon qilip, 92 neper oqughuchining qayturiliwetkenliki toghruluq éghiz échishimizgha, téléfonni alghan doxturxana xadimi "men bu ishtin toluq xewirim yoq, siz bashliqimizdin sorang " dep téléfonni qoyiwetti.

Doxturxana bashliqi bilen alaqilishalmighandin kéyin, biz mezkur mektepning oqughuchilar bashqarmisigha téléfon qilduq. Téléfonni alghan bashqarma xadimi "bu bir siyasiy mesile, eger ziyaret qilimen disingiz muxbirliq kinishkingiz we ziyaret qilish guwanamingizni élip özingiz kéling, sizning salahitingizni bilmey turup, téléfon ziyaritingizni qobul qilmaymiz." Dep jawab berdi :

Muxbirimiz uninggha "men amérikidiki erkin asiya radi'osining muxbiri tursam, téléfonda ziyaret qilishtin bashqa amalim yoq " déginide, mezkur bashqarma xadimi yenila öz gépini qilip "meyli siz nening muxbiri bolushingizdin qet'iy nezer, biz sizni körmey turup, ziyaritingizni hergiz qobul qilmaymiz. Bu dégen bizning tüzümimiz" dep nahayiti qopalliq bilen téléfonni qoyiwetti.

Munasiwetlik xewerlerde melum bolushiche, adette shinjang uniwérsitétida, oqughuchilarni késel sewebidin mekteptin toxtitip quyidighan ehwal burunmu bar bolghan. Lékin bu yil, toxtitilghan oqughuchilar sani eng köp bolghan bir yil bolup hésablinidiken. (Méhriban)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet