Özbékistan musteqilliq bayrimining aldi - keynide amérika - özbék munasiwiti

Rusiye bash ministiri médwédéw tashkentni ziyaret qilghanda islam kérimof bilen söhbetlishiwatqan körünüshlerdin biri. 2009-Yili 23-yanwarda, tashkent.

Emma, kéyinki künlerde amérika bash qomandani dawid pétrosning özbékistanni ziyaret qilishi we islam kérimofning amérika herbiy bazisini tekrar échish mumkinchiliki barliqini ipade qilishi bilen ikki dölet munasiwetliride yaxshilinish boluwatqanliqi texmin qilin'ghan idi.

Bu heqte türkiyining ottura asiya döletliri munasiwetlirige mes'ul sabiq dölet ministiri exet endijan ependi aldinqi programmilirimizda bizning ziyaritimizni qobul qilip, özbékistanning rusiyining qirghizistan bilen bolghan munasiwetlirini kücheytishi we qirghizistanning jenubidiki perghane wadisida ikkinchi herbiy baza qurudighanliqini élan qilishi bilen özbékistan rusiyige qattiq narazi boldi, buning bilen özbékistan rayonda tengpungliqni saqlash üchün amérika bilen ish birliki qurush yolini tallidi, dégen idi.

Sabiq dölet ministiri exet endijan yene, amérikining özbékistanda herbiy bazisini qayta échish éhtimalliqi üstide toxtilip, özbékistanning rusiyige "sen eger qirghizistanning jenubidiki ferghane wadisida herbiy baza qurimen we qirghizistan'gha hédro-éliktir istansisi qurup bérimen deydikensen, u halda menmu amérikining özbékistanda herbiy baza qurushigha maqul deymen" dep agahlandurush bériwatqanliqini, eger rusiye qilidighinini qilimen désila özbékistanning amérikining herbiy baza qurushigha ruxset qilidighanliqini éytqan idi.

Ikki dölet munasiwetliride mana mushundaq tereqqiyat jeryanliri boluwatqanda amérika prézidénti barak obamaning özbékistanning birinchi séntebir musteqilliq bayrimi munasiwiti bilen tebrikname yollishimu alahide diqqet tartti. Uning üstige aldinqi küni özbékistan prézidénti islam kérimof amérikining özbékistanda turushluq bash elchisi richard norlandni qobul qilghan bolup, bu heqte chiqqan xewerlerdin melum bolushiche, ikki terepning bu söhbiti muhim tereqqiyatlarning xewerchisi dep qaralmaqta.

Yene bezi xewer menbeliri bu söhbette amérikining özbékistan'gha muhim teklip sun'ghanliqini ilgiri sürgen. Özbékistan milli xewer agéntliqi "uza" bolsa ikki terepning uchrishishida özbék - amérika munasiwetlirining muzakire qilin'ghanliqi, rayonning xewpsizliki we tinchliqning berpa qilinishi qatarliq mesililer boyiche pikir almashturush élip bérilghanliqini xewer qilghan.

Birinchi séntebir küni özbékistanning musteqil bolghanliqining 18 - yilliq xatire küni bolup, paytext tashkentte musteqilliq künini we tashkent shehirining qurulghanliqining 2200 yilliqini tebriklesh üchün 31 - awghust küni axsham tashkenttiki elishir nawayi baghchisida zor kölemlik tebriklesh pa'aliyiti élip bérilghan.

Pa'aliyetke özbékistan prézidénti islam kérimof we özbékistanning parlamént ezaliri bilen birlikte yene herqaysi döletlerning özbékistanda turushluq elchiliri qatarliq yuqiri derijilik méhmanlar teklip qilin'ghan.

Türk yurdu xewerler torida melum bolushiche, amérikining özbékistanda turushluq elchisi richard norlan qilghan tebrik sözide, "özbékistan bilen bolghan munasiwetlirimiz kéler yili téximu tereqqi qilidu," dep tekitligen. Bash elchining bu sözi alahide diqqet tartqan bolup, bu söz amérikining bu rayondiki kelgüsi herbiy jehettiki mewjudiyitining bishariti dep qaralmaqta iken.

Mutexessisler amérikining özbékistanda herbiy bazisini qayta échishi bilen rayonda tengpungluqning shekillinidighanliqi, rusiye bilen xitayning ottura asiyagha körsitidighan tesirini cheklep turidighanliqini we özbékistanningmu achquchluq dölet haligha kélidighanliqini ipade qilishmaqta.