Пәйзиват наһийә қошават партком секретари линиң қилмишлириға шикайәт

Йеқинда пәйзиват наһийә қошават йезиси деһқанлириниң, " бундақ партком шуҗисиниң қилмишлири қандақ ақивәт пәйда қилар? " намлиқ әрзи, уйғур елидики бир қисим тор мәйданлирида елан қилинған.
Мухбиримиз әқидә
2008-12-23
Share
Uyg-dixan-hashar1-305 Уйғур дийариниң намәлум йезисидики уйғур деһқанлириниң һашар үстидики көрүнүши.
RFA File

Бу әрз елан қилинғандин кейин, кишиләр арисида күчлүк инкасларни пәйда қилди, мәзкур әрзнамида қошават йезисидики ли шуҗиниң деһқанларға йүргүзүватқан җазанихорлуқ қилмишлири паш қилинған болуп, биз ли шуҗини телефун арқилиқ зиярәт қилғинимизда, у өзи үстидә қилинған шикайәтләрниң пүтүнләй төһмәт икәнликини,қошават йезисидики барлиқ деһқанларниң уни яхши көридиғанлиқини билдүрди. Әмма деһқанлардин игилигән мәлуматлиримиз ли шуҗиниң сөзлирини пүтүнләй инкар қилди.

Пәйзиват наһийә қошават йезисиниң партком секретари линиң қилмишлири шикайәт қилинған әрздә баян қилинишичә, ли деһқанлардин һәр йили йәр һөддигә бәргәндә артуқ чиққан йәргә пул йиққандин сирт, су пули вә йеңи ечилған йәргә 100 йүәндин 150 йүәнгичә пул йиғидикән. Шуниңдәк 2008 ‏ - йили селиқ түрлирини 20 хилдин ашурған. У йәнә деһқанлардин йиққан пул билән ячейка шуҗилирини 30 миң йүәндин 60 миң йүәнгичә мукапатлиған. Ли йәнә мәхсус қимар соруни түзәп, ячейка кадирлири билән қимар ойнашни адәтләндүргән болуп, униң билән қанчә көп қимар ойниған кадир шунчә әтиварланған.

У һәтта очуқ ‏ - ашкара " қимар ойнимиған кадир бәдинидә әркәк түки йоқ кадир, бәдинидә әркәк түки йоқ киши қандақму кадирлиқ қилалисун " дегәндәк сөзләр билән кадирларни қимар ойнашқа мәҗбурлайдикән.

Ли булардин сирт, йезилиқ һөкүмәтниң қорусидин 3 еғиз өйдә мәхсус кәклик, қирғавул, көк кәптәр бақидиған вә буларни мәхсус ли үчүн таам қилип тәйярлайдиған ашпәз вә башқа әмгәк күчлирини аҗратқандин сирт, бәш ‏ - алтә аял хизмәткарни ишқа салидикән.

Әрздә, ли үчүн хизмәт қиливатқан бу кишиләр дөләт кадириму яки хизмәткарму буни деһқанларниң ениқ айриялмайватқанлиқи оттуриға қоюлған болуп, бу кишиләрниң кечә - күндүз униң еһтияҗидин чиқидиғанлиқи тәкитләнгән.

Әрздә йәнә, линиң шекәр көлдә меһмансарай, қимархана, паһишәханилар ачқанлиқини ашкарилиған.

Юқириқидәк қилмишлири билән қошават йезисидики деһқанларниң наразилиқини мәйданға кәлтүргән ли шуҗи тоғрисидики шикайәтләр һәққидә мәлумат игиләш үчүн биз алди билән ли шуҗини зиярәт қилдуқ .

Зияритимизни қизғинлиқ билән қобул қилған ли шуҗи, буларниң һәммисиниң өзи үстидин қилинған төһмәт икәнликини ейтти. У "сән йеза кадирлиридин мениң қандақ бир киши икәнликимни сүрүштүргин, мениң үстүмдин төһмәт ойдурған кишиләр маңа аян, буни қилған деһқанлар әмәс, буни қилған бир қисим йеза кадирлири," деди. Һәқиқәтән ли һәққидә йезилған наразилиқ хетидә " бу әрзнамә мәзкур шуҗиниң һәммә ишлиридин хәвәрдар кадир тәрипидин йезилған, улар әрзни наһийигә сунса наһийиниң йәнә шуҗиға чүшүрүп беришидин әнсирәп торға йоллашни тоғра тапқан," дәп әскәртилгән иди.

Анчә ‏ - мунчә уйғурчә сөзләшни өгинивалған ли зияритимиз җәрянида чүшиниш наһайити қейин һаләттә өзини ақлашқа тиришти.

Ли зияритимиз давамида қайта ‏ - қайта мән әрздә ейтилған начар илләтләрдин хали, мән тоғра вә дурус адәм болғанлиқим үчүн партийә маңа 15 йилдин буян партком шуҗиси болуш вәзиписини бәргән. Мән деһқанлар билән наһайити инақ ‏ - иттипақ өтимән, деһқанлар мени наһайити яхши көриду дәп өзини ақлашқа тиришти. Биз униңдин ундақ болса биз йеза деһқанлиридин сениң һәққиңдә әһвал игилисәк, деһқанлар сән ейтқандәк сениң дурус инсан икәнликиңни бизгә ейтарму ? дәп соридуқ . У сәл иккилинип, мән ишинимән, улар тоғра сөзләйду деди.

Шуниң билән биз йезидики деһқанларни зиярәт қилдуқ.

Деһқанлар биринчи қол йеза башлиқиниң ли билән тил бириктүрүп, уни изчил һимайә қилидиғанлиқини, һәтта һәләк исимлик йәнә бир йеза башлиқиниң униң билән әйши ‏ - ишрәттә биргә икәнликини бизгә ейтип бәрди. Әмма, ли шуҗи бизниң йезида бундақ бир адәм йоқ дәп чүшәндүрүш бәрди.

Әмма биринчи қол йеза башлиқи, деһқанлар ейтқан һәләк исимлик кишиниң һели һаҗи икәнликини тоғрилап бәрди.

Сөзидә ли шуҗини қайта ‏ - қайта ақлиған йеза башлиқи, биз йезидики деһқанларниң көпинчисиниң ли үстидин шикайәт қиливатқанлиқини ейтқинимизда, азрақ иккилинип, аз ‏ - тола мәсилиләрниң мәвҗут икәнликигә иқрар қилди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт