Pakistandiki Uyghurlar urush musapirlirigha yardem bermekte

Pakistanda dawamlishiwatqan pakistan armiyisi bilen taliban jengchiliri arisidiki urushta, hazirgha qeder öy - makanlarni tashlap yiraq - yéqin'gha köchüshke mejbur bolghan musapirlar sani 1 milyon 500 mingdin ashqan.
Muxbirimiz shöhret hoshur
2009-05-27
Share
Pakistan-Uyg-swat-yardem-305 Pakistanning rawalpindi shehiride paaliyet élip bériwatqan ömer uyghur wexpi, urush musapirlirigha yardem qolini sunuwatqan xeyr - saxawet orunliridin biri bolup, sürette, ömer uyghur wexpidiki xadimlar we uyghur tijaretchiler.
RFA Photo / Shohret

Nöwette xeyr - saxawet orunliri bu urush musapirlirigha turmush lawazimetliri jehettin yardemde bolmaqta. Urush musapirlirigha yardem qiliwatqan xeyr - saxawet orunliri ichide ömer Uyghur wexpi namidiki bir Uyghur teshkilatimu bar.

Pakistandiki urush musapirlirining sani bir milyon 500 mingdin ashqan. Nöwette xeyr - saxawet teshkilatliri musapirlarni orunlashturush üchün seperwer halette. Pakistanning rawalpindi shehiride pa'aliyet élip bériwatqan ömer Uyghur wexpi, urush musapirlirigha yardem qolini sunuwatqan xeyr - saxawet orunliridin biridur.

Ömer Uyghur wexpi bir heptidin béri rawalpindidiki Uyghur tijaretchilerdin yardem toplimaqta. Ömer Uyghur wexpining bayanatchisi ekberning bildürüshiche, rawalpindidiki muhim soda orunliridin biri China Market dep atilidighan xitay malliri baziridur. Bu bazarda 1000 etrapida dukan bolup, Uyghurlar achqan dukan 100din artuq. Uyghur dukandarlirining hemmisi pakistan puqrasi. Bayanatchi ekber Uyghur tijaretchilerning özlirini qizghinliq bilen qollighanliqini bildürdi we buning sewebini chüshendürdi.

Biz pakistandiki Uyghur muhajirlar urush musapirlirining derdini eng yaxshi chüshinimiz. Chünki biz her xil shekildiki urushlar seweblik hijret qilishqa mejbur bolghan. Nöwette sherqi türkistan xelqining béshigha kéliwatqanlar, urush rayonidiki xelqning béshigha kelgenlerdin töwen emes.

Ömer Uyghur wexpiy özlirining pa'aliyitini, insaniy mes'uliyet, diniy mes'uliyet we puqraliq mejburiyiti qatarliq bir qanche nuqtidin chüshendürgendin bashqa yene, nöwette dunyaning közi tikilip turuwatqan musapirlar lagirlirida hazir bolush arqiliq , öz millitining ehwalini bashqilargha tonushturush pursitige érishish ikenlikinimu eskertip ötti.

Toluqsiz melumatlargha qarighanda, pakistandiki qebililer rayonini öz ichige alghan gherbiy shimal chégra boylirida, bir qisim Uyghurlar mewjut. Bularning bixeterlik ehwalidin muhajirettiki Uyghurlar endishe qilmaqta. Biz ömer Uyghur wexpidin urush musapiri arisida Uyghurlar bar - yoqluqini soriduq.

Ömer Uyghur wexpiy hazirghiche musapirlar arisida Uyghurlarni uchratmighanliqini, eger mushu heqte uchurgha érishelise özlirining yardemge teyyar ikenlikini bildürdi.

Ömer Uyghur wexpi ötken yilning axirida qurulghan. Bu teshkilat medeniy - ma'arip we xeyri - saxawet ishlirini asasi meqset qilghan bolup, hazirgha qeder pakistandiki Uyghur yashlirigha ana til ögitishni asasliq xizmet qatarida dawamlashturmaqta.

Bu teshkilat bir ammiwiy - medeniyet teshkilati bolsimu, pakistandiki xitay elchixanisining endishisini qozghighan. Xitay elchixanisi ötken yilning axirida, diplomatik wastliri arqiliq mezkur teshkilatni taqiwétishke urun'ghan bolsimu, netijige érishelmigen idi.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet