“Dunya sherqiy türkistanliqlar qérindashliq uchrishish yighini” da öz'ara hemkarlishish mesilisi asasiy téma boldi
2011.06.21

Bu yighin türkiye we dunyaning her qaysi jayliridin kelgen 100 ge yéqin Uyghurlarning qatnishishi bilen dawam qiliwatidu, yighinning birinchi küni yeni 20-iyun küni yighin etigen sa'et 10:00 da resmiy bashlandi. Yighinda aldi bilen sherqiy türkistan ma'arip we hemkarliq jem'iyitining re'isi hidayetullah oghuzxan söz qilip bu bir heptilik pa'aliyetning kün tertipi we shundaqla bu bir heptilik yighinning ehmiyiti toghrisida söz qildi.
Kéyin jem'iyetning bash naziri abdulhekimxan mexsum bu qétimqi yighinni uyushturushtiki asasi meqsetning öz ara hemkarlishish ikenlikini bildürdi we “Öz'ara hemkarlishishning islam dinidiki orni we tarixta hemkarliqtin qolgha keltürülgen netijiler” dégen témida söz qildi.
Yighinning dawamida yene doktor atawullah shehyar “Hemkarliqni kücheytishtiki asasiy prinsiplar” dégen témida söz qildi. Yighinda yene dunya Uyghur qurultiyining mu'awin re'isi siyit tumtürk ependi “Türkiye-xitay munasiwetliride sherqiy türkistan” dégen témida söz qildi.
Yighinning chüshtin kéyinki programmisida yighin'gha alahide teklip qilin'ghan “I ha ha” insani yardem wexpining idare hey'et rehberliridin doktor ömer faruq qorqmas ependi, teshkillinish we teshkilatning ehmiyiti dégen témida söz qilip Uyghurlarning sözde emes emeliy heriket arqiliq teshkillinishi, we birlishishning ehmiyiti, bölünüshning ziyanliri toghrisida söz qildi hem bölünüshtin kélip chiqidighan ziyan we yaman aqiwetler toghrisida emeliy misal körsetti.
3-Nöwetlik “Dunya sherqiy türkistanliqlar uchrishish yighini” ning deslepki künide, yeni 20-iyun künidiki yighinda asasliqi, öz ara hemkarlishish, yeni til, din, ma'arip, ijtima'iy we siyasiy sahelerde ortaq hemkarliq ornitish we hemkarliqni kücheytish alahide teshebbus qilindi.
Biz, 3-nöwetlik “Dunya sherqiy türkistanliqlar qérindashliq uchrishish yighini” toghrisida qirghizistandin kélip yighin'gha qatnishiwatqan qirghizistan Uyghur ittipaqining re'isi artiq haji bilen söhbet élip barduq.