ھەر يىلى، بىرلا ۋاقىتتا 5 دۆلەتتە ئۆتكۈزۈلۈۋاتقان بۇ نامايىشنىڭ بەشىنچى نۆۋەتلىكى بۇ يىل 13-ئۆكتەبىر كۈنى ئىسپانىيىنىڭ پايتەختى مادرىد، بېلگىيىنىڭ پايتەختى بريۇسسېل، ئىتالىيىنىڭ پايتەختى رىم، گېرمانىيىنىڭ پايتەختى بېرلىن ۋە فرانسىيىنىڭ پايتەختى پارىژدا ئۆتكۈزۈلگەن نامايىشنىڭ پارىژدىكىسىگە فرانسىيە ئۇيغۇر جەمئىيىتىمۇ قاتناشتى. ئەركىنلىك نامايىشىغا پارىژدا پائالىيەت ئېلىپ بېرىۋاتقان تىبەت، ۋيېتنام، دېموكرات خىتاي ۋە ئۇيغۇر تەشكىلاتلىرىنى ئوز ئىچىگە ئالغان 13 تەشكىلاتتىن 300 ئەتراپىدا كىشى قاتناشقان.
ھەرقايسى تەشكىلات مەسئۇللىرى نامايىشتا مۇخبىرلارغا بايانات بېرىپ تىبەت ۋە ئۇيغۇرلارنىڭ خىتايغا قارشى ئېلىپ بېرىۋاتقان كۈرىشىنى قوللاپ قۇۋۋەتلەيدىغانلىقىنى، خىتاينىڭ بېسىم سىياسىتىنى قاتتىق ئەيىبلەيدىغانلىقىنى ئېيتقان. نامايىش جەريانىدا ھەرقايسى مىللەتلەر ئۆز مەسىلىلىرى ھەققىدە قىسقىچە مەلۇمات بېرىپ ئۆتكەن.